LIJIGANYO 04
Ana Mlungu Ali Ŵani?
Kutandila kalakala ŵandu aŵele ali mkulambila milungu jakulekanganalekangana. Nambope Baibulo jikusasala ya Mlungu jumo jwali “jwamkulungwa kupunda milungu josope.” (2 Mbili 2:5) Ana Mlungu jweleju ni ŵani? Ana ligongo chichi jwalakwe ali jwamkulungwa kupunda milungu josope? Mumtwe awuno chalijiganye yakwamba Mlungu jweleju.
1. Ana Mlungu lina lyakwe ŵani, soni ana jwalakwe akusasaka kuti tulimanyilile?
Mlungu ŵalimanyikasisye kwetuwe kupitila m’Baibulo. Jwalakwe ŵatite, “Lina lyangu lili, Une ndili (Yehofa).” (Aŵalanje Ekisodo 3:14 soni Alole Maloŵe ga Mwiŵanda.) Lina lyakuti “Yehofa” ŵaligopolele kutyochela mu Chihebeli. Ŵalijiganye mnope akusaŵecheta kuti linali likusagopolela kuti “Akusatendekasya Yindu Kutendekwa.” Yehofa akusasaka kuti tulimanyilile lina lyakwe. (Ekisodo 3:15) Ana mpaka tusimichisye chamtuli yeleyi? M’Baibulo, linali likusasimanikwa mmalo gakwana 7,000. a Lina lyakuti Yehofa lili lya “Mlungu jika jwakuwona jwakwinani ni chilambo chapasi.”—Detulonomo 4:39.
2. Ana Baibulo jikusasala yamtuli pakwamba ya Yehofa?
Baibulo jikusaŵecheta kuti pa milungu josope, Yehofape ni jwali Mlungu jwakuwona. Ligongo chichi? Pana magongo gejinji. Yehofa akwete udindo wekulungwa mnope soni jwalakwe ‘ali Jwakwinani Mnope ni Jwakulamulila pa chilambo chosope chapasi.’ (Aŵalanje Salimo 83:18.) Jwalakwe ali “Jwamachiligosope.” Yeleyi yikugopolela kuti jwalakwe akwete machili gakutenda chilichose chakusaka kutenda. Sonitu jwalakwe “ŵapanganyisye yindu yosope” yayili kwinani soni pachilambopa. (Chiwunukuko 4:8, 11) Mwakulekangana ni jwalijose, Yehofa jwangali ndanda soni mbesi.—Salimo 90:2.
KULIJIGANYA YEJINJI
Chitumanyilile mena ga udindo ga Mlungu soni lina lyakwe lisyesyene. Nambosoni yatesile pakulimanyikasya lina lyakwe kwa wawojo soni ligongo lyakwe.
3. Mlungu akwete mena gejinji ga udindo nambo lina lyakwe lisyesyene lili limo
Ana mundu akusosekwa akamulichisyeje masengo lina lisyesyene lya Mlungu kapena mena ga udindo? Kuti apate kwanga kwa chiwusyochi, alolele FIDIYO, kaneko akambilane yiwusyo ayi.
-
Ana lina lyakuti “Ambuje” likusalekangana chamtuli ni lina lyakuti Yehofa?
Baibulo jikusasala kuti ŵandu akusalambila milungu jejinji. Aŵalanje Salimo 136:1-3, kaneko akambilane chiwusyo achi:
-
Ana Mlungu “jwa milungu” soni “Ambuje ŵakwapunda achambuje wosope” ali ŵani?
4. Yehofa akusasaka kuti ammanyilile soni akamulichisyeje masengo lina lyakwe
Ana ni chichi chachikusalosya kuti Yehofa akusasaka kuti wawojo alimanye lina lyakwe? Alolele FIDIYO, kaneko akambilane yiwusyo ayi.
-
Ana Yehofa akusasaka kuti tulimanyilile lina lyakwe? Ligongo chichi akwanga myoyo?
Yehofa akusasaka kuti tukamulichisyeje masengo lina lyakwe. Aŵalanje Aloma 10:13, kaneko akambilane yiwusyo ayi:
-
Ana kukamulichisya masengo lina lya Mlungu lyakuti Yehofa kwana umbone wamtuli?
-
Ana akusapikana uli mundu jwine pakwaŵilanga lina lyawo?
-
Ana Yehofa akusapikana uli pakukamulichisya masengo lina lyakwe?
5. Yehofa akusasaka kuti aŵe paunasi ni jwalakwejo
Jwamkongwe jwa ku Cambodia lina lyakwe Soten jwasasile kuti kumanyilila lina lya Mlungu “kwamtamiche mtima pasi.” Alolele FIDIYO, kaneko akambilane chiwusyo achi.
-
Mwakamulana ni fidiyoji, ana kumanyilila lina lya Mlungu kwamkamuchisye uli Soten?
Kuti mundu aŵe mjawo, akusatanda kuwusya lina lyakwe. Aŵalanje Yakobo 4:8a, kaneko akambilane yiwusyo ayi:
-
Ana Yehofa akwaŵenda kutenda chichi?
-
Ana kulimanyilila lina lya Mlungu soni kulikamulichisya masengo mpaka kwakamuchisye chamtuli kuŵa paunasi ni jwalakwe?
YAKUSAŴECHETA ŴANDU ŴANE: “Mlungu ali jumpepe, myoyo jwalijose mpaka amkolanjeje mwakusachila.”
-
Ana akusimichisya kuti lina lya Mlungu lili Yehofa?
-
Ana mpaka asale ligongo lyakwe Mlungu akusasaka kuti tukamulichisyeje masengo linali?
YALIJIGANYISYE
Lina lya Mlungu lili Yehofa. Jwalakwe akusasaka kuti tulimanyilileje soni tulikamulichisyeje masengo kuti tuŵe najo paunasi.
Yiwusyo Yakuwilisya
-
Ana Yehofa akusalekangana chamtuli ni milungu jine?
-
Ligongo chichi tukusosekwa kukamulichisya masengo lina lya Mlungu?
-
Ana chichi chachikulosya kuti Yehofa akusasaka kuti aŵe najo paunasi?
YAKULINGA YINESONI
Apate magongo 5 gakusimichisya kuti Mlungu apali.
Ligongo chichi yili yakupikanika kukulupilila kuti Mlungu apali?
“Ana Ŵani Ŵaŵampanganyisye Mlungu?” (Sanja ja Mlonda, Ogasiti 1, 2014)
Ligongo chichi tukusosekwa kukamulichisya masengo lina lya Mlungu atamose kuti ngayikumanyika muŵalikolanjilaga linali?
Ana Mlungu akusasaka kuti tukamulichisye masengo mena galigose? Ligongo chichi mpaka tujile kuti Mlungu akwete lina limo?
a Kuti amanyilile yejinji yalikusagopolela lina lya Mlungu soni ligongo lyakwe m’ma Baibulo gane ŵalityosisye, alole kabuku ka sgd ngani siŵili syandanda.
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
