LEKSIYON 05
Ang Bibliya Maoy Mensahe sa Diyos Kanato
Gihatagan ta ni Jehova ug nindot kaayo nga regalo—66 ka basahon nga giusa, ang Bibliya. Pero tingali maghunahuna ka: ‘Asa man gikan ang Bibliya? Kinsay awtor niini?’ Aron matubag kini, hisgotan nato kon sa unsang paagi nakaabot kanato ang mensahe sa Diyos nga naa sa Bibliya.
1. Kon mga tawo ang nagsulat sa Bibliya, nganong makaingon ta nga ang Diyos ang Awtor niini?
Ang Bibliya gisulat sa mga 40 ka tawo sulod sa mga 1,600 ka tuig, gikan sa 1513 B.C.E. hangtod sa mga 98 C.E. Ug ang mga magsusulat lainlain ug kahimtang sa kinabuhi. Bisan pa niana, ang mga basahon sa Bibliya wala magkasumpaki. Ngano? Kay ang Diyos ang Awtor sa Bibliya. (Basaha ang 1 Tesalonica 2:13.) Ang mga magsusulat wala magsulat sa ilang kaugalingong ideya. Hinuon, sila “nagsulti sa mensahe sa Diyos samtang sila gigiyahan sa balaang espiritu.” a (2 Pedro 1:21) Gigamit sa Diyos ang iyang balaang espiritu sa paggiya sa mga magsusulat sa pagsulat sa iyang hunahuna.—2 Timoteo 3:16.
2. Kinsay makabenepisyo sa Bibliya?
Ang “matag nasod ug tribo ug pinulongan ug katawhan” makabenepisyo sa maayong balita nga naa sa Bibliya. (Basaha ang Pinadayag 14:6.) Gipaneguro sa Diyos nga ang Bibliya mabatonan sa mas daghang pinulongan kay sa bisan unsang basahon. Halos ang tanan karon makabasa o makapaminaw sa mensahe sa Bibliya, bisan asa pa sila nagpuyo o bisan unsa pay ilang pinulongan.
3. Sa unsang paagi gipreserbar ni Jehova ang Bibliya?
Ang Bibliya gisulat diha sa mga materyales nga madaot kadugayan, sama sa panit ug papiro. Pero ang mga tawo nga nagpabili pag-ayo sa Bibliya naghimog tukmang mga kopya niini. Bisag naay mga magmamando ug lider sa relihiyon nga misulay sa pagwagtang sa Bibliya, naay mga tawo nga andam magpameligro sa ilang kinabuhi aron maproteksiyonan kini. Wala tugoti ni Jehova si bisan kinsa o ang bisan unsa nga makapugong niya sa pagpaabot sa iyang mensahe kanato. Ang Bibliya nag-ingon: “Ang pulong sa atong Diyos molungtad hangtod sa hangtod.”—Isaias 40:8.
TUN-IG DUGANG
Tun-ig dugang kon sa unsang paagi gigiyahan sa Diyos ang mga magsusulat sa pagsulat sa Bibliya, kon sa unsang paagi niya kini gipreserbar, ug kon unsay iyang gihimo aron mabatonan ni sa mga tawo.
4. Gisulti sa Bibliya kon kinsay Awtor niini
I-play ang VIDEO. Dayon basaha ang 2 Timoteo 3:16, ug hisgoti ang mosunod nga mga pangutana:
-
Kon mga tawo ang nagsulat sa Bibliya, nganong gitawag ni nga Pulong sa Diyos?
-
Katuohan ba gyod nga ang Diyos makahimo sa pagpahibalo sa iyang hunahuna ngadto sa mga magsusulat sa Bibliya?
Ang sekretaryo mao tingali ang naghimo sa sulat, pero ang mensahe naggikan sa tawo nga nagdiktar niini. Sa susama, mga tawo ang nagsulat sa Bibliya, pero ang mensahe niini naggikan sa Diyos
5. Ang Bibliya wala gyod mawagtang
Kon ang Bibliya gikan sa Diyos, seguradong proteksiyonan na niya. Sukad pa sa una, naay gamhanang mga tawo nga misulay sa pagwagtang sa Bibliya. Naay mga lider sa relihiyon nga misulay sa pagtago niini. Pero bisan pa sa pagsupak ug sa posibilidad nga patyon, daghan ang nagpameligro sa ilang kinabuhi aron maproteksiyonan ang Bibliya. Aron mailhan nimo ang usa kanila, i-play ang VIDEO, ug dayon hisgoti ang mosunod nga mga pangutana:
-
Karon nga nahibalo na ka nga grabe ang mga sakripisyong gihimo aron mapreserbar ang Bibliya, nadasig ba ka nga basahon kini? Ngano?
Basaha ang Salmo 119:97, ug dayon hisgoti kini nga pangutana:
-
Nganong daghan ang nagpameligro sa ilang kinabuhi aron mahubad ug maapod-apod ang Bibliya?
6. Basahon para sa tanang tawo
Sa tanang basahon, ang Bibliya ang kinadaghanag hubad ug kinadaghanag kopya nga naapod-apod. Basaha ang Buhat 10:34, 35, ug dayon hisgoti kini nga mga pangutana:
-
Nganong gusto sa Diyos nga ang iyang Pulong mahubad sa daghang pinulongan ug maapod-apod ngadto sa daghang tawo?
-
Unsay imong ganahan bahin sa Bibliya?
Halos
100%
sa populasyon sa kalibotan
ang makabasa o makapaminaw sa Bibliya sa pinulongan nga ilang masabtan
Mabatonan sa kapig
3,000
ka pinulongan
ang kompletong Bibliya o mga bahin niini
5,000,000,000
Ang gibanabana nga gidaghanon sa Bibliya nga nahimo,
nga mas daghan kay sa bisan unsang basahon
ANG UBAN MOINGON: “Karaan na nga basahon ang Bibliya ug tawo ra ang nagsulat ana.”
-
Unsay imong hunahuna?
-
Unsay ebidensiya nga ang Bibliya Pulong sa Diyos?
SUMARYO
Ang Bibliya Pulong sa Diyos, ug iyang gipaneguro nga mabatonan ni sa tanang tawo.
Review
-
Unsay ipasabot dihang moingon ta nga gigiyahan sa Diyos ang mga magsusulat sa pagsulat sa Bibliya?
-
Unsay ikasulti nimo bahin sa pagpreserbar, paghubad, ug pag-apod-apod sa Bibliya?
-
Unsay imong gibati sa pagkahibalo nga naningkamot gyod ang Diyos nga makaabot kanimo ang iyang mensahe?
SUSIHA
Basaha ang kasaysayan sa Bibliya—gikan sa orihinal nga mga manuskrito ngadto sa modernong mga hubad.
“Kon sa Unsang Paagi Nakalahutay ang Bibliya Hangtod Karon” (Pagmata!, Nobyembre 2007)
Sayra kon sa unsang paagi nagpabilin gihapon ang Bibliya bisan pa sa tulo ka butang nga nagpameligro niini.
“Ang Bibliya—Sa Unsang Paagi Napreserbar Kini?” (Ang Bantayanang Torre Num. 4 2016)
Tan-awa kon unsa ang mga kapeligrohan nga giatubang sa mga tawo aron mahubad ang Bibliya.
Ang Bibliya kadaghan gikopya, ug kini gihubad sa daghang pinulongan. Unsaon nimo pagseguro nga ang mensahe niini wala mausab?
a Sumala sa mahisgotan sa Leksiyon 07, ang balaang espiritu maoy aktibong puwersa sa Diyos.
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
