LIKE SUANLƐ 05
Biblu’n ti Ɲanmiɛn i nuan ndɛ
Zoova cɛli e like dan kun. Like sɔ’n yɛle Biblu’n. Ɔ ti fluwa 66 mɔ be kan boli nun-ɔn. ?Sanngɛ a kwla usa ɔ wun kɛ ɔ yoli sɛ yɛ e ɲannin Biblu’n niɔn? ?I nun ndɛ’n fin wan? Maan e fa e ɲin sie i kosan sɔ’m be su kunngunngun.
1. ?Kɛ mɔ klɔ sran mun yɛ be klɛli Biblu’n, ngue ti yɛ e se kɛ ɔ fin Ɲanmiɛn-ɔn?
Sran kɔe 40 yɛ be klɛli Biblu’n niɔn. I klɛlɛ’n dili afuɛ 1.600. Be boli i bo afuɛ 1513 K.N.K. a nun yɛ ɔ wieli afuɛ 98 nun. Be nga be klɛli Biblu’n be ti sran fanunfanun. Sanngɛ Biblu’n i nun ndɛ’m be sansanman be wun. ?Wafa sɛ yɛ i sɔ’n kwla yo ye-ɔ? Kɛ m’ɔ fin Ɲanmiɛn’n ti-ɔ. (Kanngan 1 Tesalonikifuɛ Mun 2:13 nun.) Biblu’n i klɛfuɛ’m b’a klɛman be bɔbɔ be klun ndɛ. Sanngɛ “Ɲanmiɛn bɔbɔ yɛ ɔ fɛli i ndɛ’n wlali be nuan yɛ be kannin-ɔn. Kɛ bé yó sɔ’n, nn Ɲanmiɛn wawɛ’n b wo be su.” (2 Piɛli 1:21) Ɲanmiɛn fɛli i wawɛ’n mannin sran mun naan be kwla klɛ i nuan ndɛ’n.—2 Timote 3:16.
2. ?Wan yɛ Biblu’n kwla yo i ye-ɔ?
Biblu’n nun jasin fɛ’n kwla yo “be nga be o mɛnmɛn kwlaa nun’n, ɔ nin be nga be fin akpasuaakpasua kwlaa su’n nin be nga be kan aniɛn wafawafa kwlaa’n, ɔ nin sran wafawafa kwlaa” be ye. (Kanngan Sa Nglo Yilɛ 14:6 nun.) Ɲanmiɛn yoli maan be yili Biblu’n aniɛn kpanngban nun trali fluwa kwlaa. Ɔ maan andɛ’n, be flɛ i kɛ sran ngba kwla ɲan Biblu’n. Kan kwlaa nga sran’m be tran’n kannzɛ bɔbɔ be aniɛn’n ti sɛ ti sɛ-o be kwla ɲan Biblu’n wie.
3. ?Ngue yɛ Zoova yoli naan Biblu’n w’a ka lɛ titi-ɔ?
I klikli nun’n, ninnge nga be su yɛ be klɛli Biblu’n be cɛman. I wie yɛle kɛ be klɛli i nun ndɛ’n wie nnɛn kplo annzɛ papirisi su. Sanngɛ sran wie mɔ be klo Biblu’n, be niannin klikli liɛ nga be klɛli’n su sɛsɛsɛ be klɛli uflɛ wie mun be sa nun. Sran wie mɔ be le kwlalɛ’n, be kunndɛli kɛ bé núnnún Biblu’n i osu mlɔnmlɔn. Sanngɛ sran wie’m be sɛsɛli i. I sɔ yolɛ nun’n be fali be nguan’n sieli i wie nuan. Zoova w’a manman sran fi annzɛ like fi atin naan ɔ tɛnndɛn i ɲrun naan w’a kwlá kanman ndɛ w’a kleman e. Biblu’n se kɛ “Ɲanmiɛn i ndɛ’n wo lɛ tititi.”—Ezai 40:8.
SI NDƐ’N NUN KPA EKUN
Ɲanmiɛn fɛli i wawɛ’n mannin klɔ sran mun naan b’a kwla klɛ Biblu’n. Ɔ yoli maan Biblu’n kali lɛ titi, yɛ sran kwlaa kwla ɲan wie.
4. Sran nga Biblu’n fin i’n
An bo VIDEO’N. Kpɛkun an kanngan 2 Timote 3:16 nun, i sin’n an koko kosan yɛ’m be su yalɛ:
-
?Kɛ mɔ klɔ sran mun yɛ be klɛli Biblu’n, ngue ti yɛ be flɛ i kɛ Ɲanmiɛn Ndɛ-ɔ?
-
?A lafi su kɛ Ɲanmiɛn yɛ ɔ kannin ndɛ kleli sran mun yɛ be klɛli-ɔ?
Sran kun kwla kan ndɛ kle sran uflɛ kɛ ɔ klɛ. I wafa kunngba’n, klɔ sran mun yɛ be klɛli Biblu’n niɔn, sanngɛ i nun ndɛ’n fin Ɲanmiɛn.
