SIN DING THU 05
Lai Siangtho—Pasian Kiang Pan Hong Pai Kammal
Eite adingin Jehovah hong piak a manpha mahmah letsong khat in, laibu 66 a kigawm Lai Siangtho ahi hi. ‘Lai Siangtho koi bangin kingah a hiam? Lai Siangtho thuneipa in kua a hiam?’ ci-in ngiahsun khathei hi teh. A dawnna na ngah nadingin Lai Siangtho sunga om Pasian’ kammal a kingah dan kikum ni.
1. Lai Siangtho pen mihingte’ at ahihleh bang hangin Pasian’ Thu ci thei ihi hiam?
Lai Siangtho pen B.C.E. 1513 kum panin C.E. 98 kum dong, kum 1600 val sungin mi 40 kiim in na at uh hi. Mi tuamtuamte’ at ahih hangin Lai Siangtho bu khempeuh pen kituak khin hi. Tua pen koici hithei ding a hiam? Lai Siangtho pen Pasian’ Thu ahih man ahi hi. (1 Thesalonika 2:13 sim in.) Lai Siangtho a atte in amau’ lungsim ngaihsutnate a at uh hi lo hi. “Kha siangtho’ a sawlna tawh Pasian’ kiang panin a hong pai thute a kigen ahi zaw hi.” (2 Peter 1:21) Pasian in ama ngaihsutnate a ciamteh dingin a kha siangtho tawh mihingte na lamlak hi.—2 Timoti 3:16, 17.
2. Lai Siangtho pan kuate in hamphatna ngah thei uh a hiam?
“Leitungah a teng mi namkim, pau namkim a zang mite,” in Lai Siangtho sunga a lungdamhuai thu panin hamphatna ngah thei uh hi. (Maangmuhna 14:6 sim in.) Laibu dangte sangin Lai Siangtho pen kampau nam tuamtuam tawh a kingah theih nadingin Pasian in hong vaihawmsak hi. Tua ahih manin mi khempeuh phial in Lai Siangtho sim theita uh hi. Koi koi-ah i om a, bang kampau i zang zongin Lai Siangtho pan hamphatna kingah thei hi.
3. Lai Siangtho pen Jehovah in koi bangin na kemcing a hiam?
Lai Siangtho pen sawtpi a kimang thei lo savun laizial le papyrus a kici laizialte tungah na at uh hi. Ahih hangin Lai Siangtho a itte in limtakin na teikhiakik uh hi. Thuneite in Lai Siangtho pen suksiat a sawm uh hang, nuntakna piakhia-a a kembit mite zong na om uh hi. Mite’ khut sungah Lai Siangtho a tun loh nadinga khaktanna khempeuh pen Jehovah in na phal lo hi. Lai Siangtho in: “Pasian’ thu kho tawntung ding hi,” ci-in gen hi.—Isaiah 40:8.
ZON BEH INLA, MUH BEH IN
Pasian in Lai Siangtho a at dingin mihingte a lamlah dan, Lai Siangtho a kepcing dan, le mi khempeuh in a ngah theih nadingun a vaihawmsak dante kan in.
4. Lai Siangtho in a Thuneipa’ thu lakkhia
VIDEO hong in. Tua khit teh 2 Timoti 3:16, 17 sim inla, a nuai-a dotnate kikum un.
-
Lai Siangtho pen mihingte’ at ahihleh Pasian Kammal hi, ci-in bang hang kigen thei a hiam?
-
Pasian in ama ngaihsutnate Lai Siangtho a atte kiangah theisawnsak thei hi, cih pen ahi thei ding hiam?
Mi khat in a lai atpa zangin lai a atsak mah bangin, Pasian in zong mihingte zangin a thute atsak hi
5. Donate a thuak hang, Lai Siangtho pen suakta-in kipsuak
Lai Siangtho pen Pasian kiang pan hong pai ahih manin, a mangthan loh nadingin tuni ciang dong amah in na kemcing hi. Tangtawng pek a kipan thunei mite in Lai Siangtho suksiat ding na hanciam uh hi. Biakna makaite’n zong mite’ khut sungah Lai Siangtho a tun theih loh nadingin na khaktan uh hi. Ahih hangin mi tampite in langpanna le a lauhuai dinmunte lakah a nuntakna uh piakhia-in Lai Siangtho pen na kembit uh hi. Amaute lak pan mi khat’ thu i theih nadingin VIDEO hong in. Tua khit teh a nuai-a dotnate kikum un.
-
Nuntakna piakhia-a Lai Siangtho a kembit mite’ thu na theihna in Lai Siangtho simnopna lungsim hong neisak hiam? Bang hang hiam?
Late 119:97 sim in. Tua khit teh hih dotna kikum un:
-
A lauhuai dinmunte kawmkalah Lai Siangtho lehkhiat nading le thohkhiat zawh nadingin bang in mi tampite na hanthawn a hiam?
6. Mi khempeuh ading laibu
Lai Siangtho pen a kiletkhia tampen le a kithohkhia tampen laibu ahi hi. Sawltak 10:34, 35 sim in. Tua khit teh hih dotnate kikum un:
-
Pasian in Lai Siangtho pen a kiletkhia tampen le a kithohkhia tampen laibu hi dingin bang hang deih a hiam?
-
Lai Siangtho tawh kisai-in bang in na lungsim hong la a hiam?
Leitung bupa mihing phazah ii
100%
dektak in
amau’ tel kampau ciat tawh Lai Siangtho sim theita
A buppi-in, ahih kei leh a khen khenin
kampau
3,000
val tawh kingah theita hi
5,000,000,000
A kithohkhia khinsa-a a kingaihsun Lai Siangtho bu
laibu dangte sangin tamzaw pek hi
MI PAWLKHATTE’ GEN: “Lai Siangtho pen mihingte’ at khanglui laibu hi lel.”
-
Nangh bangci ngaihsut na hiam?
-
Lai Siangtho pen Pasian’ Kammal hi, a kicih theihna bang thu om a hiam?
TOMLAKNA
Lai Siangtho pen Pasian’ Kammal hi a, mi khempeuh in a ngah theih nadingun Pasian in vaihawmsak hi.
Kikupkikna
-
Lai Siangtho a at dingin Pasian in mihingte lamlak, cih pen bang a cihnopna a hiam?
-
Lai Siangtho kepcinna, lehkhiatna, le thohkhiatna tawh kisai bang in na lungsim hong la a hiam?
-
Pasian in Lai Siangtho tungtawnin nang tawh hong kizop theih nadingin hanciam ahihlam na theih ciang na lungsim bangci om a hiam?
THEIH BEH NADING
Tanglai-a khut tawh a kigelh masapen laite a kipan tu huna lehkhiat Lai Siangtho-te ciang dong, Lai Siangtho’ tangthu sim in.
“Ei’ Hun Ciang Dong Lai Siangtho A Kipsuak Dan” (Khanghlo In!, November 2007)
A lauhuai dinmun thum kawmkalah Lai Siangtho a kipsuak dan kan in.
“Lai Siangtho—Nungta-in A Kipsuak Dan” (Vilnatausang No. 4 2016)
A nuntakna uh kipiakhia ngam zah donga Lai Siangtho a lehkhiat dan uh en in.
Lai Siangtho pen tamveipi kitei-in kiletkhia hi. Lai Siangtho sunga thute pen kikhel lo-in a omsa thu bang lianin omlai ahihlam bangci um thei ding na hiam?
a Kha siangtho cih pen Pasian’ zat vangliatna ahihlam Sin Ding Thu 07-ah kikum ding hi hang.
