KAPITE 04
Ko Ai Te ʼAtua?
Talu mai fualoa neʼe tauhi tuʼumaʼu pe te hahaʼi ki he ʼu taula ʼatua. Kae ʼe talanoa ʼi te Tohi-Tapu ki te ʼAtua ʼae ‘ʼe lahi age ʼi te ʼu ʼatua fuli.’ (2 Koloniko 2:5) Ko ai te ʼAtua ʼaia? Pea he koʼe ʼe lahi age ʼi te ʼu ʼatua fuli? ʼI te kapite ʼaeni, ʼe ke tokagaʼi ai anai pe kotea te aluʼaga ʼe loto e te ʼAtua ke ke iloʼi ʼuhiga mo ia.
1. Ko ai te huafa ʼo te ʼAtua? Pea kotea ʼae ʼe ha ai ʼe ina loto ke ke iloʼi tona huafa?
ʼE fakaha mai e te ʼAtua tona huafa ʼi te Tohi-Tapu. ʼE ina ui ‘ko au Sehova, ko toku huafa ʼaia.’ (Lau ia Esaia 42:5, 8.) Ko tona huafa ko “Sehova,” ʼe ko he higoa Fakahepeleo, ko tona fakaʼuhiga “ʼE Ina Fakahoko.” ʼE loto e Sehova ke iloʼi tona huafa. (Ekesote 3:15) He koʼe ʼe tou iloʼi te faʼahi ʼaia? He ʼe tuʼu tona huafa ʼi te Tohi-Tapu tuʼa 7 000 tupu. a Koia, ʼe ko Sehova tokotahi pe ʼae ʼe ina fua te huafa ʼaia. ʼE ko ia ‘te ʼAtua moʼoni ʼae ʼi te lagi mo te kele.’—Tetelonome 4:39.
2. Kotea ʼe ui ʼi te Tohi-Tapu ʼo ʼuhiga mo Sehova?
ʼE lahi te ʼu ʼatua ʼe tauhi ki ai te hahaʼi kae ʼe ui ʼi te Tohi-Tapu ko Sehova ʼe ko te ʼAtua moʼoni pe ʼe tahi. Kotea tona tupuʼaga? He ʼe maʼoluga tana pule pea ʼe ko ia tokotahi pe te “Maʼoluga ʼAupito ʼi te kele katoa.” (Pesalemo 83:18) Pea ʼe ko ia “te Mafimafi,” he ʼe ina maʼu te malohi moʼo fai te meʼa ʼae ʼe loto ki ai. Neʼe ina “fakatupu ia meʼa fuli,” te ʼatulaulau pea mo meʼa maʼuli fuli ʼi te kele. (Apokalipesi 4:8, 11) Koia, neʼe mole he tahi neʼe ina fakatupu ia Sehova pea mole ʼi ai hona gataʼaga.—Pesalemo 90:2.
TA FAKALOLOTO
Ta vakaʼi te kehekehe ʼo te ʼu higoa fakatuʼulaga ʼo te ʼAtua pea mo tona huafa. Pea ʼe ina fakaha feafeaʼi mai tona huafa pea kotea tona tupuʼaga.
3. ʼE lahi ʼona higoa fakatuʼulaga kae ko tona huafa pe ʼe tahi
ʼE ʼi ai koa he kehekehe ʼo hakita pauʼi ki te ʼAtua ʼaki tona huafa peʼe ʼaki hona higoa fakatuʼulaga? Vakaʼi te ʼATA VITEO, pea fai te fehuʼi ʼaeni:
-
Kotea te kehekehe ʼo te ui “ʼAliki,” pea mo tona huafa?
ʼE ui ʼi te Tohi-Tapu, ʼe lahi te ʼu ʼatua mo te ʼu ʼaliki ʼe tauhi ki ai te hahaʼi. Lau ia Pesalemo 136:1-3, pea fai te fehuʼi ʼaeni:
-
Ko ai “te Atua o te u atua” mo “te Aliki o te u aliki”?
