Jɛhova ɖà à nyíí-ɖɛ̀ nɔ̀mɔ̀ dyíin ɖò nyí. Ɔ mɔ̀ céè-ɖɛ̀-kpò 66 poìn dyí ɖé céè-ɖɛ̀-kpò vɛ̀nɛ̀ dyúáɖò mɔ̀à Baɓoɔ kɛɛ mú. Kɛɛ, m̀ ɓɛ́ìn hwìɖìi poɛ̀n: ‘Dɛ̀ Baɓoɔ sɔ̀ìn nyɛ́? Nyɛ́ kɔ̃̀ wuɖu nìà ɖé ɔ múɛ́?’ Ɓɛ́ à ké dyi-diè-ɖɛ̀ ɓèa gɔ̃̀ jù ní, ɓèa cɛ̃ kà Geɖepɔɔ cuò-wùɖùɔ̀ nyu ma à gbo dyiɛ kɛɛ jè.

1. Ɔ jù ké gàa ɓè dyi ma Baɓoɔ céè ní, xwɛ̀ Geɖepɔɔ wuɖu nyu ɖé ɔ mú nìɛ̀ kɛ́?

Gàa kpò 40 ɓè céè ma Baɓoɔ ɓó ti ɓɛ́ìn ma zɔ̃ 1,600 jùɛ kɛɛ xwíníín, sɔ̀ìn 1513 B.C.E. gbo ké 98 C.E. dyɛ̀ìn nyɛ. Ké ɔ céè-nyɔ̀ ɓè sɔ̀ ma nyɔ-dù kò-kò ɓè hwìɛ̀. Ɔ nì ná dyɛo, kɛɛ Baɓoɔ wáká séín muìn gbo nyɛ̀nɛ̀ɛ̀. Xwɛ̀ ɔ ɓɛ́ìn ná kpáa kɛ́? Sepoɛɖe Geɖepɔɔ mɔ̀ nyɔ kɔ̃̀ wuɖu nìà ɖé Baɓoɔ múɛ̀. (Zà 1 Tɛ̀sàɖónìà 2:​13 wuɖuún.) Baɓoɔ céè-nyɔ̀ ɓè se ma wa mìɔùn nììn hwìɖìi-poìn-ɖɛ̀ ɓè céè. Kɛɛ, “zùù hwɛ̀in-hwɛ̀inɔ̀ mɔ̀ nyɔ nì ma wa nàìn.” a (2 Píɖɛ̀ 1:​21) Geɖepɔɔ nyùìn ma ɔ zùù hwɛ̀in-hwɛ̀inɔ̀ kũ̀à mú, ɓɛ́ ɔ ké ɔ hwìɖìi-poìn-ɖɛ̀ ɓè wa gbo cɛ̃.​—2 Tímétè 3:16.

2. Nyɛ́ ɓɛ́ìn Baɓoɔ kpáná kɔ̃ún dyéɛ kɛ́?

“Ɓóɖó-dù séín kè xwéɖé-dù séín kè nyɔ ɓè po wuɖu-dù kò-kò ɓèɛ ɔ kè nyɔ-dù kò-kò séín” ɓɛ́ìn bɔ̃̀ nɔ̀mɔ̀ dyíin céèà ɖé Baɓoɔ múɛɛ kpáná kɔ̃ún dyéɛ. (Zà Wɛ̀ɖɛ̀ɓèɖésĩ̀ɔ̀ 14:6 wuɖuún.) Geɖepɔɔ dyéɛ ma jè gbo ɓɛ́ Baɓoɔ ké ɖé wuɖu-dù pàɖà ɓè mú nì, ɓɛ́ ɔ ké céè-ɖɛ̀ tɔ̀ɔ̀ séín ɖò nì ɓóɖó-kpàà kɔ̃ɛɛ dyí zi. Nyɔ ɓáún-ɓáún ɓéɖé Baɓoɔ ní kɛbì wa mɛ cĩ́ dà séín ɖò mɔɔ wa mɛ po wuɖu-dù séín ɖòɛ.

3. Xwɛ̀ Jɛhova ɖà Baɓoɔ dyí gmɔ̀ kɛ́?

Wa céè ma Baɓoɔ ɖɛ ɓè ní hwèɖèìn nyɛɛ kɔ̃, ɔ hwɔìn kà nimii-kùɖùù. Kɛɛ, gàa ɓè ɓɛ́ wa ɖɛ̀ɓɛ̀ Baɓoɔ múɛɛ ma ma mú kóɖó-kóɖó, ké wa zaìn ma dúún, ké wa céèɛ̀n ma sɔ̃. Nyɔ ɓè ɓéɖé ma kpéɛɛ vɔ̃ ma, ɓɛ́ wa ké Baɓoɔ jè dyi zĩ̀ìn, kɛɛ nyɔ tɔ̀ɔ̀ ɓè hwòɖò wɔ̃́ ma, ɓɛ́ wa ké waà fɛ̀ɛ̀ɔ̀ tò ɓó Baɓoɔ dyí gmɔ̀ jè. Jɛhova seɛ gbo wɔ̃́ìn mu, ɓɛ́ nyɔ ɖò mɔɔ ɖɛ ɖò kéɛ nyu ɓɛ́ ɔ ké se à gbo wùɖù. Baɓoɔ ɖá: “Ðɛ ɓɛ́ à Geɖepɔɔ cɛ̃ kɛɛ nì kánáá pu.”​—Àzédyà 40:8.

 ÐE ÐƐ MÚIN CÁ

5. Baɓoɔ pó ɔ gbo-vɔ̃-nyɔ̀ ɓè xwaún

 6. Céè-ɖɛ̀ ɓó nyɔ séín bìì

Baɓoɔ nì wuɖu-dù kò-kò ɓè mú ké ɔ ɓèìn dyi ké ɔ zi céè-ɖɛ̀ séín ɖò dyí dà ɓóɖó-kpàà kɔ̃. Zà Àpɔ́sò 10:​34, 35 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Ðɛ́ kɔ̃̀ jè Geɖepɔɔ mɔ́ ɓɛ́ ɔ Wuɖuɔ̀ kéà wuɖu-dù kò-kò ɓè mú nì kè ɓɛ́ ɔ kéà dyi ɓèìn nyɛ́?

• Ðɛ́ nɔ̀mɔ̀ m̀ hwìɖìi cá ɓá Baɓoɔ jè dyíɛ́?

 SṸÌN-XWÍNÍÍN

Baɓoɔ mɔ̀ Geɖepɔɔ Wuɖu, ké ɔ ɖàa jè gbo dyé, ɓɛ́ nyɔùn séín kéɛ ɓéɖé.

Ðɛ-kɔ̃in-kpa-kpa

• Ðɛ́ mɔ̀ɔ̀ xwíníín ɓɛ́ à dyià níìn, Geɖepɔɔ mɔ̀ nyɔ cɛ̃ɛ gàa ɓè gbo ɓɛ́ wa ké Baɓoɔ céè kɛ́?

• Ðɛ́ tó nì hwòɖòɔ̀ dyi ɓá kà Baɓoɔ nyu póɛ kè ɔ wuɖu-dù kò-kò ɓè mú po-po ɔ kè kà ɔ nyu dyi ɓèɛ̀n nyɛɛ jè dyíɛ́?

• Xwɛ̀ ɔ nyu nì hwòɖòɔ̀ nyuɛ, ɓɛ́ m̀ kéɛ dyí dyuò kà Geɖepɔɔ vɔ̃ kóɖó-kóɖó cá ɓɛ́ ɔ ké m̀ gbo wùɖù kɛ́?