UKỌCHẸ 05
Baibul Ch’ọtakada Ki Kwugbo Ọjọ
Jihofa d’ele ọmẹmẹlẹ ka ñwu wa. Ele lẹ ch’amọtakada kẹkẹ ọgbọ mẹta nyoke mẹfa (66) ku ma adọ ki Baibul. Ama, ẹ neke na kpibe kakini: ‘Ugbo Baibul kwo? Ẹnẹ n’ọla ki defu Baibul?’ K’a neke li ohi am’ene-i, k’a ch’oluka alu ki Baibul w’ugbo wa.
1. Ichẹñwu ki ch’amonẹ kọ Baibul, abile k’a kaki i kwugbo Ọjọ?
Abo ku ma kọ Baibul dabu onẹ ọgbọ meji, ma la d’ọdọ 1,600 kọ Baibul, kw’ọdọ 1513 T.I.K.W. (Taki Iko Kraist Wa) at’ọdọ 98 I.K. (Iko Kraist). Abo ku ma kọ Baibul kwugbo ojoji ojoji. Tabalẹ, ẹñwu ku ma kọ che jẹ kp’ọla ma. Abile ki dabalẹ? Todu ọla ki defu Baibul kwugbo Ọjọ. (Gba 1 Abo Tẹsẹlonaika 2:13.) Abo ku ma kọ Baibul, i ch’ibe-ma ma du kọ n. Ama, “abo k’Afu Kiafọ nẹ ma alo k’ọla ki kw’ugbo Ọjọ.” a (2 Pita 1:21) Ọjọ d’afu kiafọ nẹ ma le ku ma kọ ọla ki kwefu ibe-wñ.—2 Timoti 3:16.
2. Ẹnẹ neke jile kwefu Baibul?
“Abo uchẹichi du kp’ọlọpu du kp’alichi du kp’amonẹ du” neke jile kwefu uchẹnyọ ki defu Baibul. (Gba Ọla Ebitẹ 14:6.) Ọjọ la fu che ki Baibul ki dẹ alichi wewe t’amọtakada duu le. Eñini-i, ojile amonẹ neke gba, ma la ñọ neke neti ru Baibul. E-lẹ ch’ochochi ugbo duu k’amonẹ dẹ abẹki ichi duu ku ma aka.
3. Abu Jihofa d’ide Baibul ki neke dọmọ t’eñini?
Am’ẹñwu ku ma kọ Baibul tefu-wñ ejodudu chẹñwu ki ahika kpabiẹ dabu añọ kpai egbe ku ma adọ ki papyrus alu ẹnẹfu. Ama, abo ku ma fẹdọ Baibul dabi fu kọ kpai ọwọ ma. Dagba k’abo ku ma n’ukpahiu atene ku ma fu Baibul kpa m’anẹ, abomunẹ muda d’oji ma t’ukwu ku ma fu de. Jihofa jẹñwu ẹnẹ duu abẹk ẹñwu duu ki kpọna ny’owñ ek’ọla kpai awa n. Baibul kakini: “Ọla Ọjọ-wa muda adago ogbegbelẹ.”—Aizaya 40:8.
N’UMA NYỌGBA
Kọchẹ manyu alu k’iñmi Ọjọ jẹñwu abokẹlẹ ku ma kọ Baibul, alu ki fu de kpai alu ki jẹñwu t’amonẹ.
4. Baibul d’ẹnẹ ki n’ọla ki defu-wñ tejugede
G’IFIDIO-i. Ubilẹ, gba 2 Timoti 3:16 ku mẹ ch’oluka oji am’ene-i.
-
Ichẹñwu ki ch’amonẹ kọ Baibul, ẹñwu chi ku ma adọ k’Ọla Ọjọ?
-
Ẹneju kaki i jẹ che k’Ọjọ ki k’ibe-wñ ñwu amonẹ ku ma kọ?
