UWUHRẸ 05
Ebaibol na Yọ Ovuẹ nọ U No Obọ Ọghẹnẹ Ze ro Se Omai
Ebaibol na yọ obọdẹ okẹ nọ Jihova ọ kẹ omai. Nọ obe nọ u wo emebe esese udhosa-gbezeza nọ a ru fihọ ukulu ovo. Rekọ ẹsejọhọ whọ be nọ omara nọ: ‘Ẹvẹ Ebaibol na o ro te omai obọ? Ono o wo eme Ebaibol na?’ Re ma sae kẹ uyo enọ nana, joma ta kpahe epanọ ovuẹ Ọghẹnẹ nọ o rrọ Ebaibol na u ro te omai obọ.
1. Nọ orọnọ ahwo a kere Ebaibol na, ẹvẹ ma rọ ta nọ Ọghẹnẹ o wo eme riẹ?
Ahwo udhuvẹ a kere Ebaibol na, yọ o rehọ oware wọhọ ikpe odu ọvo gbe egba ezeza (1,600), no umuo 1513 B.C.E. rite oware wọhọ 98 C.E. Oghẹrẹ ahwo sa-sa a kere Ebaibol na. Ghele na, Ebaibol na soso ọ rọwokugbe. Ẹvẹ onana o sae rọ rrọ ere? O rrọ ere keme Ọghẹnẹ họ Ọnọ o wo eme nọ e rrọ Ebaibol na. (Se 1 Ahwo Tẹsalonika 2:13.) Orọnikọ oware nọ o rrọ ahwo na iroro oye a kere fihotọ họ. Ukpoye, “a ta eme nọ i no obọ Ọghẹnẹ ze wọhọ epanọ ẹzi ọfuafo a na ọ kpọ rai.” (2 Pita 1:21) Ọghẹnẹ ọ rọ ẹzi ọfuafo riẹ vuẹ ahwo na oware nọ a re kere.—2 Timoti 3:16.
2. Ono ọ rẹ sai wo erere no Ebaibol na ze?
Ahwo nọ a no “orẹwho, orua, ẹrọunu gbe utu ahwo kpobi” ze a rẹ sai yo je wo erere no emamọ usi nọ ọ rrọ Ebaibol na ze. (Se Eviavia 14:6.) Ọghẹnẹ o ru nọ a rọ fa Ebaibol na fihọ evẹrẹ buobu no bu vi obe ofa kpobi nọ a fa no evaọ akpọ na. Enwenọ ohwo kpobi ọ rẹ sai se hayo gaviezọ kẹ ovuẹ nọ ọ rrọ Ebaibol na ghelọ oria nọ ọ be rria hayo ẹvẹrẹ nọ ọ be ta kẹhẹ.
3. Ẹvẹ Jihova ọ rọ sẹro Ebaibol na rite inẹnẹ?
Evaọ oke ọsosuọ, eware wọhọ elẹda gbe papirọs nọ e rẹ tọ họ a kere eme Ebaibol na fihọ. Rekọ ezae nọ i se Ebaibol na gboja a romatotọ wariẹ rehọ obọ kere eme Ebaibol na fihọ eria efa unuẹse buobu. Yọ dede nọ isu gbe ilorida ichọche a jẹ gwọlọ raha Ebaibol na no, ahwo jọ a jariẹ nọ a daoma ru oware kpobi nọ a rẹ sai ru re a sae sẹro riẹ o tẹ make rọnọ o rẹ wha uwhu se ai dede. Jihova ọ kẹ ohwo ọvo hayo oware ovo uvẹ re o whaha iẹe ẹme nọ ọ rẹ ta kugbe omai hi. Ebaibol na ọ ta nọ: “Ẹme Ọghẹnẹ mai ọ rẹ jọ bẹdẹ bẹdẹ.”—Aizaya 40:8.
GBE WUHRẸ EWARE EFA
Gbe wuhrẹ kpahe epanọ Ọghẹnẹ ọ rọ rehọ ẹzi riẹ kẹ ezae jọ ro kere Ebaibol na, epanọ ọ rọ sẹro riẹ, gbe epanọ o ro ru re ahwo a woi.
4. Ebaibol na ọ fodẹ Ohwo nọ o wo eme nọ e rrọ eva riẹ
Kporo IVIDIO na. Kẹsena wha ve se 2 Timoti 3:16, jẹ ta ẹme kpahe enọ nọ e rrọ obotọ na.
-
Nọ orọnọ ahwo a kere Ebaibol na, ẹvẹ a bi ro sei Ẹme Ọghẹnẹ?
-
Kọ who roro nọ u kiehọ re ma rọwo nọ Ọghẹnẹ ọ sae vuẹ ahwo-akpọ iroro riẹ re a kere ai fihotọ?
