Zehova aa mɛinɛɛ kɛnɛ kɛ guɔ, yai a Biblə. Gaa a hɛɓɛ yili 66 pɛlɛɛ gee ɓa. Ya pɛli kiɛ ə́ kpɔɔ maaləngɛi, yɛ́ ma nukanŋaa di tɛɛ ləi diɛ Biblə hɔlɔɓo ? Gbɛɛ lawoo ɓə ɉu ? Gu lono kɛ gɛɛmaalənŋaa tii mukulaaɠaa mɛi.

1. Akɛ nukanŋaa ɓə Biblə pɛɛn, lə mɛni ɓa gwa kɛ ma ə həɠə Yálá yəi ?

Hinaa 40 ɓə Biblə ŋɔ hɛɓɛ yiliɠaa pɛɛn. Di ɉɛɓɛ yili doloo pɛɛn aa kɛ kea yɛ kwəlan 3 500, ə lɛɛ di gbəli pɛɛn aa kɛ kea yɛ kwəlan 1 900. Bɛɛnnua di ho həɠə kɛɛnaa tɔnɔ ə lɛɛ di kɛ kólóɠaa ho kɛ tanɔn. Gwa gɔɔmaa həɠə, daɠaa di kɛ a hɔwɔleekpɛnua, tɔɔɓəlaa, tiikɛnua. Pələi ma gaa la tii, mɛniɠaa di bɛɛn a li gee pɔ. Yili a pɛli kɛi ləi ? A pɛli kɛi, maahɔlɔɓo Biblə kaa a hɛɓɛ yii a həɠə Yálá yəi. (Tesalonikə dɔlɔɔ 2:13 ɓo). Biblə pɛɛnnua di ho di kpɔɔkpɔɔ kiliŋahiɛ pɛɛn, kəlaa “ Nii-Maahəɠɛɛ ɓə kɛi di kəlaa pono diɛ mɛniɠaa ɓo a ” (Piɛrə veelɛ 1:21). Yálá ə hwaa nua pɔ ŋɔ nii-maahəɠɛɛ haalai ə gɛ di ŋɔ kiliŋahiɛɠaa pɛɛn (Timote veelɛ 3:16).

2. Gbɛɛ nua ɓə da pɛli ma di Biblə hɔlɔɓo ?

Nwɛlɛɛ lɛlɛɛɠaa Biblə hu, “ híín-woo kəlee, híín-lɔi kəlee, nu huwu kəlee, híín-woo ɓo nua kəlee ” da pɛli dɔlɔ kulɔi (Kulɔ ponoŋa hɛɓɛ 14:6 ɓo). Háákələi, Biblə hu woo pɛɛn híín-woo tamaa hu ə tɛɛ hɛɓɛ lɔpee gəlee ɓa. Ɓɛi lɔpee gəlee nu ə ma kɛ laa, híín-woo lɔpee gəlee ə ma mo, gwa pɛli gu mo guɔ ma Biblə a pɛli ə kɛ nu kəlee yəi.

3. Mɛni ɲɔnwɔɔ ləkɛɛɠaa ɓə kɛi pa Biblə maamɛni pilii ɉu ə lɛɛ Zehova ə ɲɛi kɛ ləi Biblə ɓa ?

Di Biblə pɛɛn hɛnŋaa mɛi diɛi di ho a lamu ɉɛnŋaa. Nuai Biblə wɛli ə kɛ diɛ, di di wɔ lowai həɠə di Biblə pɛɛn kpɔ a nɛlɛɛ. Ɲɛitɔwɔnua taɠaa ə ma kɛ kalan gwidiɠiɠaa di kɛ bɔ di Biblə maamɛni pili ɉu. Pələi ma ə kɛ la tii, nua di hɔlɔɓo diɛ Biblə maakpɛ ə ma kɛ da hwɛɠɛ kɛ a di wɔ yɛnɛɛ. Zehova ho nu lɔpee ta lɛɛ la ə ma kɛ mɛni lɔpee ta yii a pɛli kɛ ə kpean dɔwɔ yii yaan Nawoo yɛ pɛli həlii guɔ. Biblə kaa kɛi ma : “ Guɔ Yálái woo nwɛi gaa lɔ laa a yələ kəlee ” (Esai 40:8).

 Ə́ WƆ MƐNIKƆLƆNŊAA TA PƐLƐ MA

5. Biblə maamɛni ə kɛi pa pilii ɉu, kəlaa yili ho pɛli

 6. Hɛɓɛ yii nu kəlee a pɛli da hɔlɔɓoi

Ɉɛɓɛi daa ɉu woo pɛɛn kpɔ kɛnɛ ə lɛɛ daa ɲaakwɛlɛ lɔi mɛi naa kəlee ya ɓaa Biblə. Gɛlaɠaa 10:​34, 35 ɓo, ə lɛɛ ka lono kɛ gɛɛmaalənŋaa ŋɛi mɛi :

• Lə mɛni ɓa Yálá kaa bɔ di Nawoo hu woo pɛɛn kpɔ kɛnɛ ə lɛɛ di ɲaakwɛlɛ lɔi mɛi naa kəlee ?

• Lə ɓə nwɛli aa too yɛ́ yii hwilɛn na Biblə ɓa ?

 YII GU GALAN

Biblə kaa a Yálá Lawoo ə lɛɛ Yálá a mɛni kəlee kɛ yii yaan nukanŋaa kəlee diɛ pɛli da hɔlɔɓoi.

Nɛɛ ə́ kili pɔ

• Da kɛ ma Yálá ə gɛ nukanŋaa di ŋɔ kiliŋahiɛɠaa pɛɛn Biblə hu, yili mukulaa ɓaa lə ?

• Mɛniɠaa Yálá ə gɛ yii yaan Biblə maamɛni ho pili ɉu, diɛ pɛli ɉu woo pɛɛn kpɔ kɛnɛ ə lɛɛ diɛ ɲaakwɛlɛ lɔi mɛi naa kəlee, ya ə́ kiliŋahiɛ mɛniɠaa tii kəlee diɛ, lə ɓə a gɛ yɛ́ ?

• Mɛniɠaa kpɔ Yálá aa gɛ yii yaan guɔ pɛli nawoo hɔlɔɓoi, ya ə́ kiliŋahiɛ mɛniɠaa tii kəlee diɛ, lə ɓə yili a gɛ yɛ́ ?