XOOK 04
¿Máax Dios?
Desde ka káaj yóokʼol kaabeʼ wíinikeʼ jejeláas diosoʼob tsʼoʼok u adorartik. Le Bibliaoʼ ku tʼaan tiʼ juntúul Dios, letiʼeʼ «u maas nojchil tiʼ tuláakal u maasil diosoʼoboʼ» (2 Crónicas 2:5). ¿Máax túun le Dios ku yaʼalikoʼ? ¿Baʼaxten letiʼ u maas nojchil tiʼ tuláakal u maasil diosoʼoboʼ? Teʼ xookaʼ yaan a kanik le baʼax u kʼáat Dios ka a wojéelt tu yoʼolaloʼ.
1. ¿Bix u kʼaabaʼ Dios yéetel bix k-ojéeltik u kʼáat ka k-kane?
Teʼ Bibliaoʼ Dioseʼ ku yaʼalik: «Teneʼ Jéeobaen, letiʼe in kʼaabaʼoʼ» (xok Isaías 42:5, 8). «Jéeobaeʼ» ku taal tiʼ junpʼéel tʼaan ich hebreo. Yaʼab máak kaʼanchajaʼan u xookoʼobeʼ ku yaʼalikoʼobeʼ le kʼaabaʼaʼ u kʼáat u yaʼal «letiʼ beetik u yúuchul» (Éxodo 3:15). ¿Bix k-ojéeltik Jéeobaeʼ u kʼáat ka a kʼaj óolt u kʼaabaʼ? Tumen tu beetaj u tsʼíibtaʼal maas tiʼ 7,000 u téenel ichil le Bibliaoʼ. a Jéeoba u kʼaabaʼ le «u jaajil Dios teʼ kaʼanoʼ bey xan way luʼumeʼ» (Deuteronomio 4:39).
2. ¿Baʼax ku yaʼalik le Biblia yoʼolal Jéeobaoʼ?
Le Bibliaoʼ ku yaʼalikeʼ chéen Jéeoba u jaajil Dios ichil le u maasil diosoʼob ku adorartik wíinikoʼ. ¿Baʼaxten bey u yaʼalikoʼ? Tumen Jéeobaeʼ letiʼe «Maas Nojoch Dios yaan tu yóokʼol tuláakal le luʼumaʼ» (xok Salmo 83:18). Letiʼeʼ ‹jach yaan u poder› leloʼ ku yeʼesikeʼ jeʼel u páajtal u beetik jeʼel baʼaxakeʼ. Letiʼ «beet tuláakal baʼal», letiʼ beet le kaʼanoʼ yéetel tuláakal le baʼaloʼob kuxaʼanoʼob yaan way yóokʼol kaabeʼ (Apocalipsis 4:8, 11). Jéeobaeʼ desde úuch yanak yéetel mix bikʼin kun xuʼulul (Salmo 90:2).
UTIAʼAL A MAAS NAʼATIK
Koʼox ilik baʼaxten u kʼaabaʼ Dioseʼ maʼ igual yéetel le bix suuk u tʼaʼanal tumen uláakʼ máakoʼoboʼ. Yaan xan k-ilik baʼaxten u kʼáat ka k-kan u kʼaabaʼ yéetel bix u tsʼáaik k-ojéelte.
3. Jejeláas bix u yaʼalaʼal tiʼ Dios, pero chéen junpʼéel u kʼaabaʼ yaan
Utiaʼal a wilik u jelaʼanil u título juntúul máak yéetel u kʼaabaʼeʼ, chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼaxten maʼ igual u kʼaabaʼ máak yéetel junpʼéel títuloiʼ?
Le Bibliaoʼ ku yaʼalikeʼ le máakoʼoboʼ jach yaʼab diosoʼob ku adorarkoʼob. Xokeʼex Salmo 136:1-3, kéen tsʼoʼokkeʼ ka tsikbaltikeʼex lelaʼ:
-
¿Máax le «Maas Nojoch Diosoʼ»?
4. Jéeobaeʼ u kʼáat ka a kʼaj óolte yéetel ka a tʼan tu kʼaabaʼ
¿Baʼax eʼesik Jéeobaeʼ u kʼáat ka kʼaj óoltaʼak u kʼaabaʼ? Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
¿Baʼaxten ta tʼaan Jéeobaeʼ u kʼáat ka kʼaj óoltaʼak u kʼaabaʼ?