Onẹ neke ka ñwu ak’ọtakada ki k’ọtakada ñwu, ama ọla ki defu-wñ, i ch’akọtakada nẹ n. Abẹlẹ gẹ, amonẹ kọ Baibul, ama ọla ki defu-wñ ch’ugbo Ọjọ i kwo
5. Dagba ku ma kobọ Baibul, i dọmọ t’eñini
Ichẹñwu ki Baibul ch’ọtakada ki kwugbo Ọjọ, i dukpẹ ki fu de. Akw’igbele igbele, abo ku ma n’ukpahiu tene ku ma fu Baibul du kpa m‘anẹ. Am’agboji ọna Ọjọ-egwa onugo che ku ma du Baibul maja. Ama, abomunẹ muda d’oji ma t’ukwu ku ma fu de, dagba ku ma kobọ ma. K’a kọchẹ lugbo ẹnẹ ka efu ma, g’IFIDIO-i. Ubilẹ, mẹ ch’oluka oji ene-i.
-
Abajọ-i k’ẹ ma alu k’amonẹ d’oji ma t’ukwu todu ku ma f’ọtakada Baibul de, ẹ tene egba iko duu? Ẹñwu chi?
Gba Eli Ekọ D’Ọjọ 119:97. Ubilẹ, mẹ ch’oluka oji ene-i:
-
Ẹñwu d’amonẹ ẹdọ kwanẹ ku ma d’oji ma t’ukwu todu ku ma kọ Baibul t’alichi wewe, ku ma la ñọ jẹñwu ki neke t’ọgbọ amonẹ duu?
6. Ọtakada ka ki dọmọ ñwu ọgbọ amonẹ
Baibul ch’ọtakada ku ma kọ t’alichi wewe t’amọtakada duu le, ku ma la ñọ kpẹ ñwu amonẹ tule. Gba Ẹwñ Che 10:34, 35, ubilẹ mẹ ch’oluka oji am’ene-i:
-
Ẹñwu chi k’Ọjọ atene ku ma kọ ọtakada Ọla-wñ t’alichi wewe, ku ma la ñọ jẹñwu ki t’ọgbọ amonẹ?
-
Ẹñwu ẹ ñeju lugbo Baibul?
Ojile
ọgbọ amonẹ
efu ilẹ-i
neke gba Baibul alichi ki nẹruma eju
Baibul che wewe t’alichi
3,000
le
e-ku ma kọ kpa kpai e-ku ma ma kọ kpa ta n
Aluka Baibul chakaa ku ma kọ dufu dabu
5,000,000,000
i che nana t’ọtakada duu ku ma kọ dufu le
ABO KA KAKINI: “Baibul ch’ọtakada igbele k’amonẹ kọ.”
-
Ẹñwu ch’ibe wẹ?
-
Ẹñwu du tejugede kaki Baibul ch’ọtakada Ọla Ọjọ?
ẸY’ỌLA UKỌ-I
Baibul ch’ọtakada Ọla Ọjọ, i la jẹñwu ki neke t’ọgbọ amonẹ duu.
Ẹñwu ẹ kọchẹ?
-
Ẹñwu chi k’a kakini afu Ọjọ nẹ abo ku ma kọ Baibul le-i?
-
Ẹñwu ẹ ñeju lugbo ọna ki Baibul le gbogbo w’eñini, lugbo alu ku ma kọ t’alichi omunẹ, kpai ọna ki t’amonẹ wewe le?
-
Abajọ-i k’ẹ ma alu k’Ọjọ che ki neke k’ọla kpai uwẹ, abu ẹdọ wẹ dẹ lugbo ọla ẹnẹ k’Ọjọ che?
KỌCHẸ MANYU
Gba ọhiala alu ku ma kọ Baibul kwefu ọtakada igbele tefu e-ku ma kọ abajọ-i.
Kọchẹ alu ki Baibul futanẹ kwefu am’akanya mẹta ki ma jẹñwu lenyọ.
G’alu k’amonẹ d’oji ma t’ukwu ku ma neke kọ Baibul t’alichi wewe.
Ma tete akọ Baibul akọ-ñọ-kọ t’alichi wewe. Abu ẹ neke ma kaki am’ọla ki defu Baibul n’arida n?
