Gyehova ɩva akyɛdɩ sʋnʋnkʋ̃ be ɩma yɛ​—ɩdɩ awuuku ngyɩkɩ̃ɩ̃ ngyɩkɩ̃ɩ̃ 66 mɔɔ bɛhã bɔwɔ numɔ bɛyɛ yɩ ɔkʋ̃, na mɛyɩ yɛ lɛ Bayɩbʋlʋ yɩ. Naasʋ̃ ebiye a ekeɣizia kɛɛ: ‘Kɛ ɩyɛlɩ mɔɔ yɛ sa ɩhanlɩ Bayɩbʋlʋ yɩ a? Na aninyia yɛ ɩhɛlɛlɩ a?’ Mɔɔ ɩkɛyɛ na yɛanwʋ munwalɩyɛ nɩ, má yezunzu mɔɔ ɩyɛlɩ mɔɔ yɛ sa ɩhanlɩ Nyamɩnlɩ yɩ odwokɔ mɔɔ ɩwɔ Bayɩbʋlʋ yi nu nɩ nwʋ.

1. Sɛ mmenii yɛ bɛhɛlɛlɩ Bayɩbʋlʋ yɩ a, mɩnla ti mɔɔ yɛkã kɛɛ ɩzʋ̃ Nyamɩnlɩ yɩ ɛkɛ a?

Mmenii kɛyɛ 40 yɛ bɛvalɩ alʋbɔ kɛyɛ 1,600 bɛhɛlɛlɩ Bayɩbʋlʋ yɩ a, bɔwɔlɩ yɩ tʋ kɛyɛ 1513 A.Y.M. nu, na bowieli kɛyɛ ɔlʋbɔ 98 Y.M. nu. Na nɩ ɛhɛlɛlɛmaa nɩ bo nu be bɛdɩ mmuwuanɩzʋhilalɛmaa, mfalɩmaa, nɩɩ awulombunli. Naasʋ̃ Bayɩbʋlʋ yi nu ndwokɔ munwala iyiyia. Kɛ ɩyɛlɩ mɔɔ eyi ɩyɛlɩ bʋwɔ a? Iluwakɛɛ Bayɩbʋlʋ yi nu ndwokɔ ɩzʋ̃ Nyamɩnlɩ yɩ ɛkɛ. (Kɩnga 1 Tɛsalonikamaa 2:​13.) Ɛhɛlɛlɛmaa nɩ bɛákɛlɛ bɛzabɛ be ti nu ndwokɔ. Mfomi, “sunzuma nwanzanwanza nɩ yɛ ɩɣalɩ nkɔmɩhyɛmaa nɩ mmɔ bɔ zʋ ɩma bɛhanlɩ ɔzɔ ndwokɔ nɩ mɔɔ bɔzʋ̃ Nyamɩnlɩ yɩ ɛkɛnɩ nɩ a.” a (2 Pita 1:​21) Nyamɩnlɩ ɩvalɩ yɩ sunzuma nwanzanwanza nɩ ɩhanlɩ mmenyia nɩ ma bɛhɛlɛlɩ yɩ nzunzunlɩyɛ.​—2 Timoti 3:16.

2. Aninyia yɛ ɩkɔhʋla ikenyia Bayɩbʋlʋ yɩ zʋ mfasʋ a?

Odwokɔba mɔɔ yɛnwʋ yɩ wɔ Bayɩbʋlʋ yi nu nɩ, “manlɩ bela, abusunwa bela nɩɩ ɛdɩndɛlɛ bela nɩɩ mmenii bela” bɔkɔhʋla bekenyia ɔzʋlɔ mfasʋ. (Kɩnga Yikile 14:6.) Nyamɩnlɩ ɩma yɛ sa ɩhã Bayɩbʋlʋ yɩ wɔ ɛdɩndɛlɛ azʋlɔtʋ sʋ̃maa nu ɩdɛla buuku bela mɔɔ ɩɣa ɩzɩ̃ ɩhɔ wɔ adasamaa bɛ abakɔsɛmɩ nu. Nnɛ, ɩávalɩ nwʋmɔ dɩka mɔɔ mmenii da anzɛnyɩɩ ɛdɩndɛlɛ mɔɔ bɛkã nɩ, bo nu sʋ̃maa nɩ la wɔ Bayɩbʋlʋ yɩ be.

