5 YATICHÄWI
Diosan arunakapajj Biblian qellqatawa
Bibliajja Jehová Diosan mä suma regalopawa, 66 libronakanirakiwa. Ukampis inas jumajj akham jisktʼassta: “¿Kunjamatsa Bibliajj utjawayi? ¿Khitis Biblia qellqayäna?” sasa. Uka jisktʼanakar qhanañchañatakejja, kunjamatsa Diosan arunakapajj jichhakam utjaskaki uk nayraqat yatjjatañäni.
1. Jaqenakas Biblia qellqapkchïnjja, ¿kunatsa Diosaw Biblia qellqayäna sasin sissna?
Kunayman trabajonakani, wali utjirini jukʼa utjirini 40 chachanakaw Biblia qellqawayapjje. Bibliajja 1513 antes de Cristo maranwa qellqañ qalltasïna, 98 después de Cristo maranwa tukuyasirakïna. Ukhamasti 1.600 maranakanwa taqpach Bibliajj qellqasïna. Ukhamäkchisa Bibliajj janiw may may parlkiti. ¿Kunatsa ukham sistanjja? Kuna laykutejj Diosaw Biblia qellqayäna (1 Tesalonicenses 2:13 liytʼäta). Biblia qellqer chachanakajj janiw pachpa amuyunakap qellqapkänti, jan ukasti ‘espíritu santon yanaptʼapampiw Diosat parlapjjäna’ (2 Pedro 1:21). a Diosajj espíritu santopampiw uka chachanakar amuytʼayäna, ukhamat jupan amuyunakap Bibliar qellqapjjañapataki (2 Timoteo 3:16).
2. ¿Khitinakarus Bibliajj yanaptʼaspa?
Biblian utjki uka suma yatiyäwinakajja ‘taqe markankirinakaru, tribunkirinakaru kunayman parlani jaqenakaru, kunayman kasta jaqenakaruw’ yanaptʼaspa (Apocalipsis 14:6 liytʼäta). Diosaw walja arunakar Biblia traducisiñapatakejj yanaptʼawayi, cheqas yaqha libronakat sipansa Bibliakiw walja arunakar traducitajja. Kawkjansay maynejj jakaskpan kuna arsay parlaskpan niya taqeniw Biblia liytʼapjjaspa.
3. ¿Kunjamsa Jehová Diosajj jan walinakat Bibliar jarkʼaqawayi?
Bibliajja lipʼichit lurat rollonakaru jan ukajj papiro alit lurat rollonakaruw qellqasïna, ukanakajj janiw jaya tiempo aguantirïkänti. Ukampis Bibliar wal munasiri chachanakajja, uka qellqatanakat walja copianakwa lurapjjäna, jupanakajj wali amuyumpiw copiapjjäna. Wali munañani walja jaqenakas Biblia chhaqtayañ munapkchïnjja, yaqhepajj Biblia jarkʼaqañ laykojj vidap aptʼasiñs janiw ajjsarapkänti. Jehová Diosan jiwasar Biblia toqe parlañapatakejja, janiw kunasa ni khitisa jarkʼawaykiti. Bibliajj akham siwa: “Diosasan arupajj wiñayatakiwa” sasa (Isaías 40:8).
JUKʼAMP YATJJATAÑÄNI
Jehová Diosajj kunjamsa espíritu santopampi amuytʼayasajj mä qhawqha chachanakar Biblia qellqayäna, kunjamsa jan walinakat Bibliar jarkʼaqäna, kunsa jaqenakan Biblianïpjjañapatakejj luräna uka toqenakatwa jichhajj jukʼamp yatjjatañäni.
4. ¿Bibliajj khitin qellqayatasa?
VIDEO uñtapjjäta. Ukatjja 2 Timoteo 3:16 liytʼasajja aka toqetwa parltʼapjjäta:
-
Niyakejjay Bibliajj jaqenakan qellqatächejja, ¿kunatsa Diosan Arupawa sasin sissna?
-
Diosajj amuyunakap qellqapjjañapatakejj jaqenakaruw amuytʼayäna, ¿ukajj cheqaw sasmati?
