KALANSEN 05
Bibulu ye cikan ye min bɔra Ala yɔrɔ ka di an ma
Jehova ye Bibulu di an ma. Nilifɛn ɲumanba don. Kitabu 66 de b’a kɔnɔ. Laala i bɛ i yɛrɛ ɲininka ko: ‘Bibulu bɔra min? Jɔni de ye Bibulu tigi ye?’ Walasa ka o ɲininkaliw jaabi, an k’a lajɛ Ala ka cikan min bɛ Bibulu kɔnɔ, o sera an ma cogo min na.
1. Ni mɔgɔw de ye Bibulu sɛbɛn, Ala dun y’a tigi ye cogo jumɛn na?
Cɛ 40 ɲɔgɔn de ye Bibulu sɛbɛn san 1 600 ɲɔgɔn kɔnɔna na, k’a ta san 1 513 K.Ɲ. fo ka taa se san 98 fan fɛ K.L. A sɛbɛnbagaw tun tɛ mɔgɔ sugu kelenw ye, sagagɛnnaw, mɔnikɛlaw ani masakɛw tun sen b’a la ani o n’a ɲɔgɔnnaw. O bɛɛ n’a ta Bibulu kɔnɔkumaw tɛ ɲɔgɔn sɔsɔ. O sera ka kɛ cogo di? O sera ka kɛ bawo Ala de ye Bibulu tigi ye. (1 Tesalonikekaw 2:13 kalan.) A sɛbɛnbagaw ma u yɛrɛw hakilinaw sɛbɛn. Nka “Ala ye a ka kuma min di mɔgɔw ma, u kumana ka o fɔ Ni Senu [hakili senu] a de barika la.” (2 Piɛrɛ 1:21) Ala ye a yɛrɛ hakilinaw kɛ cɛ dɔw kɔnɔ a yɛrɛ dafiɲɛ fɛ, walima ka dusu don u kɔnɔ u ka ale hakilinaw sɛbɛn. A y’o bɛɛ kɛ a hakili senu barika la.—2 Timote 3:16.
2. Jɔni de bɛ se ka nafa bɔ Bibulu la?
“Siyaw bɛɛ ni bɔnsɔnw bɛɛ ni kanw bɛɛ ani mɔgɔ sifaw bɛɛ” bɛ se ka nafa sɔrɔ kibaru duman na min bɛ Bibulu kɔnɔ. (Jirali 14:6 kalan.) Ala y’a janto a la Bibulu ka kɛ kan caman na ka tɛmɛn gafe tɔw bɛɛ kan tariku kɔnɔ. Bi bi in na, mɔgɔ fanba bɛ se ka Bibulu sɔrɔ. Hali mɔgɔw mana kɛ yɔrɔ o yɔrɔ walima u mana kan o kan fɔ, u bɛ se ka Bibulu sɔrɔ.
3. Jehova ye Bibulu lakana cogo di?
Bibulu tun sɛbɛnna fɛnw kan si bɛrɛ tɛ minnu na. Nka cɛ minnu ye Bibulu kanu, olu y’a sɛbɛn ani ka segin k’a sɛbɛn koɲuman bololasɛbɛnniw na. Hali ni mɔgɔ setigibaw y’a ɲini ka Bibulu silatunun, dɔ wɛrɛw y’a bɔ u yɛrɛ la ka u ka ɲɛnamaya bila farati la walasa ka a lakana. Jehova m’a to mɔgɔ si walima fɛn si ka ale bali ka kuma an fɛ. Bibulu b’a fɔ ko: “An ka Ala ka kuma bɛ to badaa.”—Esayi 40:8.
DƆ FARA I KA DƆNNIYA KAN
Cogo min na Ala ye mɔgɔw bila u ka Bibulu sɛbɛn, cogo min na a y’a lakana ani cogo min na a y’a to mɔgɔw k’a sɔrɔ, an k’a ɲini ka fɛn caman dɔn olu ko la.
4. Bibulu bɛ a tigi jira
A’ye WIDEYO lajɛ. O kɔ, 2 Timote 3:16 kalan ani aw ka baro kɛ nin ɲininkaliw kan:
-
Ni cɛw de ye Bibulu sɛbɛn, mun na a welela Ala ka Kuma?
-
E hakili la, hakilitigiyako don ka d’a la ko Ala bɛ se k’a ka Kuma di mɔgɔw ma u k’a sɛbɛn wa?
