SHIRONGWA 05
Bibeli mbudi yaKarunga kukwetu
Jehova kwa tupa ushwi wauwa Bibeli, omo mwa karo mbapira 66. Ngoli, kuvhura u kupure ashi: ‘Kuni ya tunda Bibeli? Are mwenyayo?’ Mukuwana malimbururo, tu kona-kone omo mbudi yaKarunga yamuBibeli yaya tika kwetu.
1. Ntjeneshi vakafumu va yi tjangiro Bibeli, weni yi kara ashi mwenyayo Karunga?
Bibeli kwa yi tjangire vatjangi 40. Yayo kwa ghupire mwaka 1 600 kutundilira mumwaka 1513 kumeho yakuya Jesus palivhu dogoro kuviha vyamwaka 98 pashirugho shetu. Vatjangi kwa tundilire kuntundiliro dakukushuva-shuva. Mpili ngoli, Bibeli yakuwa. Weni-weni? Morwa Bibeli kwa tunda kwaKarunga. (Varura 1 Tesalonika 2:13.) Vatjangi kapi va tjangire maghano ghavene. Ngoli vavo “kwa ghambire vyakutunda kwaKarunga momo ya va yenditire mpepo yakupongoka.” a (2 Petrus 1:21) Karunga kwa rughanitire mpepo yendi yakupongoka mukuvayendita nakuvatumangeda va tjange maghano ghendi.—2 Timotheus 3:16.
2. Vare va karo naBibeli?
“Dimuhoko nadintje, marudi, maraka navantu navantje” kuvhura kuwanenamo mauwa mumbudi yayiwa yamuBibeli. (Varura Lishorwero 14:6.) Karunga kwa yivilita ashi Bibeli yi kare mumaraka ghamangi kupitakana mbapira dapeke muudjuni. Kunyara kehe muntu kuvhura kuwana Bibeli vi kare ashi kuni a tunga ndi liraka munke a ghambanga.
3. Weni Jehova a ghamenine Bibeli?
Bibeli kwa yi tjangire pavininke vya kudjonauka wangu, yira pavipapa nambu. Ngoli vakafumu ovo vaholiro ngudu Bibeli kwa yi tjwangwilire vikando vyavingi. Mpili momo vamwe va kaliro nankondo va shanine kuyidjonaurapo, ngoli vapeke va tulire liparu lyavo mushiponga mukuyighamena. Jehova kapi a pulitira kehe shininke ndi kehe ghuno vi mu kondere kughamba natwe. Bibeli kwa ghamba ashi: “Nkango yaKarunga wetu kukara naruntje.”—Jesaya 40:8.
TEDA KO
Kushonge omo Karunga a yenditire vakafumu mukutjanga Bibeli, omo a yi ghamenine nomo a renkitire vantu va yi wane.
4. Bibeli ya shingonona mwenyayo
Kengera VIDIYO. Ntani varura 2 Timotheus 3:16 makura timwitirenu mapuro ghano.
-
Ntjeneshi vakafumu va yi tjangiro Bibeli, nke va yi twenyenanga ashi Nkango daKarunga?
-
Wa vi pura shiri ashi Karunga ndje a tapiro magano kuvakafumu ovo vatjangiro Bibeli ndi?
Kamutjangi kuvhura a tjange ntjangwatumwa, ngoli mbudi yamo yogho ana mu tantero a yi tjange. Mukukufana, vakafumu kwa tjangire Bibeli ngoli mbudi yamo kwa tundire kwaKarunga
5. Bibeli va yi ghaminine kumahomokero
Ntjeneshi Bibeli kwa tunda kwaKarunga, kutuvitaterera ashi ghuye kwa yi ghamena. Mwayendo mwaka, vakafumu vankondo kwa shanine kuyidjonaura po. Ntani nka vampititi vamaukareli kwa shanine kuyihoreka. Mpili ngoli pa kalire mahomokero namatjilito ghamfa, vantu vavangi va tulire liparu lyavo mushiponga mukughamena Bibeli. Pakuyiva mukafumu umwe a ghamenino Bibeli, kengera VIDIYO, makura timwitirenu mapuro ghano.
-
Pakumona omo va yi ghamenine Bibeli, vina kurenkita u kare nashihoro shakuyivarura ndi? Morwanke?
Varura Pisalme 119:97 makura timwitirenu lipuro lino:
-
Vinke vya renkitiro vantu vavangi va ture liparu lyavo mushiponga mukutoroka nakutapayera Bibeli?
6. Mbapira yavantu navantje
Bibeli mpantjayo mbapira vatoroka nakutapayera unene po mulihistoli lyavantu. Varura Virughana 10:34, 35, makura timwitirenu mapuro ghano:
-
Morwanke Karunga a shanena Nkango dendi va di toroke nakuditapera nakuntje?
-
Nke vina kuteturo kuhamena Bibeli?
Hambara
VANTU NAVANTJE
udjuni mudima
kuvhura kuwana Bibeli muliraka va yuvhanga
Kwa kara mumaraka kupitakana
3 000
Bibeli nayintje ndi marugha ghamwe
5 000 000 000
Kuna kara shivaro shaBibeli va nduruka osho va ngungunyukira.
Shivaro osho kwa pitakana mbapira dapeke
VAMWE KUGHAMBA ASHI: “Bibeli mbapira ya kare va tjanga vantu.”
-
Weni ghuna kughayara?
-
Maumbangi munke ghana kuneghedo ashi Bibeli Nkango daKarunga?
LIKAMO
Bibeli Nkango daKarunga ntani uye kwa yivilita ashi vantu navantje va vhure kuyiwana.
Livyukuruko
-
Nke vina kutanta ashi Karunga kwa yenditire vakafumu va tjange Bibeli?
-
Nke vina kukutetukito kumahena omo va ghamena, va toroka nakutapera Bibeli?
-
Weni una kukuyuvha pakuyiva ashi Karunga a kutuliremo ngudu mposhi a ghambaghure nove?
YIVAKO VYAVINGI
Varura kuhamena lihistoli lyaBibeli kutundilira kumatoroko ghakare dogoro nagha ghamayuva ghetu.
Kushonge u yive omo Bibeli ya paruka mahomokero matatu ghamanene.
“Bibeli—omo va sheteka kuyidjonaghura po” (Ruhungu No. 4 2016)
Kona-kona u kenge omo vantu va tulire maparu ghavo mushiponga va toroke Bibeli.
Bibeli kwa yi tjangurura nakuyitoroka vikando vyavingi. Weni om u yivilita ashi mbudi yamo kapi ya runduruka?
a Mushirongwa 7 ngatu kakushonga ashi mpepo yakupongoka kuna kara nkondo daKarunga.