Nọ ọga-iruo ọ tẹ rehọ okere-obe riẹ kere ileta, ọga na ma rẹ ta nọ o wo ovuẹ na. Ere ọvona re, dede nọ Ọghẹnẹ ọ rọ ahwo kere Ebaibol na, Ọghẹnẹ họ Ọnọ o wo ovuẹ nọ o rrọ eva riẹ
5. Ebaibol na ọ gbẹ riẹ ghelọ idhere sa-sa nọ a rọ gwọlọ raha iẹe no
Nọ orọnọ obọ Ọghẹnẹ Ebaibol na o no ze na, ma sai rẹro nọ ọ rẹ sẹro riẹ. U kri akpọ no nọ ahwo nọ a rrọ isu a be rọ daoma re a raha Ebaibol na no. Yọ isu egagọ omarai re a daoma gaga re a ko ẹe dhere ahwo. Rekọ ghelọ ọwọsuọ na, ahwo jọ a ru oware kpobi nọ a rẹ sai ru re a thọ Ebaibol na o tẹ make rọnọ o rẹ wha uwhu se ai dede. Re who wuhrẹ kpahe ọzae otiọye na jọ, kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Nọ whọ ruẹ epanọ uye o bẹ ahwo te re a sae sẹro Ebaibol na, kọ o lẹliẹ owhẹ gwọlọ sei? Fikieme whọ rọ ta ere?
Se Olezi 119:97, kẹsena wha vẹ ta ẹme kpahe onọ nana:
-
Eme o wọ ahwo buobu fa Ebaibol na je ru ei te ahwo obọ dede nọ onana o rẹ sae wha uwhu se ai?
6. Obe nọ ọ rrọ rọkẹ ahwo kpobi
Evaọ ikuigbe ohwo-akpọ, Ebaibol na họ obe nọ a mae fa fihọ evẹrẹ buobu no, nọ ahwo buobu a wo. Se Iruẹru Ikọ 10:34, 35, kẹsena wha vẹ ta ẹme kpahe enọ nana:
-
Fikieme Ọghẹnẹ ọ rọ gwọlọ nọ a fa Ẹme riẹ fihọ evẹrẹ buobu je ru ei te ahwo kpobi obọ?
-
Eme ọ lẹliẹ Ebaibol na were owhẹ?
Enwenọ
ahwo kpobi
nọ a rrọ akpọ na
a wo Ebaibol na evaọ ẹvẹrẹ nọ a riẹ
A fa Ebaibol na soso hayo abọ jọ riẹ
fihọ evẹrẹ nọ i bu vi
3,000
soso no
5,000,000,000
Unu Ebaibol nọ ma sai roro ku nọ a ru hayo printi no,
yọ u bu vi obe ofa jọ kpobi
AHWO JỌ A RẸ TA NỌ: “Ebaibol na yọ obe anwae jọ gheghe nọ ahwo-akpọ a kere.”
-
Eme who roro?
-
Eme o dhesẹ nọ Ebaibol na yọ Ẹme Ọghẹnẹ?
EME WHO WUHRẸ NO?
Ebaibol na yọ Ẹme Ọghẹnẹ, yọ o ru re ọ ruẹsi te ahwo-akpọ kpobi obọ.
Ọkiẹkpemu
-
Oghẹrẹ vẹ Ọghẹnẹ ọ rọ rehọ ẹzi riẹ wọ ahwo kere Ebaibol na?
-
Eme whọ rẹ sae ta kpahe oghẹrẹ nọ Ebaibol na ọ sai ro te inẹnẹ, oghẹrẹ nọ a rọ fae, gbe oghẹrẹ nọ a ro ru ei te ahwo obọ?
-
Kọ eva e gbẹ be were owhẹ inọ Ọghẹnẹ o ru eware nana kpobi re ọ sae ta ẹme kugbe owhẹ?
KIẸ KPAHE EFA
Se iku epanọ a rọ fa Ebaibol na no iko-ebe ẹvẹrẹ ọsosuọ nọ a ro kere iei fihọ evẹrẹ oke mai nana.
“Oghẹrẹ nọ Ebaibol na O ro Te Omai Obọ” (Awake!, Akpegbọvo 2007)
Wuhrẹ kpahe epanọ Ebaibol na ọ gbẹ rọ riẹ ghelọ idhere esa jọ nọ a jẹ rọ gwọlọ raha iẹe no.
“Ebaibol na—Iku Epanọ Ọ Sae rọ Zọ” (Uwou-Eroro Na Ọrọ avọ 4 2016)
Rri eware nọ ahwo a ru re a sae fa Ebaibol na dede nọ o rẹ sae wha uwhu se ai.
A wariẹ rọ obọ kere eme Ebaibol na jẹ fae fihọ evẹrẹ sa-sa unuẹse buobu no. Ẹvẹ o sai ro mu omai ẹro nọ ovuẹ nọ o rrọ eva riẹ o gbẹ rrọ gbagba?
“Kọ A Nwene Ẹme Ọghẹnẹ nọ Ọ Rrọ Ebaibol na No?” (Uzoẹme nọ o rrọ itanẹte)
a Wọhọ epanọ ma ti wuhrẹ evaọ Uwuhrẹ avọ 07, ẹzi ọfuafo na yọ ogaga nọ Ọghẹnẹ o bi ro ru iruo.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
