Jehovah ko na mí nunina dagbedagbe de, enẹ wẹ bladopọ owe 66 delẹ tọn he nọ yin yiylọdọ Biblu. Amọ́, a gán nọ kanse dọ: ‘Fie wẹ Biblu wá sọn? Mẹnu wẹ yin dowatọ etọn?’ Nado mọ gblọndo na kanbiọ enẹlẹ, gbọ mí ni dọhodo lehe mí mọ owẹ̀n Jiwheyẹwhe tọn he to Biblu mẹ yí do ji.

1. Eyin gbẹtọ lẹ wẹ kàn Biblu, nawẹ Jiwheyẹwhe na yin Dowatọ etọn gbọn?

Nudi omẹ 40 wẹ kàn Biblu, podọ e yí owhe 1 600 plipli to yé si nado dotana ẹn, yèdọ sọn owhe 1513 J.W.M. jẹ nudi owhe 98 W.M tọn. Mẹhe kàn ẹn lẹ gbọnvona yede, podọ delẹ to yé mẹ yin lẹngbọhọtọ lẹ, whèhutọ lẹ po ahọlu lẹ po. Etomọṣo, kandai Biblu tọn de ma sọta devo. Nawẹ enẹ yọnbasi gbọn? Na Jiwheyẹwhe wẹ Dowatọ Biblu tọn wutu wẹ. (Hia 1 Tẹsalonikanu lẹ 2:13.) Biblu-kantọ lẹ ma kàn linlẹn yetọn titi lẹ. Kakatimọ, yé “dọho sọn Jiwheyẹwhe dè dile yé yin anadena gbọn gbigbọ wiwe a dali do.” (2 Pita 1:21) Jiwheyẹwhe yí gbigbọ wiwe etọn zan nado gbọdo sunnu lọ lẹ kavi deanana yé na yé nido kàn linlẹn etọn lẹ.—2 Timoti 3:16.

2. Mẹnu lẹ wẹ gán mọaleyi sọn Biblu mẹ?

“Akọta lẹpo, hẹnnu lẹpo, ogbè lẹpo podọ gbẹtọ lẹpo” wẹ wẹndagbe he to Biblu mẹ lẹ gán hẹn ale wá na. (Hia Osọhia 14:6.) Jiwheyẹwhe hẹn ẹn diun dọ Biblu tin-to-aimẹ to ogbè susu mẹ hugan owe devo depope to whenuho mẹ. Diblayin mẹlẹpo wẹ sọgan mọaleyi sọn Biblu mẹ mahopọnna fihe yé nọ nọ̀ kavi ogbè he yé nọ do.

3. Nawẹ Jehovah basi hihọ́na Biblu gbọn?

To tintan whenu, Biblu yin kinkando nuhe ma nọ dọ́jì delẹ ji, taidi ayú wunmẹ delẹ kavi ofán de he nọ yin papilus. Amọ́, sunnu delẹ he yiwanna Biblu yí sọwhiwhe do basi vọkan etọn po alọ po whlasusu. Dile etlẹ yindọ mẹhe to otẹn aṣẹpipa tọn mẹ delẹ tẹnpọn nado sukúndona Biblu, mẹdevo lẹ wleawufo nado ze ogbẹ̀ yetọn do owù mẹ nado basi hihọ́na ẹn. Jehovah ma dike mẹdepope kavi nudepope ni glọnalina ẹn nado dọhona mí. Biblu dọ dọ: “Ohó Jiwheyẹwhe mítọn tọn na gbọṣi aimẹ kakadoi.”—Isaia 40:8.

 DINDONANU DOGỌ

5. Biblu luntọ́n

 6. Owe de na mẹlẹpo

Biblu wẹ yin owe he yin lilẹdogbedevomẹ bosọ yin mimá pé hugan to whenuho mẹ. Hia Owalọ lẹ 10:34, 35, enẹgodo dọhodo kanbiọ ehelẹ ji:

• Naegbọn Jiwheyẹwhe do jlo dọ Ohó etọn ni yin lilẹdogbedevomẹ bosọ yin mimá pé sọmọ?

• Etẹwẹ a yiwanna to Biblu mẹ?

 BLADOPỌ

Ohó Jiwheyẹwhe tọn wẹ Biblu yin, podọ E sọ hẹn ẹn diun dọ e tin-to-aimẹ na gbẹtọvi lẹpo.

Dogbapọn

• Eyin yè dọ dọ Jiwheyẹwhe gbọdo sunnu delẹ nado kàn Biblu, etẹwẹ enẹ zẹẹmẹdo?

• Nawẹ aliho he mẹ Biblu gbọṣi aimẹ, yin lilẹdogbedevomẹ bosọ yin mimá pé te yinuwado ji we gbọn?

• Numọtolanmẹ tẹwẹ a tindo todin he a wá yọnẹn dọ Jiwheyẹwhe ko jẹtukla ehe lẹpo nado sọgan nọ dọhodopọ hẹ we?