Jehovah nih a kan pekmi a ṭha tukmi laksawng pakhat cu uk 66 in komhmi Baibal cauk a si. Asinain hitin na ruah men lai: ‘Baibal cu khoika in dah a rat? Baibal ṭialtu cu ahodah a si?’ Mah biahalnak a phi hngalh awkah kan sinah Baibal in Pathian bia phuan a si ning kong kha hlathlai.

1. Baibal cu minung nih an ṭialmi a si ahcun Pathian sinin a ra tiah zeicah kan chim khawh?

Baibal cu minung 40 hrawng nih BC 1513 in AD 98 tiang kum 1,600 chung hrawng ah an ṭialmi a si. A ṭialtu hna cu hnulei sining a phunphun a ngeimi an si. Asinain Baibal cu aa ralkahnak a um lo. Mah cu zeitindah a si khawh? Pathian cu Baibal Ṭialtu a si caah a si. (1 Thesalon 2:13 rel.) Baibal ṭialtu hna nih anmah ruahnak kha an ṭialmi a si lo. Mah canah “Pathian sinin a rami bia kha mi nih an chim tikah, thiang thlarau nih a fial hna caah a si.” a (2 Peter 1:21) Pathian nih a thiang thlarau hmangin a ruahnak kong ṭial awkah mi pawl kha thaw a chuah hnawh hna asiloah a forh hna.—2 Timote 3:16.

2. Baibal in ahote dah ṭhathnemhnak a hmu kho?

Baibal ah hmuhmi thawngṭha in “phun kip, ram kip, holh kip le mi kip” ṭhathnemhnak an hmu kho. (Biathlam 14:6 rel.) Pathian nih a dang cauk nakin Baibal kha holh phun tampi in hmuh khawh a si nakhnga a timhtuah. Tuchan ah mi tampi nih Baibal kha an rel khawh cang. Khoika a ummi asiloah zei holh a hmangmi an si hmanhah Baibal in ṭhathnemhnak an hmu kho.

3. Jehovah nih Baibal kha zeitindah a kilven?

Baibal cu saphaw asiloah phaikung ti bantuk saupi a nguh lomi thil hna cungah ṭial a rak si. Asinain Baibal a daw i a sunsakmi hna nih Baibal kha ralring tein an kut in an rak ṭial ṭhan. Nawlngeitu pawl nih Baibal kha hrawh dingin an rak i zuam ko nain cheukhat nih an nunnak thap in ralṭha tein an rak kilven. Jehovah nih kanmah he i chawnhbiaknak cahter awkah zei thil hmanh a awnh lo. Baibal nih hitin a ti: “Pathian bia cu zungzal in a hmun.”—Isaiah 40:8.

 TAM DEUH IN HLATHLAI

5. Ralchanhnak lakah him tein a ummi Baibal

 6. Mi vialte caah cauk pakhat

Tuanbia ah Baibal cu leh bikmi le phawtzamh bikmi cauk a si. Lamkaltu 10:34, 35 rel law mah biahalnak hna hi i ruah u:

• Pathian nih a Bia kha zeicah leh bikmi le phawtzamh bikmi siter a duh?

• Baibal kong he aa tlaiin zeinihdah na lung aan suk?

 A TAWINAK

Baibal cu Pathian Bia a si i mi nih an hmuh khawh nakhnga Pathian nih a timhtuah.

I Ruahṭi Ṭhannak

• Pathian nih mi pawl kha Baibal ṭial dingin thaw a chuahhnawh hna tiah kan ti tikah zei sullam dah a si?

• Baibal him tein a ummi, leh a simi le phawtzamh a simi kong he aa tlaiin zeinihdah na lung aan suk?

• Pathian nih nangmah he pehtlaihnak tuah khawh awkah aa zuam ti na hngalh tikah zeitindah na um?