LESONI 05
Na iVolatabu e iTukutuku ni Kalou Vei Keda
O Jiova e solia vei keda na iVolatabu, qo e isolisoli talei dina. E tiko kina e 66 na ivola. Ia o na rairai taroga: ‘E basika vakacava na iVolatabu? O cei e vakavuna?’ Me saumi na taro qo, meda veivosakitaka na sala e vakarautaki kina na itukutuku ni Kalou, na iVolatabu.
1. Ke ra vola na tamata na iVolatabu, cava e tukuni kina ni vakavuna na Kalou?
Rauta ni le 40 era vola na iVolatabu ena loma ni 1,600 na yabaki, mai na 1513 B.G.V. ina rauta na 98 G.V. O ira qo e duidui na kedra ituvaki. Ia e sega ni veisaqasaqa na lewe ni iVolatabu. E rawa vakacava qo? Ni vakavuna na Kalou na iVolatabu. (Wilika 1 Cesalonaika 2:13.) Era sega ni vola na ka era nanuma, era “tukuna ga . . . na ka e vinakata na Kalou ena veiuqeti ni yalo tabu.” a (2 Pita 1:21) Na Kalou e vakayagataka na yalona tabu me uqeti ira na tagane qo mera vola na nona nanuma.—2 Timoci 3:16.
2. O cei ena yaga vua na iVolatabu?
E yaga na itukutuku vinaka ena iVolatabu vei ira “na veimatanitu, na veiyavusa, na duivosavosa, kei na tamata kece.” (Wilika Vakatakila 14:6.) E raica na Kalou me volai na iVolatabu ena levu na vosa ni vakatauvatani kei na vo ni ivola. Voleka ni tamata kece era rawa ni wilika se rogoca na iVolatabu se mani vanua cava era tiko kina se vosa cava era vosataka.
3. E maroroya vakacava o Jiova na iVolatabu?
E volai na iVolatabu ena iyaya e ca rawarawa me vaka na kuli ni manumanu kei na kuta. Ia o ira na vakamareqeta na iVolatabu era qarauna mera lavetaka vinaka nira volavola. Era saga eso era vakaitutu mera vakarusa na iVolatabu, ia eso tale era solibula mera taqomaka. E sega ni vakatara o Jiova me dua se dua na ka me tarova nona vosa vei keda. E kaya na iVolatabu: “Na vosa ni noda Kalou e tudei me tawamudu.”—Aisea 40:8.
VAKEKELI
Vulica eso tale na ka ena nona uqeta na Kalou me volai na iVolatabu, nona maroroya kei na nona vakarautaka vei keda na kawatamata.
4. Na iVolatabu e tukuni koya e vakavuna
Sarava na VIDIO.Wilika na 2 Timoci 3: 16, qai veivosakitaka na taro tarava.
-
Ke vola na tamata na iVolatabu, cava e tukuni kina ni Vosa ni Kalou?
-
O vakabauta ni rawa vua na Kalou me vakadewataka nona nanuma vei ira na vola na iVolatabu?
E vola o vunivola na ka e tukuni vua, e vaka kina o ira na vola na iVolatabu. Na kena itukutuku e vu mai vua na Kalou
5. E sega ni vakarusai rawa na iVolatabu
Ke vakavuna na Kalou na iVolatabu eda namaka me na maroroya. Ena veigauna sa oti era saga na vakaitutu mera vakarusa na iVolatabu. Era saga na iliuliu ni lotu mera vunitaka. Ia e levu era solibula mera taqomaka na iVolatabu nira tusaqati se ni sagai mera vakamatei. Mo kila e dua vei ira qori, sarava na VIDIO, qai veivosakitaka na taro tarava.
-
E levu na ka era cakava eso me taqomaki kina na iVolatabu, vakacava e uqeti iko qo mo wilika? Na vuna?
Wilika Same 119:97, qai veivosakitaka na taro qo:
-
Na cava e uqeta e levu mera vakadewataka na iVolatabu ra qai veisoliyaka?
6. Na ivola vei keda kece
Na iVolatabu na ivola e vakadewataki vakalevu duadua qai veisoliyaki ena ivolatukutuku ni kawatamata. Wilika Cakacaka 10:34, 35, qai veivosakitaka na taro qo:
-
Na cava e vinakata kina na Kalou me vakadewataki vakalevu qai veisoliyaki na nona Vosa?
-
Na cava o taleitaka me baleta na iVolatabu?
Voleka ni
100%
na lewe i vuravura
era wilika se rogoca na iVolatabu ena vosa era kila
Vakarautaki ena sivia na
3,000
na vosa
taucoko se vakatikina
5,000,000,000
Na iwiliwili e nanumi e tabaki,
e levu duadua ni vakatauvatani kei na vo tale ni ivola
KA ERA KAYA ESO: “Na iVolatabu na ivola makawa era vola ga na tamata.”
-
Na cava o nanuma?
-
Na cava e vakaraitaka ni vosa dina ni Kalou na iVolatabu?
KA O VULICA
Na iVolatabu e Vosa ni Kalou. E raica o koya me vakarautaki vei keda na kawatamata.
Railesuvi
-
Na cava na kena ibalebale ni tukuni ni uqeti ira na tamata na Kalou mera vola na iVolatabu?
-
Na cava o qoroya me baleta na maroroi ni iVolatabu, na kena vakadewataki kei na kena veisoliyaki?
-
Na cava o nanuma me baleta na nona sasaga na Kalou me vosa vei iko?
IKURI
Wilika na ivolatukutuku ni iVolatabu, mai na ivolavivigi taumada ina kena vakadewa ni gauna qo.
“Na Cava e Sega ni Vakarusai Kina na iVolatabu?” (Yadra!, Noveba 2007)
E tolu na ka e rawa ni vakavuna na kena vakarusai na iVolatabu. Vulica na sala e maroroi kina.
“Na iVola e Sega ni Kawaboko Rawa” (Na Vale ni Vakatawa Nb. 4 2016)
Raica nodra solibula eso mera vakadewataka na iVolatabu.
Na iVolatabu e lavetaki qai vakadewataki vakalevu. O na vakadeitaka vakacava ni se donu tiko ga na kena itukutuku?
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