3. Mɩnla ɔhʋanɩ zʋ yɛ Gyehova ɩwɔ Bayɩbʋlʋ yɩ nwʋ banɩ a?

Bɛhɛlɛlɩ Bayɩbʋlʋ yɩ wɔ nninyeni be dɩkɛɛ ɛnlamɩ ɔnwʋma nɩɩ ɔwɔkɩ kɛlɛta be mɔɔ bɔfʋlɔ yɩ kɛɛ papyrus zʋ. Naasʋ̃ iluwakɛɛ ɔzɔ nninyeni yi ɩáhyɛ na bɛazɩkɛ nɩ ti, mmenyia mɔɔ nɩ bɔwɔ ɔlɔlɛ bɛma Nyamɩnlɩ yɩ odwokɔ nɩ, behilalɩ ɔzʋlɔ bɛhɛlɛlɩ ebiye pɛpɛɛpɛ. Ɩwɔ numɔ kɛɛ mmenii be mɔɔ bɔwɔ tumi bɔwɔlɩ mmɔdɩnɩ kɛɛ bɛkɛzɩkɛ Bayɩbʋlʋ yɩ dɩyɛ, naasʋ̃ abiyemmɔ bɛvalɩ bɔ nnwʋanlɩ bedianlɩ asianɩ nu bɛva bɔwɔlɩ Bayɩbʋlʋ yɩ nwʋ banɩ. Gyehova ɩáma dɩyɛ bela anzɛnyɩɩ enii bela isi yɩ ɔhʋanɩ kɛɛ ikoluwa Bayɩbʋlʋ yɩ zʋ ɩ nɩɩ yɛ kɛdɩndɛ. Bayɩbʋlʋ yɩ ɩkã kɛɛ: “Yɛ Nyamɩnlɩ yɩ odwokɔ idimi ɛkɛnɩ eɣile bela.”​—Ayɩzaya 40:8.

 SUMÁ SƲ̃MAA

5. Bɛákʋla bɛsɩkɛ Bayɩbʋlʋ yɩ

 6. Buuku mɔɔ abiyela ɩkʋla inyia ɔzʋlɔ mfasʋ

Bayɩbʋlʋ yɛ ɩdɩ buuku mɔɔ behile yɩ tʋ na bɛhyɩhyɛ yɩ sʋ̃maa bɛdɛla buuku bela wɔ abakɔsɛmɩ nu a. Kɩnga Egyima 10:​34, 35, na akʋ̃ bozunzú ndwokɔɣizialɛ eyimmɔ nwʋ:

• Mɩnla ti mɔɔ Nyamɩnlɩ ɩpɛ kɛɛ bekile Bayɩbʋlʋ yɩ tʋ na bɛkyɩkyɛ yɩ sʋ̃maa?

• Mɩnla yɛ wʋ anyɩ ideli nwʋmɔ wɔ Bayɩbʋlʋ yɩ nwʋ a?

 YƖ DƆKƆWƆLƐ

Bayɩbʋlʋ yɩ ɩdɩ Nyamɩnlɩ Odwokɔ, na ihila kɛɛ mmenii munwala bɛ sa ɩkɛhã ebiye.

Kɛ Okowuwa Ekeze a?

• Sɛ bɛkã kɛɛ Nyamɩnlɩ ɩvalɩ yɩ sunzuma ɩhanlɩ mmenii ma bɛhɛlɛlɩ Bayɩbʋlʋ yɩ a, kɛ yɩ tʋ ikile a?

• Kezimɔ bɔwɔlɩ Bayɩbʋlʋ yɩ nwʋ banɩ, bekile yɩ tʋ, na bɛkyɩkyɛ nɩ, kɛ ɩkã wʋ ise a?

• Kakɩ mɔɔ ɛɣa ɔnwʋ mmɔdɩnɩ mɔɔ Nyamɩnlɩ ɩwɔ kɛɛ ikoluwa Bayɩbʋlʋ yɩ zʋ ɩ nɩɩ wʋ kɛdɩndɛ nɩ, kɛ ɩma ɛtɩ nɣanlɩ ese a?