4. ʼE loto e Sehova ke ke iloʼi tona huafa pea mo ke fakaʼaogaʼi
Kotea ʼae ʼe ha ai ʼe loto e Sehova ke ke iloʼi tona huafa? Vakaʼi te ʼATA VITEO, pea fai te ʼu fehuʼi ʼaeni:
-
Kia koe la, ʼe loto e te ʼAtua ke iloʼi tona huafa? Kotea tona tupuʼaga?
ʼE loto e Sehova ke fakaʼaogaʼi tona huafa. Lau ia Loma 10:13, pea fai te ʼu fehuʼi ʼaeni:
-
He koʼe ʼe maʼuhiga ke toʼo te huafa ʼo te ʼAtua ʼae ko Sehova?
-
Kotea la ʼe ke logoʼi moka ʼe toʼo atu e he tahi tou higoa?
-
Kae ʼe feafeaʼi la kia Sehova?
5. ʼE loto e Sehova ke ke kaumeʼa mo ia
Neʼe ʼi ai he fafine mai Cambodge ʼe higoa ko Soten, neʼe ina fakaha te meʼa ʼae neʼe ina logoʼi ʼi tana iloʼi te huafa ʼo te ʼAtua. Neʼe ina ui “ʼe ko he meʼa fakafiafia ia.” Vakaʼi te ʼATA VITEO, pea fai te fehuʼi ʼaeni:
-
Kotea la neʼe logoʼi e Soten ʼi tana iloʼi ia te huafa ʼo te ʼAtua?
ʼI te agamahani, ka tou fia kaumeʼa mo he tahi, ʼe tou ʼuluaki fehuʼi age tona higoa. Lau ia Sakopo 4:8, ʼuluaki koga, pea fai te ʼu fehuʼi ʼaeni:
-
Kotea la ʼae ʼe kole atu e Sehova ke ke fai?
-
He koʼe ʼe tonu ke ke iloʼi mo toʼo ia te huafa ʼo te ʼAtua?
ʼE UI E ʼIHI: “Kotea pe he higoa ʼe ke toʼo ki te ʼAtua kae ko te maʼuhiga ʼe tou tauhi fuli pe ki te ʼAtua ʼe tahi.”
-
ʼE ke tui koa ko te huafa ʼo te ʼAtua ko Sehova?
-
ʼE ke fakaha feafeaʼi anai ʼe loto e te ʼAtua ke tou toʼo tona huafa?
MANATU TAFITO
Ko te huafa ʼo te ʼAtua moʼoni ʼe ko Sehova. ʼE ina loto ke tou iloʼi mo toʼo tona huafa ke tou liliu ko hona kaumeʼa.
Fehuʼi Fakamanatu
-
Kotea ʼae ʼe kehekehe ai ia Sehova mo te ʼu ʼatua fuli ʼae?
-
He koʼe ʼe tonu ke tou toʼo te huafa ʼo te ʼAtua?
-
Kotea ʼae ʼe ha ai ʼe loto e Sehova ke ke kaumeʼa mo ia?
TE TAHI ʼU MANATU
Vakaʼi ia manatu ʼe nima ʼe ha ai ʼe maʼuli moʼoni te ʼAtua.
He koʼe ʼe tonu te ui ʼae ke ke tui neʼe mole he tahi neʼe ina fakatupu te ʼAtua?
“Ko Ai ʼAe Neʼe Ina Fakatupu Te ʼAtua?” (Ko Te Tule Leʼo ʼaho 1 ʼo Oketopeli 2014)
Vakaʼi pe koʼe ʼe tonu ke ke toʼo te huafa ʼo te ʼAtua logo la ʼe mole ke iloʼi tona faʼahiga puʼaki totonu.
ʼE maʼuhiga koa ke ke iloʼi te faʼahiga toʼo ʼo te huafa ʼo te ʼAtua? Vakaʼi pe koʼe ʼe feala ke ui ko tona huafa pe ʼe tahi.
a Kapau ʼe ke fia maʼu he tahi ʼu fakamahino ki te fakaʼuhiga ʼo te huafa ʼo te ʼAtua pea mo te ʼu tupuʼaga ʼo te toʼo e ʼihi kau faifakaliliu tona huafa ʼi te Tohi-Tapu, vakaʼi te appendice A4 ʼo te Tohi-Tapu Fakafalani La Bible. Traduction du monde nouveau.