ESI ITUUGHẠ PHỌ 05
ABaibul Phọ Apamhanhạm Dom Enhaạn
AZihova ungọ iyira iikiạ inmo,—aBaibul phọ. ABaibul phọ apamhanhạm 66 ibạm arinyạ. Kuolọ eeni nạ raakia ni mọ: ‘ABaibul phọ amite ika? Anhiạn kụ amhoọgh Baibul phọ?’ Orue ophanyanhaạn asipuru phọ iphẹn phọ, ooḅeghiọn ipẹ adom mọ Enhaạn, aBaibul phọ, eru bọ iteẹny iyira.
1. Eḍighi maạr dị awe kụ ogẹ Baibul phọ, uḍighi ika kụ roḅẹm ghan bọ mọ Enhaạn kụ amhoọgh?
Isighẹ 40 awe 1,600 asiạ ogẹ aBaibul phọ omhadạn, emhiigh 1513 B.C.E. kụ esi 98 C.E. Asidọl abuphẹ ogẹ bọ Baibul phọ igbaranhaạn yogh ni. Ghalhamọ r’iduọn phọ, aBaibul phọ amoọgh ni muḅọph. Eeghe kụ iḍighi kụ iphẹn phọ edugh bọ? Loor esi dị Enhaạn kụ Amhoọgh Baibul phọ. (Ibạl 1 Tesalonikạ 2:13.) Abuphẹ ogẹ bọ Baibul phọ u/gẹ iitughiạn abidị. Kuolọ, “uwaloor iigbia ghụn kụ asiịny ghan bidị mem mọ bidị rogẹ bọ.” a (2 Pita 1:21) Enhaạn asighẹ uwaloor iigbia phọ odị kụ aphumom we ogẹ iitughiạn phọ odị.—2 Timoti 3:16.
2. Anhiạn kụ katue amooghọm suọ Baibul phọ?
“Awe oomo areelhe phọ r’arughunughun r’arunhụ r’aramạ” kotue ni omooghọm suọ iiḅi iinhaghạn phọ edi bọ siphẹ aBaibul phọ. (Ibạl Ogananami 14:6.) Enhaạn aḍighi ni idị komiteom Baibul phọ ibadị arunhụ eten dị ko/miteom ghan ḍinhọn aḍinyạ. Enighẹ oḅẹm mọ torobọ oye katue ni amoọgh Baibul phọ, etigheri ekpisi phọ aḍuạ bọ aru ḅilhẹ r’onhụ phọ raḅạ bọ.
3. Ika kụ idị aZihova aghoph Baibul phọ?
Emhiighom mọ ugẹ Baibul phọ olhọgh esi araraạr dị ketue ni eḅu, idiphọ apapyrus. Toroboiperolbọ, awe dị ophomhoghiạn Baibul phọ umhiigha ni loor osighẹ righaạgh abidị ogeọm olhọgh inhọn ariisi. Ghalhamọ r’iduọn awe dị omhoọgh iikpọ owạ bọ ni ophiemhi aBaibul phọ, abunhọn ulhọgh ni ghuḍum abidị esi ooto r’osooromhinheen oghoph. AZihova o/mheera mọ oye obobọ iyaạr ekikima nyodị oḅaanhaạn ghan ayira. ABaibul phọ aḅẹm mọ: “Ekpo-onhụ phọ Enhaạn edi ghan ni k’agee-pọ.”—Isaiah 40:8.
OLHEGHERI OBUGHẸ
Ooḅeghiọn ipẹ Enhaạn aphum bọ we ogẹ aBaibul phọ, ipẹ odị aako bọ, ḅilhẹ r’ipẹ odị aḍighi bọ idị alheeny elheeny.
4. ABaibul phọ akaạph ni ilọ oye phọ Amhoọgh bọ nyodị
Ipegh VIDIO phọ. Kụ ebạl 2 Timoti 3:16, kụ eeḅeghiọn sipuru phọ edaphạn bọ siẹn.
-
Eḍighi maạr dị awe kụ ogẹ Baibul phọ, eeghe kụ iḍighi kụ oḅẹm bọ mọ Ekpo-onhụ Enhaạn?
-
Eḍighi ni osụ olhoghi omheeraam mọ Enhaạn kụ iphum we mọ ogẹ iitughiạn odị?
