PONJI MIR 05
Biblia tie Lembe pa Mungu piwa wa dhanu
Yehova umiyo iwa giramiya ma ber dit ma julwong’o Biblia. I iye, junwang’u buku ma tung’ tung’ pier abusiel wi abusiel (66). Re saa moko nyo ibepenjiri nia, ‘Bibliane utundo i bang’wa wa dhanu nenedi?’ Pi ninwang’u dwokowang’ penji maeno, wakenen kite ma Biblia ma Lembe pa Mungu utundo ko i bang’wa.
1. Ka dhanu re m’ukiewo Biblia, pirang’o juyero nia eai i bang’ Mungu?
Dhanu ma romo pier ang’wen (40) kumeni re ma gikiewo Biblia, ke pi oro ceng’ini elufu acel ku dak abusiel (1 600). Kiewne ucaku i oro elufu acel dak abic kud apar adek (1513) i wang’ nyoliri pa Yesu, man ebin ethum i kum oro pier abung’wen wi abora (98) i ng’ei nyoliri pa Yesu. Gibino dhanu mi suru ma tung’ tung’; jumoko ubino judwarnam, jukwac man rwodhi. Ento gin ceke gikiewo lembe m’urombo. Lembuno ucopere nenedi? Etuc nicopere pilembe Won Bibliane utie Mungu, niwacu lembe mi iye uai i bang’e. (Som 1 Juthesaloniki 2:13.) Ju m’ukiewo Biblia gikiewo ngo paru migi gigi. Ento ‘giyero lembe m’uai i bang’ Mungu pilembe tipo ma leng’ re m’ubino cwalugi.’ a (2 Pethro 1:21) Mungu utiyo ku tipo ma leng’ pare pi niyuyo iwi dhanu, kunoke nicwalugi kara gikiew paru ma pare en.—2 Timoteo 3:16.
2. Wend dhanu ma rukani ma romo nwang’u Biblia?
‘Thek ceke ku suru ku dhok man kodhi dhanu’ gicopo nwang’u kony ni kum lembanyong’a m’i Biblia. (Som Lembanyutha 14:6.) Tin, Biblia nwang’ere i dhok dupa dit nisagu buku mange ceke m’udaru wok niai con. Kago dhanu ceke m’i ng’om gicopo nwang’u Biblia, kadok gibedo kani kunoke giweco dhok ma kani.
3. Yehova ugwoko Biblia cil tin eni nenedi?
Ku kwong’a, jukejukiewo lembe mi Biblia iwi piny moko ma vuto ngo akeca, calu ve adila man kolo. Ento dhanu moko ma gimaru Biblia gidok giloke ku cing’gi iwi karatasi ma cuu. Kadok jubim ku judong dini moko giyenyo ginyoth Biblia cen de, re dhanu moko gilund gibedo ayika niketho kadok kwo migi i ariti pi nigwoko Biblia. Yehova uyiyo ngo nyanok de nia ng’atu moko kadi gin moko ucer lembe pare ku tundo i bang’wa. Biblia yero kumae: “Lembe pa Mungu mwa bicungo mi nja.”—Isaya 40:8.
MED NYANG’ PERI
Wakenen kawoni lembe mange ma bimedo ng’eyong’ec peri iwi kite ma Mungu utelo ko wi dhanu kara gikiew Biblia, kite m’egwoko ko Bibliane, man kite m’enyaye ko pi dhanu ceke.
4. Biblia unyutho en gire nia Won utie ng’a
Nen VIDEO. I ng’eye, som 2 Timoteo 3:16, man i ng’eye wuwec iwi penji m’ulubo e.
-
Ka dhanu re m’ukiewo Biblia, pirang’o ke julwong’e nia Lembe pa Mungu?
-
Nyo ecicopere andha nia Mungu utii ku dhanu pi nikiewo paru pare? Kekor.