Sekretɛri bɛ se ka lɛtɛrɛ sɛbɛn, nka a ye mɔgɔ min ka kuma sɛbɛn, o tigi de ka cikan bɛ o lɛtɛrɛ kɔnɔ. O cogo kelen na, Hadamadenw ye Bibulu sɛbɛn, nka cikan min b’a kɔnɔ, o bɔra Ala de yɔrɔ
5. Bibulu kɛlɛbagaw ma se sɔrɔ a kan
Ni Bibulu ye Ala ka Kuma ye, an bɛ se ka sigi n’a ye ko a b’a lakana. Tariku kɔnɔna na, cɛ setigibaw y’a ɲini ka Bibulu silatunun. Diinɛ ɲɛmɔgɔw tun t’a fɛ mɔgɔw ka Bibulu kalan. Mɔgɔ caman ye u ka ɲɛnamaya bila farati la walasa ka Bibulu lakana hali k’a sɔrɔ mɔgɔw tun bɛ ka u kɛlɛ ani k’u bagabaga k’u b’u faga. Walasa ka o mɔgɔw dɔ la kelen ko dɔn, a’ye WIDEYO lajɛ, o kɔ aw ka baro kɛ nin ɲininkaliw kan:
-
K’a dɔn ko fɛn caman kɛra walasa ka Bibulu lakana, yala o bɛ e bila ka a kalan wa? Mun na?
Zaburu 119:97 kalan, o kɔ aw ka baro kɛ nin ɲininkali kan:
-
Mun de ye mɔgɔ caman bila u k’u ka ɲɛnamaya bila farati la walasa ka Bibulu bayɛlɛma ani k’a jɛnsɛn?
6. Gafe min dabɔra mɔgɔw bɛɛ kama
Bibulu de ye gafe ye, min bayɛlɛmana kosɛbɛ ani min jɛnsɛnna kosɛbɛ ka tɛmɛn gafe tɔw bɛɛ kan tariku kɔnɔna na. Kɛwalew 10:34, 35 kalan, o kɔ aw ka baro kɛ nin ɲininkaliw kan:
-
Mun na Ala b’a fɛ a ka Kuma ka bayɛlɛma kosɛbɛ ani ka jɛnsɛn kosɛbɛ?
-
Mun de ka di e ye Bibulu ko la?
Diɲɛ mɔgɔw bɛɛ,
100% la,
u fanba
bɛ se ka Bibulu sɔrɔ kan dɔ la u bɛ min faamu
A kuturu bɛɛ walima a fan dɔ
bɛ sɔrɔ kan
3 000
ni kɔ la
5 000 000 000
Bibulu hakɛ minnu bɔra,
o ka ca kosɛbɛ ni gafe tɔw bɛɛ ye
MƆGƆ DƆW B’A FƆ KO: “Bibulu ye gafe kɔrɔ dɔrɔn de ye, Hadamadenw ye min sɛbɛn.”
-
E hakilina ye mun ye?
-
Dalilu jumɛnw de b’a jira ko Bibulu ye Ala ka Kuma de ye?
BAKURUBAFƆLI
Bibulu ye Ala ka Kuma de ye ani a y’a janto a la walasa mɔgɔw bɛɛ ka se ka a sɔrɔ.
Seginnkanni
-
N’a fɔra ko Ala ye Bibulu kɔnɔkumaw kɛ cɛ dɔw kɔnɔ a yɛrɛ dafiɲɛ fɛ, u ka u sɛbɛn, o kɔrɔ ye mun ye?
-
Cogo min na Bibulu kisira, k’a bayɛlɛma ani k’a jɛnsɛn, mun de bɛ i dabali ban o kow la?
-
K’a dɔn ko Ala ye o cɛsiri suguw kɛ walasa ka kuma i fɛ, o bɛ mun de kɛ i la?
NINNU LAJƐ
Bibulu tariku kow kalan—k’a ta Bibulu bololasɛbɛnni fɔlɔw la fo ka na se bi Bibulu bayɛlɛmalenw ma.
A lajɛ Bibulu kisira cogo min na kɔrɔbɔliba saba la minnu tun b’a fɛ k’a silatunun.
Bibulu seginna ka sɛbɛn ani k’a bayɛlɛma siɲɛ caman. I bɛ se ka d’a la cogo di ko yɛlɛmaw ma don Ala ka cikan na?
“Yala Bibulu kɔnɔkumaw yɛlɛmana walima u falenna wa?” (jw.org barokun dɔ)
a Iko an bɛna a ɲɛfɔ cogo min na kalansen 07nan na, hakili senu ye Ala fanga de ye, a bɛ baara kɛ ni min ye.
