ISAMBILILO 05
Baibolo Citabo Umwaba Amashiwi Ayo Lesa Atulembela
Baibolo bupe ubusuma nga nshi ubo Yehova atupeela, umwaba amabuuku ayanono 66. Nomba nalimo kuti mwayipusha amuti: ‘Bushe Baibolo yaishilebako shani? Nani umwine wa fyebo fyaba mu Baibolo?’ Pa kuti twasuke aya mepusho, lekeni tumone ifyo cali pa kuti fwe bantunse tukwate Baibolo umwaba amashiwi ya kwa Lesa.
1. Nga ca kuti bantu balembele Baibolo, cinshi tulandila ukuti Lesa e mwine wa fyebo fyabamo?
Abalembele Baibolo bali nalimo 40, kabili palipitile imyaka nalimo 1,600 pa kuti bapwishe ukuilemba. Batendeke ukuilemba mu mwaka wa 1513 ninshi Yesu talaisa pano isonde, kabili bapwishishe ukuilemba mu mwaka wa 98 ninshi Yesu alibwelelamo ku muulu. Na kabili abalembele Baibolo bakwete inkulilo shapusanapusana. Ku ca kumwenako, bamo bali bakankaala kabili balisambilile sana, e lyo bambi bali bapiina kabili tabasambilile. Na lyo line fyonse ifyaba mu Baibolo filomfwana. Cinshi calenga? Ni co Lesa e mwine wa Baibolo. (Belengeni 1 Abena Tesalonika 2:13.) Abalembele Baibolo tabalembele ifyo baletontonkanya. Lelo “umupashi wa mushilo e walengele ukuti balande . . . amashiwi ayafumine kuli Lesa.” a (2 Petro 1:21) Lesa abomfeshe umupashi wakwe uwa mushilo ku kulenga abaume ukulemba amashiwi yakwe.—2 Timote 3:16.
2. Ni bani abo Baibolo ingaafwa?
Imbila nsuma iyaba mu Baibolo kuti ya-afwa ‘aba nko shonse na ba mitundu yonse na ba ndimi shonse na bantu bonse.’ (Belengeni Ukusokolola 14:6) Pa kuti ici cicitike, Lesa alilengele ukuti Baibolo ipilibulwe mu ndimi ishingi ukucila icitabo icili conse. Mupepi na bantu bonse kuti babelenga nelyo ukukutika ifyaba mu Baibolo, te mulandu no lulimi balanda nelyo uko bekala.
3. Bushe Yehova acingilila shani Baibolo?
Baibolo bailembele pa fintu ifyonaika bwangu, pamo nga impapa sha nama na macinda. Nomba abaume abatemenwe Baibolo balitwalilile ukuikopolola, kabili balebikako sana amano pa kukopolola. Nangu ca kuti kwali bamo abakwete sana amaka abalefwaya ukonaula Baibolo, kwali abantu bambi abaipeeleshe ukufwilapo pa kuti bacingilile Baibolo. Yehova tasuminisha umuntu nelyo icintu icili conse ukumulesha ukulanshanya na ifwe. Baibolo itila: “Icebo ca kwa Lesa wesu cena, cikabako umuyayaya.”—Esaya 40:8.
SAMBILILENI NA FIMBI
Sambilileni no kumona ifyo Lesa abomfeshe umupashi wakwe ukulenga abaume ukulemba Baibolo, ifyo aicingilile, e lyo ne fyo alengele abantunse baikwata.
4. Baibolo yalilondolola umwine wa fyebo fyabamo
Tambeni VIDIO. Lyena belengeni 2 Timote 3:16, no kulanshanya amepusho yakonkapo.
-
Nga ca kuti abantunse e balembele Baibolo, cinshi yabela Cebo ca kwa Lesa?
-
Bushe mulemona ukutila caliba fye bwino ukusumina ukuti Lesa alilengele abantunse balemba amashiwi yakwe?
