IRUẸMWI 05
E Baibol Keghi Re Uhunmwu Ne Osanobua Gie Gie Ima
E Baibol keghi re ẹse ọhẹ nọ hiunsi nọ ke obọ e Jehova rre. Ebe 66 ẹre ọ rre Baibol. U sẹtin gha roro ẹre wẹẹ: ‘De ehe ne Baibol ke rre? Gha yan ẹmwẹ nọ rre uwu ẹre?’ Na ya rhie ewanniẹn ye avbe inọta na, gia ziro yan vbene ẹmwẹ Osanobua ni rre Baibol ya sẹ obọ ima hẹ.
1. Emwa nagbọn ẹre ọ gbẹn e Baibol, vbọ ghi ya re Ẹmwẹ Osanobua hẹ?
Odẹ orhunmwu 40 ẹre ọ gbẹn e Baibol. Odẹ ukpo 1,600 ẹre a ya gbẹn ọnrẹn. 1513 B.C.E. ẹre a suẹn ọnrẹn na gbẹn, a na ya gbẹn ọnrẹn fo vbe odẹ ukpo 98 C.E. Emwa ughughan ẹre ọ gbẹn e Baibol, iwinna ughughan ẹre iran vbe gha ru. Ọrheyerriọ, te emwi hia ne iran gbẹn wa gua egbe ro. Vbọzẹ? Rhunmwuda, ẹmwẹ Osanobua nọ. (Tie 1 Tẹsalonaika 2:13.) Iran ma gbẹn ẹmwẹ obọ iran yotọ. Sokpan, orhiọn nọhuanrẹn a ẹre ọ dia iran ya “ta ẹmwẹ nọ ke ehe ne Osanobua ye rre.” (2 Pita 1:21) Te Osanobua ya orhiọn nọhuanrẹn gua emwa kpa ya gbẹn ẹmwẹ ọnrẹn yotọ.—2 Timoti 3:16.
2. De emwa ni gha sẹtin miẹn ere vbe ẹmwẹ ni rre Baibol?
Emwa hia ni zẹ urhuẹvbo ughughan vbe otagbọn hia gha sẹtin miẹn ere vbe iyẹn nọ maan nọ rre Baibol. (Tie Arhie Maan 14:6.) Osanobua keghi ru ẹre ne emwa miẹn e Baibol gha tie vbe urhuẹvbo ughughan; ebe ọvbehe i rrọọ vberriọ. Iyobemwahia ẹre ọ miẹn e Baibol gha tie vbe urhuẹvbo ne iran rẹn otọ re.
3. Vbe Jehova ya ru ẹre hẹ ne a na miẹn wẹẹ, e Baibol ye do sẹ ẹdẹnẹrẹ?
Ohian kevbe ebe na ya emwi okọ na tie ẹre papyrus ru, rre usun emwi na gbẹn e Baibol yi vbe ẹghẹ nẹdẹ, sokpan iran i tọ. Rhunmwuda ọni, emwa ni hoẹmwẹ e Baibol keghi ya obọ gbẹnnẹ ọnrẹn ladian ye ihe ọvbehe. Agharhemiẹn wẹẹ emwa ni rre ọdakha te gha hoo ne iran wabọ e Baibol rua, emwa eso keghi rhie uhunmwu mwẹ atatabọ ne iran mieke na gbogba ga re. E Jehova ma kue ne ọmwa rhọkpa ra emwi rhọkpa mu idobo yọ, ne irẹn ghẹ ghi gu ima guan. E Baibol khare wẹẹ: “Ẹmwẹ e Nọyaẹnmwa rrọọ, ẹdẹdẹmwẹdẹ.”—Aizaia 40:8.
GUALỌ OTỌ RE SAYỌ
Gia ziro yan vbene Osanobua ya loo emwa nagbọn ya gbẹn e Baibol hẹ, vbene ọ ya gbogba ga re hẹ do sẹ ẹdẹnẹrẹ, kevbe evbọzẹe ne emwa ughughan na miẹn ọnrẹn tie.
4. E Baibol tama ima ọmwa nọ yan rẹn
Kpee VIDIO na. Iyeke ọni, tie 2 Timoti 3:16, ne uwa ziro yan inọta ni lelẹe.
-
Ugbẹnvbe a miẹn wẹẹ emwa nagbọn ẹre ọ gbẹn e Baibol, vbọ ghi zẹe ne a na tie ẹre Ẹmwẹ Ọghe Osanobua?
-
Uwẹ gele yayi wẹẹ Osanobua gha sẹtin loo emwa nagbọn ya gbẹn ẹmwẹ ọnrẹn yotọ ra?
