Inlōnti an ngam Paipöl nö ṙama-ang in Yāvē nö töpōiṙāi. 66 ṙòken an ngam Paipöl nö ṙòkhöre. Sitih inlahen tī anga-aṅ nö halēnlö kinūichö e? Anga-aṅ ṙöng mahakòtö tī re nö kūichö e? Mihôiṅ öi ṙatö-ellōnre tö ngam Paipöl nö ṙama-ang in ò? Ta-a töi mikahtökūöre.

1. Yēḵ ngam Paipöl nö kahūich tarik, ngaich kūö yòh angū-ö nö kahūich ngam Tēv tö ṙô hī?

Kūichö an ngam Paipöl tö yik tö 40 ṙòken tarik, lohten cha-a nö 1,600 samyeūheu rò-òtö tī nö kūichö e (Löktö kūö ik 1513 B.C.E. söl ik 98 C.E). In cha më kamūich, ōt më töt pōihöl nö haköp, töng yāicha inrē. Ōt më tö pōihöl nö in cha hēk tökòlô inrē. Sön nöng hěngren ṙô minë kahūich cha. Nö inmeuktö Yāvē nö anga-aṅ kamūichöt minë ṙô re. (Vë-evkūö 1 Tösalònikē 2:​13.) Kūich cha-a ‘pòn halöinyka ellōn töm töhet fanöinylö tö ngö manah tö ò nö chaphöt nuk ṙô re nö ellōn cha. a (2 Pītör 1:​21) Lökten cha-a nö kūich nuk ṙô ellōn ò, öt nuk ṙô ellōn cha.​—2 Timôtī 3:​16.

2. Chö-önyten tö chīö öng ngam Paipöl nö kūichö?

Kūichö an ngam Paipöl tö ngam Tēv nö chö-öny tö yip “pumnāmö tarik, miyööngö, tum mi-ëlô, tarik inrē.” (Vë-evkūö Inmeukhömat 14:6.) Lökten an töngamuh nö ṙōlkangen ëlô nö ōt nö ikūö ngih panam. Öt hěng līpöre tö sā tumkangen ëlô ngam Paipöl. Höng hòṅ ṙòkhöre ngaich tarik nö teūngen tö e nö i ëlô re.

3. Sitih inlahen tī Yāvē nö laklö ngam Paipöl söl ing töngamuh?

Kūichö misī ngam Paipöl nöng imat nup töng veūtö chinhūngö. Tö sā minë uk töṙeūla hēk imat papirös, minë tö sā kun chōn. Vī-i kôpi anū-ö tö yik tarik tö hangenlōn töm Paipöl yik töt vāchö tī inrē nö kūich nöng aṅtī tö kuntī re. Yih ngaich ngam ṙētak, hē yik tökiröng tarik mahayöng nö sōngen inkööpö mat ngam Paipöl. Sön yik tö hangenlōn tö e nöng haköpken e. Öt hěngtak tökô nö asökngöm kuilōn Yāvē nö vë-ekūö hī. Ngö ṙô ngam Paipöl: ‘Örheūheu pöri min ngam ṙô ngam Tēv hī nö köp.’​—Isayā 40:8.

 MIKAHTÖKŪÖRE HĒK

5. Öt hěngtak tökô nö ahetngen ngam Paipöl

 6. Ngam līpöre taṙòkhöre tarik

Höng ngam Paipöl an tö pōyen tumkangen ëlô nö translētö hēk katööli inrē söl ing töngamuh. Vë-evkūö Inlahen 10:34, 35, ngaich kakkö minë intöönö yamih:

• Kūö yòh ngam Tēv nö lōnu tö ngam Ṙô re nö vënyu manah hēk söl i taṙòkhöre inrē?

• Asuh nup tö lökngöre tī töm ellōn meh in minë haköp meh inlahen ngam Paipöl in ngih lesön?

 MINË HAKÖP HĪ NGAICH

Ṙô ngam Tēv an ngam Paipöl. Lökten an töngamuh nö ṙōlkangen ëlô nö ōt nö ikūö ngih panam.

Sitih ṙô öm më-eṅ?

• Kūö yòh öi mihôiṅ vënyö ngam Paipöl nö ṙama-ang in ngam Tēv?

• Asuh nup tö lökngöre tī töm ellōn meh in minë haköp meh inlahen ngam Paipöl in ngih lesön?

• Sitih lōn öm ri ngaich pò meh akahalōn töm Tēv nö asöltö ngam talöökö ṙô re nö vë-ekūö meh?