Secretarios carta qellqkchejja, kuntï jefepajj siski uka arunakwa qellqe. Bibliajj ukhamarakiw lurasïna, jaqenakas qellqapkchïnjja jupanakajj Diosan arunakapwa qellqapjjäna.
5. Biblia chhaqtayañsa munapkchïnjja jichhakamajj utjaskakiwa
Niyakejjay Bibliajj Diosan qellqayatächejja jupaw Biblia jarkʼaqe. Nayratpachaw walja gobernantenakajj Biblia chhaqtayañ munapjjäna. Janiw ukakïkiti, religión pʼeqtʼirinakasa janiw jaqenakan Biblia liyipjjañap munapkänti. Ukampis enemigonakapan jarkʼatpachasa jiwayapjjämaw satpachasa, waljaniw vidap aptʼasirjam Biblia jarkʼaqapjjäna. Uka chachanakat maynir uñtʼañatakejja VIDEO uñtapjjäta, ukatjja aka toqetwa parltʼapjjäta:
-
Biblia jarkʼaqañatak wal chʼamachasipjjatap yatisajja, ¿janit jukʼamp liytʼañ munkasma? ¿Kunatsa ukham amuyta?
Salmo 119:97 liytʼasajja aka toqetwa parltʼapjjäta:
-
Biblia traduciñatakisa jaqenakar Biblia churañatakisa, ¿kunatsa waljanejj vidap aptʼasirjamäkasas chʼamachasipjjäna?
6. Bibliajj taqe jaqenakatakiwa
Yaqha libronakat sipansa Bibliaw jukʼamp arunakar traducisiwayi, jaqenakarus lakirasiwayaraki. Hechos 10:34, 35 liytʼasajja aka toqetwa parltʼapjjäta:
-
¿Kunatsa Diosajj Biblia walja arunakar traducisiñapsa taqe jaqenakar churasiñapsa muni?
-
¿Kunas jumarojj Bibliat musparaytamjja?
Niya taqeniw
parlapki uka arut
Biblia liytʼapjjaspa.
3.000
jila arunakanwa
mä partesa jan ukajj phoqatpachas Bibliajj utji.
Niya 5.000 millón
Biblianakaw imprimisiwayi.
Janiw yaqha librojj ukham waljajj imprimisiwaykiti.
YAQHEPANAKAJJ AKHAM SAPJJEWA: “Bibliajj jaqenakan qellqat nayra librokiwa” sasa.
-
¿Kunsa jumajj uka toqet amuyta?
-
¿Kunanakas Bibliajj Diosan Arupätap uñachtʼayi?
¿KUNSA YATEQAWAYTAN?
Bibliajj Diosan Arupawa, Diosarakiw taqe jaqenakan Biblianïpjjañapatakejj yanaptʼawayi.
Amtañataki
-
Diosaw jaqenakarojj Biblia qellqapjjañapatakejj amuytʼayäna, ¿ukajj kamsañsa muni?
-
Aka yatichäwin yateqawayktan ukarjamajja, ¿kunas Bibliat wal musparaytamjja?
-
¿Kunanaksa Diosajj Biblia toqe jumamp parlañatakejj lurawayi? ¿Kunjamakis uk yatisajj jikjjatasta?
JUKʼAMP YATJJATAÑAMATAKI
Kunjamsa Bibliajj qellqasïna, jichha tiempokamas utjaskaki uka toqet yatjjatam.
Kimsa jan walinakan uñjaskasasa, kunjamsa Bibliajj jan chhaqtawayki uka toqet yatjjatam.
“Bibliajj janiw chhaqtayasiwaykiti” (Yatiyañataki pusïri 2016)
Biblia traduciñ laykojj kuna jan walinakansa yaqhep jaqenakajj uñjasipjjäna uk videon uñtam.
Bibliat copiatanakasa yaqha arur traducitanakas waljaw utji. ¿Kunatsa Diosan arupajj janiw mayjtʼayasiwaykiti sasin sasma?
“¿Se ha cambiado o manipulado la Biblia?” (Artículo de jw.org)
a Kunjamtï 7 yatichäwin qhanañchaskejja, espíritu santojj Diosan chʼamapawa.
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
