Kpá Káí dú gbele lé dõ̀ònù ea aa bá Jìhóvà, vaá à fáálá 66 kà kpá. Sõò òó láá bugi togó kọọ̀: ‘Kpá Káí aa ãà ẽ? Mée ní e Kpá Káí aa bá ẹ́?’ Kọbé è láá aalá gbò bíbví, èé zẹ́ẹ́ ló bel boo bé e lẹ̀ẹ̀la tóm ea aa bá Bàrì ea di mm̀ Kpá Káí beè tení naa ináí ló.

1. Beè gbò nen ní e ba beè emí Kpá Káí é, éé ní ea náa vaá è kọọ̀ Kpá Káí aa bá Bàrì e?

Dénè gbò e ba beè emí Kpá Káí tóólá 40 nen, vaá a beè tú nú ea é láá dú 1,600 gbáá besĩ́ à kálá dú gè emí lọ̀l, naamá lọl mm̀ gbáá 1513 B.C.E. tẹlẹ nú ea é láá dú 98 C.E. Gbò e ba beè emí Kpá Káí beè aa kele-kele ketõ̀ò. Sõò gbò nú e bà émí náa béá ene. Éé ní ea náa kọ níí á valí é? Boo béè kọọ̀ Bàrì ní e Kpá Káí aa bá ẹ́. (Bugi 1 Tẹ̀sàlónaikà 2:13.) Gbò e ba beè emí Kpá Káí náa beè emí ba bùlà. Tãa vó, “nyómá káí ní ea beè tú gbò nen kọọmá bùlà Bàrì e.” a (2 Pítà 1:21) Bàrì beè tú a nyómá káí nè gbò nen naa ní e bà láá emí gbò a tóm̀ bùlà.—2 Tímotì 3:16.

2. Mée ní e Kpá Káí é láá dọ̀ bélè nèe?

Gbò lé kpẹ̀a ea di mm̀ Kpá Káí é láá dọ̀ bélè nè “kọ̀láá kà dó nè tẽ́ gã nè dém bel nè gbò nen.” (Bugi Kùùà Nù 14:6.) Bàrì a náa kọ bàá láá tàb Kpá Káí nvee mm̀ gã́bug dém bel èlmà kọ̀láá kà kpá ea dì. Gã́bug nen deè nieí a íe nèà deè ge láá bugi Kpá Káí. Vaá níí náa dẹẹ̀a boo kiẽ́e e nen dì àbèè a dém bel.

3. Mósĩ́ deè ní e Jìhóvà ni kpenà Kpá Káí é?

Ba beè emí Kpá Káí dẽè gbò nú e náa ólò bĩé, dì belí úl kpá e bà tú kpá nom àbèè papyrus naamá. Sõò gbò nen e bà vulè Kpá Káí beè tú ọ̀ẹ̀ dẽe emá gbõ̀ònà nú ea di mm̀ Kpá Káí nvee dẽè dõòna kà gbò nu. Náa kal ló béè kọọ̀ sìgà gbò e bà íe kpóó beè pììga boo gè kyọ̀sĩ́ Kpá Káí, dõòna gbò beè di kpènà ló gè pee ba dùm boo béè ge kpènà Kpá Káí. Jìhóvà gáà zìgà kọọ̀ tọ́ọ̀ nen àbèè nu á oomàèe lọl ló gè ló bel nèi. Kpá Káí kọ́ọ̀: “Moǹ bel bẹẹ Bàrì dì dọ̀ọ̀mà dè-dè.”—Àìzáíà 40:8.

 KPÁÁ NÓ BỌ̀Ọ̀VẸ̀

5. Kpá Káí a ful zelí bá gã́bug nàà uú boo

 6. Kpá ea dì nè kọ̀láá nen

Kpá Káí ní ea dú kpá e bà tab nvee mm̀ gã́bug dém bel vaá naa kọ á iná ló gbò nen èlmà kọ̀láá kà kpá ea dì e. Bugi Tóm 10:34, 35, vaá ò gbóó aalai gbò bíbví:

• Éé ní ea náa vaá Bàrì à gbĩ́ kọọ̀ bàá tàb a Moǹ Bel nvee mm̀ gã́bug dém bel vaá naa kọ á iná ló gbò nen ẽ́?

• Éé ní ea náa vaá Kpá Káí à leemá ni ẽ́?

 NÚ E NI NÓ

Kpá Káí dú Moǹ Bel Bàrì, vaá a náa kọ á iná ló kọ̀láá nen.

Ge Òòa Boo

• Éé ní e gè kọọ̀ Bàrì beè tú a nyómá káí nè gbò nen kọ bàá emá Kpá Káí tõó dọ̀ ẹ?

• Éé ní ea léémá ni ea kil ló bé e bà náa beè láá kyọ̀sĩ́ Kpá Káí naa, bé e baa ni tab nvee mm̀ gã́bug dém bel naa, nè bé ea ni íná ló gã́bug nen naa ẽ́?

• À tõó ní ló naa vàẹ gè nyimá gbò nú e Bàrì beè naa kọbé à láá ló bel nè ni ẽ́?