NSUNZO 05
Bibilia Muselu Onivahile Mulugu
Yehova oniperhekela mvaho wattima vaddiddi: Bibilia. Bibilia otaganyihiwa wa manivuru mang’ono owakwana 66. Txino weyo onovivuza: ‘Bibilia odhile wuvi? Bibilia Mwinyaya bani?’ Wi nakule mavuzo aba, vamaromo ndoweni none mukalelo onifiyedhe mazu a Mulugu, Bibilia.
1. Akala attu amulebile Bibilia, Mulugu odhile dhavi okala Mwinya?
Bibilia olebiwe n’attu owakwana 40, mwari mwa vyaka 1.600, oromana yaka 1513 A.E.C. ofiyedha yaka ya 98 E.C. Vina mwa anamalebaya ahikalavo akumbuzi, anamattadda, amwene; kuloga aali attu ottiyana vaddiddi. Masiki dhawene dhipaddi dhotene dha Bibilia dhinowiwanana. Ejiya ewodheyile dhavi? Sabwani Mulugu ddilí mwinya wa Bibilia. (Kengesa 1 Tesalónika 2:13.) Anamalebaya kaleba esile dhobuwelani anya. Awene “eddihiwaga na muya wokoddela, àloga na nzina na Mulugu.” * (2 Pedro 1:21) Mulugu olabihedhe muya waye wokoddela wi aweddihe vina awubuwelihe anamalebaya dhafuniye wi dhilebiwe.—2 Timóteo 3:16.
2. Bibilia olebeliwe ani?
Mulugu omulebihile Bibilia wi ‘attu a vati, a vilabo, a mahimo, a vilogelo, a malogo otene’, ewe miselu dhaye dhapama. (Kengesa Ovuhulela 14:6.) Nona Mulugu ohikosiha wila Bibilia akalewo na dhilogelo dhinjidhene opitta manivuru mena. Attu otene ahikana ewodhelo ya omwengesa Bibilia. Kintanala elogelo yawa.
3. Yehova ombarele dhavi Bibilia?
Bibilia walebiwe vamapapini ahinrutxa onongeya, ninga papiro na ttebe dha vinama. Mbwenye attu amuttittimiha Bibiliayá ahimukoya mwa olebelaga mazuya dhipaddi dhina wi ananongeye. Masiki attu a ewodhelo atamelaga omuttolotxa Bibilia, attu ena ahika egumi yawa vangovini wila ambarele. Yehova kattiyile nne elobo modha omutximiha ologa na iyo. Kavali waganyedha wi “Nzu na Mulugu wehu ninokalawovi.”—Izaiya 40:8.
KASUNZAVI
Kasunza mukalelo ovudheleliwe attu muya wa Mulugu wila amulebe Bibilia, kaziwa mukalelo obareliwiyena, vina dhikosile Mulugu wi attu a malogo otene awodhe okana Bibilia.
4. Bibilia ononiziwiha Munyaya
Karumiha VIDIYU. Mugamala mwengese 2 Timóteo 3:16, vina mutanaalele mavuzo aba:
-
Akala attu amulebile Bibilia, enlogeliwa eni wi nzu na Mulugu?
-
Weyo onubuwela wi jamalago orumela wi Mulugu ohavudhelela attu dhubuwelo dhaye wila alebe?
Enowodheya namaleba wamparha wa mabasa oleba karta, mbwenye kartaya kinkala yaye, enkala ya mwinya wamparha wa mabasaya. Yakakene jipadduwile na Bibilia, olebiwe n’attu, mbwenye miseludha mwinya ddi Mulugu
5. Attu enjene ahitamela omutolotxa Bibilia, mbwenye kawodhile
Akala Bibilia nzu na Mulugu, txibarene yali yojedheleya wi iyene agahimbarela. Movira wa masaka attu a ewodhelo ahitamela omutolotxa Bibilia. Asogorheli a marelijiau annakoddiha attu okana Bibilia. Masiki na ofara-fwariwa oku, attu ena anika egumi yawa vangovini wi ambarele Bibilia. Ninfuna nimuziwe muttu mmodha ombarele Bibilia, karumiha VIDIYU, mugamala mutanaalele mavuzo aba:
-
Oziwa wila attu ena ahimbarela Bibilia, enouttukulela ofuna omwengesavi? Sabwaya?
Kengesa Masalmo 119:97, mugamala mutanaalele nivuzo ntti:
-
Txini yattukulele attu enjene wika egumi yawa vangovini wila amutapulele vina ampake Bibilia?
6. Nivuru nisasanyeliwe attu otene
Bibilia nivuru nitapuleliwe vina nipakiwe opitta manivuru mena. Kengesa Merelo 10:34, 35, mugamala mutanaalele mavuzo aba:
-
Mulugu onfunela eni wila nzu naye nitapuleliwe vina nipakiwe na dhilogelo dhinji?
-
Txini enutikiniha mwaha wa Bibilia?
Waddamela
100%
wa attu a elabo yotene
anowodha omwengesa Bibilia na elogelo yawa
Ohimala okalawo na dhilogelo dhowakwana
3.000
languages
ohikalawo wetene obe wa mpaddi muttengo wa
5.000.000.000
Obu muttengo onaddamela maBibilia apidiwe,
opitta nivuru-nivuruvi
ATTU ENA ANLOGA WI: “Bibilia nivuru nawale nilebiwe na attu dhahene ninga enlebiwa manivuru meena.”
-
Weyo ononamo dhavi?
-
Dhilobo gani dhinoniha wi Bibilia nzu na Mulugu?
OGWADDELA
Bibilia nzu na Mulugu, nona iyene ohikosiha wi attu otene akaane nivuru ntti.
Kobuwela Dhisunziliwe
-
Ologa wi Mulugu ohavudhelela attu muya waye wokoddela wi amulebe Bibilia, enfuna etapulele eni?
-
Txini enutikiniha na mukalelo obareliwe, ontapuleliwa vina ompakiwa Bibilia?
-
Weyo onviwamo dhavi mwa ozinddiyela guru yotene ekosile Mulugu ya obarela nzu naye wila nufiyedhe?
TAMELÁ ONONELAMO DERETU
Kengesa mapadduwo a Bibilia —Oromana mapapi a wale ofiyedha aba antapuleliwa ovanene.
“Como a Bíblia Chegou até Nós” (Despertai!, Novembro de 2007)
Kanonelamo mukalelo oviluwile Bibilia mwari mwa dhawopiha ttaru dha otameliwa otolotxiwa.
“A Bíblia—Uma História de Sobrevivência” (A Sentinela, N.º 4 de 2016)
Koona ngovi yafwanyiwa attu atamela omutapulela Bibilia.
Bibilia ohipidiwa vina ohitapuleliwa dila dhinjene. Txini enuttukulela orumela wi muselu wa Bibilia kusadduliwe?