5. ABaibul phọ akpạr ri apu isophoghom
Eḍighi maạr dị aBaibul phọ aḍighi ni Ekpo-onhụ Enhaạn, yira oḍuom ni olhoghi mọ odị k’akoph ni. Iphirigba eḍeenhaan ni mọ awe dị omhoọgh iikpọ mokparaghạ ni ophiemhi aBaibul phọ. Abuḍiemhiom aruukụ iiḅereghị ukparaghạ ghan ni aaghị. Kuolọ etigheri isophoghom mọ r’ipaarọgh aḍuugh phọ, ibadị awe ulhọgh ni ghuḍum abidị esi ooto r’osooromhinheen oghoph aBaibul phọ. Olhegheri ilọ oniin onyọ abuẹn phọ, ipegh VIDIO phọ, kụ eeḅeghiọn sipuru phọ edaphạn bọ siẹn.
-
Nyiidiphọ nạ malhegheri bọ rikiạ dị awe ophinyọn oghoph aBaibul phọ, enyu ni nyinhạ aạl ḍughụm? Eeghe kụ iḍighi?
Ibạl Psalm 119:97, kụ eeḅeghiọn ḍipuru phọ aḍiẹn:
-
Eeghe kụ inyu bọ ibadị olhọgh aghuḍum abidị esi ooto r’osooromhinheen orue ogbạ kụ oḅilhẹ olheenye elheeny Baibul phọ?
6. Aḍinyạ oomo awe
Odaphạn iphirigba, aḍinhọn aḍinyạ i/lo dị mogbạ oḅilhẹ olheenye elheeny idiphọ aBaibul phọ. Ibạl Iiḍighi 10:34, 35, kụ eeḅeghiọn sipuru phọ iphẹn:
-
Eeghe kụ iḍighi kụ Enhaạn rawạ bọ dị kogbạ Ekpo-onhụ phọ odị oleenye elheeny?
-
Eeghe iyaạr ilọ aBaibul phọ kụ iḅeeraạn nyinhạ?
Enighẹ oḅẹm mọ
oomo
awe aḅirinhi phọ
kotue ni oteẹny Baibul phọ onhụ dị bidị kotue onaghanhạn
Momiteom ni runhụ dị epel li
3,000
pakirị obobọ okpom mọ
5,000,000,000
asị-Baibul kụ edị momiteom,
aḍinhọn aḍinyạ omaanhiọm i/lo
ABUNIIN AWE OOTUGHIẠN MỌ: “ABaibul phọ aḍighi oopho aḍigbaany aḍinyạ dị awe ogẹ bịn.”
-
Nạ aatughiạn aani ika?
-
Ighẹn araraạr kụ imạ eḍeenhaan mọ aBaibul phọ Ekpo-onhụ Enhaạn?
OGHAẠPH OOKARAGH
ABaibul phọ Ekpo-onhụ Enhaạn, kụ odị maḍighi ni idị malheeny elheeny.
Ooḅula
-
Remạ ghan eeghe mem dị oḅẹm mọ Enhaạn kụ iphum we ogẹ aBaibul phọ?
-
Eeghe iyaạr ilọ araraạr phọ ipẹ aBaibul phọ makpạr bọ apu, eten phọ epẹ mogbạ bọ oḅilhẹ olheenye elheeny kụ iḍighan elhegh esi anạ?
-
Nạ amiịn ika Enhaạn nyiidiphọ nạ malhegheri bọ ikuph phọ odị alhọgh bọ oḅaanhaạn anạ?
WAAGHỊ AMHIỊN
Bạl amhiịn ipẹ yira oteẹny bọ Baibul phọ ogẹ bọ runhụ phọ arodon.
Tuughạ alhegheri ipẹ aBaibul phọ akpạr bọ apu iraạr igbogh araraạr dị mipiemhi.
“Ipẹ ABaibul Phọ Akpạr Bọ Apu Isophoghom” (The Watchtower No. 4 2016)
Miịn idị awe olhọgh ghuḍum abidị esi ooto r’osooromhinheen orue ogbạ aBaibul phọ.
Mogeeghị ni oḅilhẹ ogbaaghị Baibul phọ ibadị amem. Ika kụ idị nạ katue bọ akuphom owol mọ u/nme dom mọ?
a Iduọn yira komiịn bọ ni Esi Ituughạ Phọ 07, uwaloor iigbia phọ aḍighi iikpọ dị Enhaạn raḍighinhom ghan oḍighi.