Umukalamba wa ncito kuti aeba umubomfi wakwe ukumulembelako kalata. Nomba ifyebo umubomfi alalemba te fyakwe, lelo fya mukalamba wa ncito. Ifi fine e fyo cali na ku balembele Baibolo. Ifyebo balembele te fyabo, lelo fyafumine kuli Lesa
5. Abantu balifilwa ukulofya Baibolo
Apo Baibolo yafuma kuli Lesa, ninshi tufwile ukwenekela ukutila kuti aicingilila. Pa myaka iingi, abantu aba maka sana balyesha ukuti balofye Baibolo. Bashimapepo balyesha ukucita ifyalekanalekana pa kuti abantu bekwata Baibolo. Te mulandu ne fi fyonse, abantu abengi bali-ipeeleshe ukufwilapo pa kuti bacingilile Baibolo. Pa kuti musambilile pali umo uwaipeeleshe ukufwilapo pa kuti acingilile Baibolo, tambeni VIDIO, lyena lanshanyeni amepusho yakonkapo.
-
Apo mwaishiba ifyo abantu bamo baipeeleshe pa kuti bacingilile Baibolo, bushe mulefwaisha ukulaibelenga? Cinshi mwalandila ifyo?
Belengeni Amalumbo 119:97, lyena lanshanyeni ici icipusho:
-
Cinshi calengele abantu abengi baipeeleshe ukufwilapo pa kuti bapilibule Baibolo no kuisabankanya?
6. Icitabo ca bantu bonse
Ukufuma fye na kale, Baibolo e citabo ico bapilibula mu ndimi ishingi kabili ico basabankanya sana. Belengeni Imilimo 10:34, 35, lyena lanshanyeni aya amepusho:
-
Mulandu nshi Lesa afwaila ukuti Icebo cakwe cipilibulwe mu ndimi ishingi kabili cisabankanishiwe sana?
-
Finshi mwatemwapo sana pa fyo twalandapo pali Baibolo?
Mupepi na
Bantu Bonse
mwi sonde lyonse
kuti babelenga nelyo ukukutika ku fyaba mu Baibolo mu lulimi baishiba
E ko yaba mu ndimi ukucila
3,000
yonse nelyo mu fiputulwa
AmaBaibolo ayo bapulinta yaba nalimo
5,000,000,000
takwaba icitabo ico bapulinta sana nga Baibolo
ABANTU BAMO BATILA: “Baibolo libuuku fye ilyo abantu balembele kale sana.”
-
Inga imwe muletontonkanyapo shani?
-
Finshi filanga ukuti Baibolo Cebo ca kwa Lesa?
IFYO MUSAMBILILE
Baibolo Cebo ca kwa Lesa, kabili alicitapo fimo pa kushininkisha ukuti abantu bonse bengakwata Baibolo.
Ukupitulukamo
-
Bushe nga twalanda ukutila Lesa abomfeshe umupashi wakwe pa kulenga abantu balembe Baibolo, ninshi twalosha mwi?
-
Finshi mwatemwapo sana pa fyo Lesa acingilila Baibolo, pa fyo yapilibulwa, na pa fyo yasabankanishiwa?
-
Bushe mwaumfwa shani ifi nomba mwaishiba ukuti Lesa alibombesha pa kuti alelanshanya na imwe ukubomfya Baibolo?
ISHIBILENIPO NA FIMBI
Belengeni ifyo cali pa kuti bapilibule Baibolo ukufuma mu fimfungwa balembelepo pa kubalilapo ukuileta mu ma Baibolo twakwata muno nshiku.
“Ifyo Cali pa Kuti Baibolo Itwalilile Ukubako Mpaka na ino Nshita” (Loleni!, November 2007)
Moneni ifyo cali pa kuti Baibolo itwalilile ukubako nangu ca kuti kwali ifintu fitatu ifikalamba ifyali no kulenga itwalilila ukubako.
“Ifyo Cali pa Kuti Baibolo Itwalilile Ukubako” (Ulupungu lwa kwa Kalinda Na. 4 2016)
Moneni ifyo abantu na bambi baipeeleshe ukufwilapo pa kuti bapilibule Baibolo.
Baibolo yalikopololwa no kupilibulwa imiku iingi. Kuti mwashininkisha shani ukuti abalepilibula no kukopolola Baibolo taba-alula ifyabamo?
“Bushe Baibolo Baliyalula Yonse Nelyo Balyalulamo Fimo?” (Icipande ca pa jw.org)
a Nga fintu mukasambilila mwi sambililo 7, umupashi wa mushilo maka ayo Lesa abomfya pa kucita ifintu.
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