5. Biblu’n kali lɛ titi
Kɛ mɔ Biblu’n fin Ɲanmiɛn’n ti’n, ɔ yoli maan ɔ kali lɛ titi. Kɛ ɔ fɛ i laa lele’n, sran wie mɔ be le kwlalɛ’n be kunndɛli kɛ bé yó naan sran’m b’a ɲanman Biblu’n. Ɲanmiɛn sulɛ wafa’m be su kpɛn’m be kunndɛli kɛ bé yó naan ɔ ka be ngunmin be sa nun. Kannzɛ bɔbɔ be kleli sran’m be yalɛ, yɛ be kunndɛli kɛ bé kún be’n, sanngɛ sran kpanngban be fali be nguan’n sieli i wie nuan naan Biblu’n w’a kwla ka lɛ titi. Sɛ ɔ waan á sí sran sɔ’m be nun kun i su ndɛ’n an bo VIDEO’N. I sin’n an koko kosan yɛ’m be su yalɛ:
-
?Kɛ a bu like nga sran’m be yoli naan Biblu’n w’a ka lɛ titi’n i akunndan’n, ngue yɛ a kunndɛ kɛ á yó-ɔ? ?Ngue ti-ɔ?
An Kanngan Jue Mun 119:97 nun, i sin’n an koko kosan yɛ’n i su yalɛ:
-
?Ngue ti yɛ sran’m be fali be nguan’n sieli i wie nuan be kacili Biblu’n aniɛn wie’m be nun naan sran’m b’a kwla ɲan wie-ɔ?
6. Fluwa kun m’ɔ ti sran’m be kwlaa be liɛ’n
Kɛ ɔ fɛ i laa lele’n, be kacili Biblu’n aniɛn kpanngban nun yɛ be kwla ɲɛn i lika kpanngban nun tra fluwa onga mun. An kanngan Sa Nga Be Yoli’n 10:34, 35 nun. I sin’n an koko kosan yɛ’m be su yalɛ:
-
?Ngue ti yɛ Ɲanmiɛn kunndɛli kɛ be kaci i nuan ndɛ’n aniɛn kpanngban nun naan sran kwlaa ɲan wie-ɔ?
-
?Biblu’n i su ndɛ benin yɛ ɔ yo ɔ fɛ kpa-ɔ?
Be flɛ i kɛ asiɛ
wunmuan’n
sufuɛ mun
be kwla ɲan Biblu’n aniɛn nga be ti’n nun.
B’a yi
i wunmuan’n annzɛ i bue
aniɛnaniɛn
3.000
tra su nun.
Nga b’a yi’n ɔ kwla ju
5.000.000.000
Ɔ sɔnnin tra fluwa onga’m be kwlaa.
SRAN WIE’M BE WAAN: “Biblu’n ti lalafuɛ fluwa ngbɛn, ɔ fin klɔ sran mun.”
-
?A bu ndɛ sɔ’n i sɛ?
-
?Ngue yɛ ɔ kle kɛ Biblu’n ti Ɲanmiɛn i nuan ndɛ-ɔ?
NDƐ’N I KPƆLƐ BOLƐ
Biblu’n ti Ɲanmiɛn i nuan ndɛ, yɛ Ɲanmiɛn yoli maan klɔ sran’m be kwlaa be kwla ɲan wie.
Ndɛ’n i nun flanlɛ
-
?Kɛ be se kɛ Ɲanmiɛn fɛli i wawɛ’n mannin sran mun yɛ be klɛli Biblu’n, i bo’n yɛle benin?
-
?Biblu’n i sasalɛ’n nin i kacilɛ aniɛn kpanngban nun’n, ɔ nin i trulɛ mɔ w’a tru’n be su ndɛ nga e kannin’n, benin yɛ ɔ yo ɔ fɛ kpa-ɔ?
-
?Kɛ a wun kɛ Ɲanmiɛn yoli i kwlaa sɔ’n naan w’a kwla kan ndɛ w’a kle wɔ’n, i sɔ’n yo wɔ sɛ?
NDƐ WIE MUN EKUN
Biblu’n i su ndɛ: Kɛ ɔ fɛ i blɛ mɔ be boli i klɛli bo lele m’ɔ́ fá jú andɛ’n.
Like nsan mɔ sran’m be yoli naan b’a nunnun Biblu’n i osu mlɔnmlɔn’n.
Ninnge wie mɔ sran wie’m be miannin be ɲin be yoli naan b’a kwla kaci Biblu’n aniɛn uflɛ nun’n.
Sran wie’m be niannin Biblu nga i klikli nun’n be klɛli’n su sɛsɛsɛ be klɛli i uflɛ, yɛ be kacili i aniɛn uflɛ nun kpɛ sunman. ?É yó sɛ naan y’a si kɛ i nun ndɛ’n w’a kaciman?
a K.N.K. i bo’n yɛle, ka naan Klisifuɛ’m be blɛ’n w’a ju.
b Ɲanmiɛn i wawɛ’n yɛle i wunmiɛn m’ɔ fa di junman’n. É wá kɛ́n i ndɛ like suanlɛ 07 nun.
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
