LISON 05
Bíblia é mensaji di Deus pa nos
Jeová da-nu Bíblia. El é un prezenti spesial ki ten 66 livru pikinoti déntu di el. Má talvês bu pode pergunta: ‘Di undi ki Bíblia ben? Kenha ki é se autor?’ Pa responde kes pergunta li, nu ben odja modi ki mensaji di Deus ki sta na Bíblia txiga ti nos.
1. Modi ki Deus pode ser Autor di Bíblia si é ómis ki skrebe-l?
Uns 40 ómi skrebe Bíblia duránti uns 1.600 anu. Kel primeru livru skrebedu na anu 1513 A.J. i kel últimu livru skrebedu pa vólta di anu 98 D.J. Kes algen ki skrebe Bíblia éra txeu diferenti di kunpanheru. Pur izénplu, alguns éra pastor, piskador i rei. Má simé, tudu pártis di Bíblia sta di akordu ku kunpanheru. Modi ki kel-li é posível? Pamodi Deus é Autor di Bíblia. (Lé 1 Tessalonicenses 2:13.) Kes skritor ka skrebe ses própi ideia, má es ‘pâpia di párti di Deus sima es giadu pa spritu santu.’ a (2 Pedro 1:21) Deus uza se spritu santu pa poi, ô pa motiva, kes ómi pa skrebe se pensamentus. — 2 Timóteo 3:16.
2. Bíblia é pa kenha?
Notísias sábi ki sta na Bíblia pode djuda algen di ‘tudu nasons, tribus, línguas i povus.’ (Lé Apocalipse 14:6.) Oji Bíblia sta traduzidu na más língua di ki kalker otu livru. Kuazi tudu algen na mundu pode lé Bíblia, ka ta nporta undi ki es ta mora ô ki língua ki es ta pâpia.
3. Kuzê ki Jeová faze pa proteje Bíblia?
Bíblia skrebedu na alguns tipu di material ki ka ta dura txeu. Má kes ómi ki gostaba txeu di Bíblia faze kes kópia di Palavra di Deus ku kuidadu. Otus ti poi ses vida na prigu pa proteje-l, kantu pesoas ku puder tenta kaba ku Bíblia. Jeová ka dexa ningen, nen nada inpidi-l di pâpia ku nos. Bíblia ta fla: ‘Palavra di nos Deus ta dura pa tudu ténpu.’ — Isaías 40:8.
SABE MÁS
Odja modi ki Deus uza ómis pa skrebe Bíblia, modi ki el proteje-l i kuzê ki el faze pa tudu algen pode le-l.
4. Bíblia ta mostra kenha ki é se Autor
Odja VÍDIU. Dipôs lé 2 Timóteo 3:16, i pâpia sobri kes pergunta li:
-
Si é ómis ki skrebe Bíblia, pamodi ki el ta txomadu di Palavra di Deus?
-
Bu ta kridita ma Bíblia é Palavra di Deus?
Un sekretáriu pode skrebe un karta, má kel mensaji é di kel algen ki manda-l skrebe. Di mésmu manera, ómis skrebe Bíblia, má se mensaji ben di Deus.
5. Es ka konsigi kaba ku Bíblia
Dja ki Bíblia é di Deus, é klaru ki el ta protejeba el. Duránti txeu ténpu, ómis ku puder tenta kaba ku Bíblia. Xéfis di relijion ka kreba pa pesoas lé Bíblia. Má sikrê ku opozison i ku amiasa di mórti, txeu algen poi ses vida na prigu pa proteje Bíblia. Pa prende más sobri un di kes ómi, odja VÍDIU, i dipôs pâpia sobri kes pergunta li:
-
Gósi ki dja bu sabe ma pesoas poi ses vida na prigu pa proteje Bíblia, bu fika ku más gana di le-l? Pamodi?
Lé Salmo 119:97, i dipôs pâpia sobri kel pergunta li:
-
Pamodi ki txeu algen poi ses vida na prigu pa traduzi i distribui Bíblia?
6. Un livru pa tudu algen
Bíblia é kel livru más traduzidu i distribuidu na stória. Lé Atos 10:34, 35, i dipôs pâpia sobri kes pergunta li:
-
Pamodi ki Deus krê pa se Palavra traduzidu i distribuidu na mundu interu?
-
Kuzê ki bu gosta más na Bíblia?
Kuazi
tudu
algen na mundu
pode lé Bíblia na un língua ki es ta ntende
El sta na más di
3 mil
língua
interu ô párti di el
5 bilhon
É más ô ménus nunbru di Bíblias ki dja fazedu,
mutu más di ki kalker otu livru
ALGUNS ALGEN TA FLA: “Bíblia é sô un livru antigu ki ómi skrebe.”
-
Kuzê ki bu ta atxa?
-
Kuzê ki ta prova ma Bíblia é Palavra di Deus?
REZUMU
Bíblia é Palavra di Deus i tudu algen na mundu pode ten el.
Perguntas di rezumu
-
Pamodi ki nu pode fla ma Deus ki é Autor di Bíblia?
-
Di kel ki bu studa na es lison, kuzê ki ta dexa-u más dimiradu sobri Bíblia?
-
Modi ki bu ta xinti di sabe ma Deus faze tudu kel-li pa pâpia ku bo?
DJOBE MÁS
Lé sobri stória di Bíblia, désdi kes kópia más antigu ti kes traduson ki nu ta uza gósi.
“Modi ki Bíblia txiga ti nos ténpu” (Nhos korda!, novenbru di 2007)
Prende modi ki Bíblia kontinua ta izisti ti nos ténpu sikrê ku três grandi prigu.
“Es ka konsigi kaba ku Bíblia!” (Sentinéla, nunbru 4 di 2016)
Odja modi ki pesoas poi ses vida na prigu pa traduzi Bíblia.
Dja fazedu txeu kópia i tradusons di Bíblia. Modi ki bu pode ten sertéza ma mensaji di Deus ka mudadu?
Bu pode gosta di kes-li tanbê
PERGUNTAS KI MÁS TA FAZEDU
Modi ki ta fazedu kel studu di Bíblia ki Tistimunhas di Jeová ta oferese?
Bu pode uza kalker traduson di Bíblia, pa bu studa Bíblia di grasa ku Tistimunhas di Jeová. Bu pode konvida tudu bu família ô kalker amigu ki bu krê.