Akọwe sẹtin gu ọmwa gbẹn elẹta, sokpan ẹmwẹ nọ rre elẹta nii keghi re ọghe ọmwa nọ gie uhunmwu nii. Erriọ vbe ye, emwa nagbọn ẹre ọ gbẹn e Baibol, sokpan ẹmwẹ ọghe Osanobua ẹre iran gbẹn yotọ
5. Obọ eghian ma gba e Baibol
Rhunmwuda ne Baibol na re ẹmwẹ Osanobua, ọ keghi gbogba ga re. Ukpo nibun ẹre emwa ni rre ọdakha ya gha hoo ne iran wabọ e Baibol rua. Avbe ọkaolotu ugamwẹ vbe hia ne iran mu idobo yọ, ne emwa ghẹ sẹtin tie Baibol. Sokpan, emwa nibun keghi rhie uhunmwu mwẹ atatabọ ya gbogba ga re, agharhemiẹn wẹẹ iran miẹn ukpokpo nọ wegbe. U ghaa hoo ne u rẹn ọkpa vbe usun iran na, kpee VIDIO na, iyeke ọni, uwa ghi ziro yan inọta ni lelẹe.
-
Ne u na ghi rẹn oya ne emwa re rhunmwuda e Baibol, de aro ne uwẹ ghi ya ghee ẹre nia? Vbua gu kha vberriọ?
Tie Psalm 119:97, iyeke ọni, uwa ghi ziro yan inọta na:
-
Vbọ ya emwa rhiegba ye Baibol na zedu ẹre kevbe na ghae, uhiẹn vbe iran rẹnrẹn wẹẹ iran sẹtin ya uhunmwu khiẹ ọre?
6. Ebe na rhunmwuda emwa hia gbẹn
Ke na ya bu agbọn tua agbọn gha dee, e Baibol ọre ebe na ghi zedu ẹre sẹ, ẹre ọ vbe kpọ sẹ. Tie Iwinna 10:34, 35, iyeke ọni, uwa ghi ziro yan avbe inọta na:
-
Vbọ ya Osanobua ru ẹre ne Baibol gha re ebe na ghi zedu ẹre sẹ, kevbe nọ ghi kpọ sẹ?
-
Vbọzẹ ne Baibol na yẹẹ ruẹ?
Ọ lọghọ a ke miẹn emwa
nẹi miẹn e Baibol tie vbe
urhuẹvbo ne iran rẹn otọ re
vbe otagbọn na
Ọ gberra urhuẹvbo
3,000
na he zedu e Baibol
ra abọ eso vbọ ghee
Inu na he print ladian rrie odẹ
5,000,000,000
ebe ọvbehe i rrọọ nọ ye vberriọ
EMWA ESO KEGHI KHA WẸẸ: “Ebe kẹkan ne emwa nagbọn gbẹn vbe ẹghẹ nẹdẹ ẹre Baibol khin.”
-
Vbua ghee ẹre hẹ?
-
Vbọ so igiẹ yọ wẹẹ, Ẹmwẹ Ọghe Osanobua ẹre Baibol khin?
OLIKA ẸMWẸ
Ẹmwẹ Ọghe Osanobua ẹre Baibol khin; Osanobua keghi ru ẹre ne emwa hia miẹn e Baibol gha tie vbe urhuẹvbo ughughan.
Ogbewerriẹ
-
Vbe a yae kha ne a na wẹẹ, te Osanobua dia emwa ya gbẹn e Baibol?
-
Vbọ ye ruẹ hẹ vbe ekhọe, ne Baibol na ye rrọọ, nọ na re ebe na zedu ẹre sẹ kevbe nọ kpọ sẹ?
-
Vbọ ye ruẹ hẹ vbe ekhọe, ne Osanobua ma na kue ne emwi rhọkpa mu idobo yọ, nẹ ghẹ ghi gu ruẹ guan?
RUẸ SAYỌ
Ghee vbene a ya zedu e Baibol nẹdẹ na ya obọ gbẹn ghee urhuẹvbo ughughan na ghi miẹn vbe ẹdẹnẹrẹ.
Ghee evbọzẹe ne Baibol na ye rrọọ do sẹ ẹdẹnẹrẹ, agharhemiẹn wẹẹ emwi eha rrọọ nọ gha te mu idobo yọ.
“Idobo Ughughan Ne Baibol La Gberra” (The Watchtower No. 4 2016)
Ghee vbene emwa ya rhie uhunmwu mwẹ atatabọ hẹ ya zedu e Baibol.
Ẹi re avbiẹ inugba ẹre a he gbẹnnẹ ẹmwẹ ni rre Baibol ye ehe ughughan; a vbe zedu ẹre nẹ inugba nọ khin. Vbe ima ghi ya rẹn hẹ wẹẹ a ma fi ẹmwẹ ni rrọọ werriẹ?
a Orhiọn nọhuanrẹn ọre ẹtin ne Osanobua ya winna. Ma gha ziro yan rẹn sayọ vbe Iruẹmwi 07.
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
