TIMIRTTE 04
Tumu Xoossay Oonee?
Asay deˈido wode ubban daro xoossatuyyo goynniis. Gidikkonne, Geeshsha Maxaafay “hara xoossatu ubbaappe gita” issi Xoossaabaa yootees. (2 Hanidabaa Odiya 2:5) Yaatin, A hegaa keena gita oottiyaabay aybee? Ha Xoossay neeni abaa ay eranaadan koyiyaakko ha timirttiyaappe akeeka.
1. Xoossaa sunttay oonee, qassi nuuni he sunttaa eranaadan I koyiyoogaa bessiyaabay aybee?
Xoossay ba sunttay oonakko Geeshsha Maxaafan nuussi yootiis. I hagaadan giis: “Taani Yihoowa. Ta sunttay hagaa.” (Isiyaasa 42:8, NW) “Yihoowa” giyoogee Ibraawetto suntta; hegaa birshshettay “Hananaadan Oottees” giyoogaa gidennan aggenna. Yihooway nuuni A sunttaa eranaadan koyees. (Kessaabaa 3:15) Hegaa aybin ammanettana danddayiyoo? Geeshsha Maxaafan A sunttay 7,000ppe dariya sohotun deˈees! a “Bolla saluwan gidin, garssa sa7an gidin, [“tumu,” NW] Xoossaa” sunttay Yihoowa.—Zaarettido Wogaa 4:39.
2. Geeshsha Maxaafay Yihoowabaa ay qonccissii?
Asay goynniyo xoossatu ubbaappe tumu Xoossay Yihoowa xalla gidiyoogaa Geeshsha Maxaafay yootees. Aybissi? Hegawu daro gaasoy deˈees. Yihoowawu oogaappenne aaro maatay deˈees; hegaa gishshawu, ‘saˈa ubban Ubbaappe Xoqqay’ A xalla. (Mazamure 83:18 nabbaba.) Koyiyooba aybanne oottanawu ayyo wolqqay deˈiyo gishshawu, Geeshsha Maxaafay A ‘Ubbaappe Wolqqaama Xoossaa’ yaagees. Saluwaa, saˈaa, qassi saˈan paxa deˈiya ‘ubbabaa I medhdhiis.’ (Ajjuutaa 4:8, 11) Hegaa bollikka, ubbatoo deˈiyay Yihoowa xalla; qassi I merinawu deˈana.—Mazamure 90:2.
LOYTTA AKEEKA
Xoossaa dumma sunttay A bonchcho sunttatuppe aybin dummatiyaakko akeeka. I ba sunttaa nuussi waati yootidaakkonne aybissi yootidaakkokka nuuni beˈana.
3. Xoossawu daro bonchcho sunttati deˈikkonne, A sunttay issuwaa
Issi uraa A sunttan xeesin woy A bonchcho suntta xallan xeesin dummatetti deˈii? Zaaruwaa demmanawu, BIIDUWAA beˈite; yaatidi kaallidi deˈiya oyshata tobbite.
-
Buzo sunttay “Godaa” giyaagaa mala bonchcho sunttaappe aybin dummatii?
Asay daro xoossatussinne godatussi goynniyoogaa Geeshsha Maxaafay yootees. Mazamure 136:1-3 nabbabite; yaatidi ha oyshaa tobbite:
-
‘Xoossatu Xoossaynne godatu Goday’ oonee?
4. Yihooway neeni A sunttaa eranaadaaninne he sunttaa xeeganaadan koyees
Yihooway neeni A sunttaa eranaadan koyiyoogaa bessiyaabay aybee? BIIDUWAA beˈite; yaatidi kaallidi deˈiya oyshata tobbite.
-
Yihooway ba sunttay erettanaadan koyees gaada qoppay? Aybissi?
Yihooway ba sunttaa asay xeesanaadan koyees. Roome 10:13 nabbabite; yaatidi ha oyshata tobbite:
-
Yihoowa giyo, Xoossaa sunttaa xeesiyoogee ay keena koshshiyaabee?
-
Issi uri ne sunttaa hassayidi nena ne sunttan xeesiyo wode neessi aybi siyettii?
-
Neeni Yihoowa sunttaa xeesiyo wode awu aybi siyettees gaada qoppay?
5. Yihooway neeni A dabbo gidanaadan koyees
Kambboodiyan deˈiya Sotano giyo maccaasiyaa Xoossaa sunttaa eridoogee A awudeegaappenne aaruwan ufayttanaadan oottiis. BIIDUWAA beˈite; yaatidi kaallidi deˈiya oyshaa tobbite.
-
Sotana Xoossaa sunttaa eridoogee O waati maaddidoogaa ha biiduwaappe akeekadii?
Neeni issi uraara laggetanawu izaawu sunttaa erana koshshees. Yaaqooba 4:8a nabbabite; yaatidi ha oyshata tobbite:
-
Neeni ay oottanaadan Yihooway shoobbii?
-
Neeni Xoossaa sunttaa eriyoogeenne xeesiyoogee aara dabbotanaadan nena waati maaddana danddayii?
ISSI ISSI ASAY HAGAADAN GEES: “Xoossay issuwaa xalla gidiyo gishshawu, neeni A woyga xeesikkonne metoy baawa.”
-
Xoossaa sunttay Yihoowa gidiyoogaa neeni ammanay?
-
Xoossay ba sunttaa nuuni xeesanaadan koyiyoogaa neeni waata qonccissana danddayay?
AY AKEEKADII?
Tumu Xoossaa sunttay Yihoowa. Nuuni aara dabbotana mala he sunttaa eranaadaaninne xeesanaadan I koyees.
Zaaretuwaa
-
Asay goynniyo hara ubba xoossatuppe Yihooway waani dummatii?
-
Nuuni Xoossaa sunttaa xeesana koshshiyoy aybissee?
-
Yihooway neeni aara dabbotanaadan koyiyoogaa bessiyaabay aybee?
PILGGA
Xoossay deˈiyoogaa nuuni ammanettanaadan oottiya ichchashubata pilgga.
Xoossay awudenne deˈiyoogaa ammaniyoogee bessiyaaba gidiyoy aybissee?
“Xoossaa Medhdhiday Oonee?” (Wochchiyo Keelaa huuphe yohuwaa)
Xoossaa sunttaa beni woygi xeesiyaakko erettennaba gidikkonne, nuuni he sunttaa xeesana koshshiyoy aybissakko akeeka.
Nuuni Xoossaa woygi xeesikkonne dummatetti deˈii? Nuuni ayyo issi buzo sunttay deˈees gaana danddayiyoy aybissakko akeeka.
Hageeta Beˈadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaˈissiyoy Ayba Ogiyaanee?
Yihoowa Markkati miishsha qanxxissennan xannaˈissiyo prograamiyan, Geeshsha Maxaafaa birshshettaa awugaakka goˈettana danddayaasa. Ne so asa ubbaynne ne laggetikka nenaara xannaˈanaadan shoobbana danddayaasa.