Icopo kwayu ng’atu mange ukiew barua peri, re nwang’u lembe mi baruane utie peri in, ento pa jakiew ungo. Mungu bende uketho dhanu gikiewo Biblia, re lembe mi iye uai i bang’ Mungu en gire
5. Biblia utie asu kadok jugam jumito nidaru there de
Calu Biblia uai i bang’ Mungu, Mungu utimo kero nigwoke kara kud erwiny. Nenedi? I kind rundi dupa m’ukadhu, jubim moko mi ng’om eni gibed gitimo kero migi ceke pi nidaru the Biblia cen. Judong dini ke gibed gimito ngo nia dhanu usome asoma de. Re kadok jai ubedo nuti de, man kadok i wang’ ariti mi tho, dhanu dupa gitimo kero pi nigwoko Biblia. Pi ning’eyo ng’atune moko acel m’i kindgi, Nen VIDEO, man i ng’eye wuwec iwi penji m’ulubo e.
-
Calu m’ing’eyo nia karaman dhanu moko gibino ayika nitho athoa zoo pi nigwoko Biblia, nyo iromo maru ngo nisome kud ava? Pirang’o?
Som Zaburi 119:97, man i ng’eye wuwec iwi penji m’ulubo e:
-
Ang’o m’ucwalu dhanu dupa niloko Biblia i dhok mange man nipoke kadok ging’eyo nia jubinegogi de?
6. Biblia tie pi kwond dhanu ceke
Niai con, Biblia re m’utie buku ma juloko i dhok dupa nisagu man ma nwang’ere i bang’ dhanu dupa nisagu. Som Tic mi Jukwenda 10:34, 35, man i ng’eye wuwec iwi penji m’ulubo e:
-
Pirang’o Mungu ubemito nia julok lembe pare i dhok dupa akeca man nia dhanu ma pol ubed kude?
-
Lembang’o ma bewang’u ii nisagu i kum Biblia?
Kago
dhanu ceke
mi ng’om
romo nwang’u Biblia i dhok moko kokoro ma ginyang’ i iye
Biblia nwang’ere i dhok ma kadhu
3 000
Biblia
ma zoone kunoke thenge moko
Wend Biblia ma ve judaru wodho i ng’om zoo utie
5 000 000 000
Buku mange mbe acel de ma juwodho thorukeno
DHANU MOKO BEYERO KUMAE: “Biblia tie buku m’udaru tii man ma dhanu ukiewo gin.”
-
In ke paru peri tie ang’o?
-
Ang’o m’ubenyutho nia Biblia tie andha Lembe pa Mungu?
I ADUNDO
Biblia utie andhandha Lembe pa Mungu, man dhanu ceke romo nwang’e.
Penji mi poyowic
-
Ka jubeyero nia Mungu uyuyo iwi dhanu m’ukiewo Biblia, thelembene tie ang’o?
-
Lembang’o ma waponjo m’ubewang’u ii i kum Biblia?
-
Mungu utimo kero ma lee dit kara ituc ning’eyo lembe pare. Lembuno uketho ibewinjiri nenedi?
TIM SAYUSAC
Som kpawa m’unyutho kite ma Biblia ugwokere ko niai i gorne ma con nitundo ma juloke ko i dhok dupa ma tin eni.
“Kite ma Biblia utundo ko cil i nindo mwa eni” (Cew!, dwi mir 11, 2007)
Nen kite ma Biblia uboth ko kud i lembe adek ma nwang’u romo nego there cen.
Kenen ariti ma jumoko unwang’iri ko pi niloko Biblia i dhok mange.
Juloko Biblia iwi karatasi man i dhok mange wang’ dupa dit. Re pirang’o cwinywa romo bedo tek nia lembe mi iye udong’ asu kubang’e?
“Nyo juwilo kunoke junyotho lembe mi Biblia?” (Thiwiwec mi jw.org)
a Calu ma wabineno i Ponji mir 07, tipo ma leng’ utie tego pa Mungu m’etimo ko tic.