Jéeobaeʼ u kʼáat ka tʼaʼanak tu kʼaabaʼ tumen tuláakal máak. Xokeʼex Romanos 10:13, kéen tsʼoʼokkeʼ ka tsikbaltikeʼex lelaʼ:
-
¿Baʼaxten jach kʼaʼabéet u tʼaʼanal Dios tu kʼaabaʼ?
-
¿Bix a wuʼuyikaba kéen tʼaʼankech ta kʼaabaʼ?
-
¿Bix ta tʼaan u yuʼubikuba Jéeoba kéen a tʼan tu kʼaabaʼ?
5. Jéeobaeʼ u kʼáat ka a beetaba u amigo
Soten, juntúul koʼolel camboyaileʼ tu yaʼaleʼ u kanik máak u kʼaabaʼ Dioseʼ junpʼéel baʼal jach jatsʼuts. Chaʼanteʼex le VIDEOOʼ, kéen tsʼoʼokkeʼ ka tsikbaltikeʼex lelaʼ:
-
Jeʼex t-ilil teʼ videooʼ, ¿bix tu yuʼubiluba Soten le ka tu kanaj u kʼaabaʼ Diosoʼ?
U suukileʼ utiaʼal a biskaba yéetel wa máaxeʼ táanil kʼaʼabéet a wojéeltik u kʼaabaʼ. Xokeʼex Santiago 4:8a, kéen tsʼoʼokkeʼ ka tsikbaltikeʼex lelaʼ:
-
¿Baʼax u kʼáat Jéeoba ka a beete?
-
A tuklikeʼ, ¿jeʼel wa u yáantkech a natsʼaba yiknal Dios a kʼaj óoltik yéetel a tʼanik tu kʼaabaʼeʼ? ¿Baʼaxten bey a waʼalikoʼ?
BAʼAX SUUK U YAʼALAʼAL: «Jeʼel bixak ka a tʼan Dioseʼ deporsi juntúuliliʼ yaan».
-
A tuklikeʼ, ¿jach wa tu jaajil Jéeoba u kʼaabaʼ Dios?
-
¿Bix jeʼel a tsolik tiʼ uláakʼ máakoʼob de ke Dioseʼ u kʼáat ka k-tʼan tu kʼaabaʼ?
BAʼAX TSOʼOLI
Chéen juntúuliliʼ Dios yaan, u kʼaabaʼeʼ Jéeoba. Letiʼeʼ u kʼáat ka k-tʼan tu kʼaabaʼ utiaʼal ka k-bisba tu yéetel.
Baʼax ta kanaj
-
¿Baʼaxten Jéeobaeʼ maʼ igual yéetel le u maasil diosoʼoboʼ?
-
¿Baʼaxten unaj k-tʼanik Dios tu kʼaabaʼ?
-
¿Baʼax eʼesiktech Jéeobaeʼ u kʼáat ka a beetaba u amigo?
KAN U MAASIL
Ilawil cinco baʼaloʼob eʼesik jach tu jaajil yaan Dios.
Ilawil baʼaxten jeʼel u páajtal k-aʼalikeʼ Dioseʼ mix máak beete.
«¿Máax beetmil Dios?» (U Pʼíich Tulumil Kanan, 1 tiʼ agosto tiʼ 2014)
Kan baʼaxten kʼaʼabéet k-aʼalik u kʼaabaʼ Dios kex maʼ k-ojel bix u yaʼalaʼal kaʼachiʼ.
¿Jach wa kʼaʼabéet k-tʼanik Dios tu kʼaabaʼ? Ilawil baʼaxten k-aʼalik chéen junpʼéel u kʼaabaʼ Dios yaan.
a Teʼ jaats utiaʼal xakʼalxook 1D ku taasik le Biblia U Tʼaan Dios utiaʼal u Kajnáaliloʼob le Túumben Luʼumoʼ tiʼ ku maas tsoʼolol u kʼaabaʼ Diosiʼ yéetel baʼaxten tsʼoʼok u luʼsaʼal u kʼaabaʼ tiʼ uláakʼ bibliaʼob.