ISHOMO RYA 05
Bibuli ni obutumwa obu Ruhanga yatuhire
Yehova akatuha ekiconco c’omuhendo, ni okugamba ekitabo ekirimu ebitabo 66, ari co Bibuli. Konka nobasa kwebuza ngu: ‘Bibuli ekaruga nkahe? Omuhandiki wayo ni oha?’ Kugira ngu tutunge ebyokugarukamu by’ebyo bibuzo, reka tubanze tushwijume oku obutumwa bwa Ruhanga oburi omuri Bibuli bwatuhikireho.
1. Yaba abantu ari bo bahandikire Bibuli, ni bata oku Ruhanga ari we Muhandiki wayo?
Bibuli ekahandikwa n’abantu 40 omu bwire nk’obw’emyaka 1,600 kwiha omu mwaka gwa 1513 M.Y. kuhisya hihi omu gwa 98 B.Y. Kandi abo bahandiki bayo bakaba bakurire omu mbera ezitari zimwe. N’obu abahandiki ba Bibuli babire bakurire omu mbera ezitari zimwe ebi bahandikire nibyikirizana. Eco kikabasika kita? Ni ahabw’okuba Ruhanga ni we Muhandiki wa Bibuli. (Shoma omu 1 Batesalonika 2:13.) Abo bahandiki tibarahandikire ebitekateko byabo. Ahobwe, bakaba ‘nibagamba ebyaruga ahari Ruhanga nibakoresibwa omwika oguri kwera.’ * (2 Petero 1:21) Ruhanga akakoresa omwika gweye oguri kwera gwatuma bahandika ebitekateko byeye.—2 Timoseo 3:16.
2. Ni oha owu Bibuli eri kubasa kugasira?
Obutumwa bw’omuri Bibuli nibubasa kugasira ‘amahanga gona, enganda n’endimi n’abantu’. (Shoma omu Kushuuruurwa 14:6.) Ruhanga akakora ekiri kubasika cona ngu Bibuli erebeke omu ndimi nyingi kukira ebindi bitabo byona. Abantu bona nibabasa kushoma Bibuli. Nibabasa kugishoma ahu bakuba batwire hona ninga shi orurimi oru bakuba bari kugamba rwona.
3. Ni bata oku Yehova yarinzire Bibuli?
Bibuli ekaba yahandikirwe aha bintu ebitari kubasa kumara obwire buringwa, nk’aha mpu z’enyamishwa. Konka abashija ababire nibakunda Bibuli bakagikoporora betonzire bakoresize engaro zabo. N’obu abategeki bagerizeho kucwa Bibuli, abandi bantu bo bakata amagara gabo omu kabi kugira ngu bagirinde. Yehova tarikiririze ekintu cona ninga omuntu wena ngu kimuzibire kugamba n’itwe. Bibuli negamba ngu: ‘Ekigambo ca Ruhanga witu kiryagumaho ebiro byona.’—Isaaya 40:8.
YEGA BYINGI
Reba oku Ruhanga yakwasize abashija kuhandika Bibuli, oku yagirinzire, n’oku yatumire yahika aha bantu bingi.
4. Bibuli negamba Omuhandiki wayo
Zana VIDIYO. Bwanyima, mushome omuri 2 Timoseo 3:16, rero muganire ahari ebi bibuzo.
-
Yaba abantu ari bo abahandikire Bibuli ahabw’enki eri kwetwa Ekigambo ca Ruhanga?
-
Mbehi notekateka ngu ni ahabw’enki Ruhanga yakoresize abantu ngu bahandike ebitekateko byeye?
Omukama nabasa kushaba omuhandiki weye ngu amuhandikire ebaruha, konka ebitekateko ebiri kuba birimu nibiba biri eby’ogo mukama. Ni co kimwe abantu bakahandika Bibuli, konka obutumwa oburimu bukaruga ahari Ruhanga
5. Bibuli ekarindwa ababire bari kugirwanisa
Bibuli ku erabe eri Ekigambo ca Ruhanga obwe ashemerire kugirinda. Enkuru za kare nizereka ku abategeki bagerizeho kucwecereza Bibuli. Abebembezi b’amadini bakaba batari kwenda ngu abantu bashome Bibuli. Konka n’obu abantu bingi babire bari kuhiigwa kandi bari kukangwa kwitwa, bakahayo amagara gabo kugira ngu barinde Bibuli. Kugira ngu tumanye omwe omuri bo, zana VIDIYO, rero muganire ahari ebi bibuzo.
-
Mbehi wamanya amani gona agatirwemu ngu Bibuli egume erinzirwe tikiri kutuma wayenda kugishoma? Ahabw’enki?
Shoma omuri Zaaburi ya 119:97, rero muganire ahari eki kibuzo:
-
Ni enki ecatumire abantu bingi bahayo amagara gabo kugira ngu bahindure Bibuli kandi bagihisye ahari bingi?
6. Ekitabo c’abantu bona
Enkuru z’ebyabireho nizereka ku Bibuli ari co kitabo ecahindwirwe omu ndimi nyingi kandi kikahika hona okukira ebindi bitabo byona. Shoma omu Byakozirwe 10:34, 35, rero muganire ahari ebi bibuzo:
-
Ahabw’enki Ruhanga ari kwenda ngu Ekigambo ceye kihindurwe omu ndimi nyingi kandi kihike aha bantu bona?
-
Ni enki eki ori kukunda ahari Bibuli?
Hihi abantu
100%
b’omu nsi
nibashoma Bibuli omu rurimi oru bari kucenga
Eriho omu ndimi
3,000
yona, ninga shi omu bicweka
5,000,000,000
Ogeranisize, ogu ni omubaro gwa za Bibuli eziri kushohora,
kandi nigukira ogw’ebindi bitabo
ABANTU ABAMWE NIBAGAMBA NGU: “Bibuli ni ekitabo ekikuzire kandi ecahandikirwe n’abantu.”
-
Iwe nokigambaho enki?
-
Ni biha bintu ebiri kwereka ku Bibuli eri Ekigambo ca Ruhanga?
EMPINYE
Bibuli ni Ekigambo ca Ruhanga kandi akakora ekiri kubasika cona ngu abantu bona bagibone.
Wayega ki?
-
Twagamba ngu Ruhanga akakoresa abantu ngu bahandike Bibuli, nituba turi kumanyisa ki?
-
Ni enki ekiri kukushemeza aha bikwatirine n’oku Bibuli yarinzirwe, oku yahindwirwe n’oku yajanjire?
-
Noyehurira ota wamanya ku Ruhanga yatireho ago mani gona kugira ngu agambe n’iwe?
CONDOZA
Shoma enkuru eziri kukwata ahari Bibuli, kwiha omu bwire bwa kare kuhisya omuri obu bwire.
“Oku Bibuli yatuhikireho” (Musisimuke!, Okwikuminakumwe 2007)
Reba oku Bibuli yarinzirwe ebizibu bishatu.
“Bibuli ni ekitabo ecarinzirwe” (Omunara g’Omurinzi No. 4 2016)
Reba ebizibu ebi abantu abahindwire Bibuli babugine.
Bibuli ekakopororwa kandi yahindurwa omu ndimi nyingi. Ni bata oku ori kubasa kwesiga ku obutumwa oburimu butarahindukire?
“Mbehi obutumwa bw’omuri Bibuli bukahinduka?” (Enkuru z’ahari intaneti)
^ Nk’oku turije kukishwijuma omu ishomo rya 7, omwika oguri kwera ni amani ga Ruhanga.
