Bibliayu 66 librosmerakatik Jeupa namun purø tapik keta tranik køn. Inchentø ñi paya mørintre: “¿Biblia chukutri atrera? ¿Mu pørik kera?”. Ilan løtøntrap, møyankatik Tiuswai wam maik puikwan asimpe.

1. ¿Biblian møkelø pørik køpentø chinchakutri Tiuswainukkutri atrupik køn chipelø kø?

1.600 pilameraken køn Biblian 40 møkelø pørinukkutri, 1513 pilasrø Jesucristo mukapatø pørøp mentikpe, 98 pilasrø Jesucristo uninukkutri patsøkaik køn. Biblian pørøp møkeløpe puailø køp, waachamerakucha kuik køn, treek kuintøkucha Biblia pekmay pekmay kømø kantø kua lataik pørik køn. ¿Chintimpatre øyeek kø? Kakentø Biblian Tius pørtrain karuik køn (leu 1 Tesalonicenses 2:13). Ik møkeløpe nømui isuiktøka pørmuik køn “treeg kømøtø, møguelø waminchippe, Espíritu Santo maig wamindingaruben, treeg waminchibelø købig køn” (2 Pedro 1:21). a Tius nui isuikwan espíritu santotøka eshkawa pørik køn (2 Timoteo 3:16).

2. ¿Biblian tøkakøntrapelø mumeratø kera?

“Chu pirausrøn køben misag nørrø pønrrabelanba, chi misag søtømera køben warabelanba, peg peg waminchib misaameranba” Bibliayukutri tap wammera purukuntrapik køn (leu Apocalipsis 14:6). Tiuspe Biblian yam trikmay pørilø køntrai marik køn. Bibliape mas latrø yam trikmera pørilø pøntran katøkanelø pørin kilkamera lataken kømø. Bibliane møiløtøkucha nepua asamtik køn pek trikmay waminchipik kuakucha.

3. ¿Jeupape Biblian mantø purømisrik kø?

Biblian pørøppe rollosmera mara ushamerai kalusyu kape tusr-unø papiro taiktøka pørik køpik køn. Treekkutri, yanasrømpe minchapelø kuik køn. Inchentø yam møkelø Biblian untakelø kua nømui tasiktøka katøle ashachiktø pørik køn. Yam aship karup putrapelø Biblian pinishintrap intinkucha, møiløpe nømui øsik amønaikwan chikøpen puraintraptik kuashentø Biblian purømisrøp pøntraik køn. Jeupa namun waminchap inchene, chikucha søtøpasramisrtrap kaimapik køn. Bibliape trenchipik køn: “Namui Tiuswai wampe manakatik køntrapik køn” (Isaías 40:8).

 MAS NEPUA KUSREU

5. Biblian patsøkøntrap intinkucha nømpe kaima køn

 6. Pørin kilka maya misakwayasik

Biblian pek pek trikmay pøra latrø nu pirisaik køn katøkan pørin kilkamera lataken kømø. Ley Hechos 10:34, 35, yu leinuk pinaku paílan waminchap:

• ¿Tiuspe nui Wamwan pek pek trimay pøra chutøkucha nepua tøkakøntrai chintimpatre isupik kø?

• ¿Bibliaimpurø møikwan mas kustata?

 ¿CHI KUSREKU?

Bibliape Tiuswai Wam køn, inchakutri nøpe maya misakmera tøkakøntrai maran.

Kusreikwan katøle isuntrap

• ¿Tiuspe møkelan Biblian maik pørtrainkaruik kø?

• Biblian yam piejes pinishintrap intinkucha nømpe kaimaik køn, ¿ikyukutri chiwan mas tap kui ashku? Biblian pek pek trikmay pørimpurap pirisaimpurap, ¿ñipe chiwan mas tap kui ashku?

• ¿Tiuspe ñipa waminchap chine marikwan ñune maik mørørata?