DILONGI 05
Biblia Kele Nsangu ya Nzambi Sambu na Beto
Yehowa me pesaka beto Biblia dikabu mosi ya kitoko yina kele ti mikanda 66 na kati. Ata mpidina, nge lenda kudiyula kaka nde: ‘Na wapi Biblia me katukaka? Nani kele munkwa na yo?’ Sambu na kupesa mvutu na bangiufula yai, beto tala mutindu nsangu ya Nzambi yina kele na Biblia kuminaka beto.
1. Kana bantu sonikaka Biblia, sambu na nki beto ke tubaka nde Nzambi kele Munkwa na yo?
Bantu kiteso ya 40 sonikaka Biblia na nsungi ya bamvula 1 600, banda na mvula 1513 na ntwala ya ntangu na beto tii pene-pene ya mvula 98 ya ntangu na beto. Mambu ya luzingu ya bantu yina sonikaka Biblia vandaka ve mutindu mosi mpi bo vandaka kuzinga na bisika ya mutindu na mutindu. Ata mpidina, kuwakana ke vandaka na kati ya mikanda yonso ya Biblia yina bo sonikaka. Sambu na nki? Sambu Nzambi kele Munkwa ya Biblia. (Tanga 1 Batesalonika 2:13.) Bantu yina sonikaka yo, sonikaka ve bangindu na bo mosi. Kansi bo ‘tubaka mambu yina katukaka na Nzambi mutindu mpeve santu vandaka kutwadisa bo.’ a (2 Piere 1:21) Nzambi pesaka bantu mpeve santu sambu bo sonika bangindu na yandi na Biblia.—2 Timoteo 3:16.
2. Nani lenda baka mambote na Biblia?
Nsangu ya mbote ya kele na Biblia, lenda natila ‘makanda yonso, mabuta yonso, bandinga yonso mpi bansi yonso’ mambote. (Tanga Kusonga 14:6.) Bubu yai, Biblia kele na bandinga mingi kuluta mikanda yonso ya nkaka. Bantu mingi mpenza lenda tanga Biblia. Bo lenda tanga yo, ata bo ke zingaka na konso kisika yina to bo ke tubaka konso ndinga yina.
3. Inki mutindu Yehowa me taninaka Biblia?
Bantu sadilaka bima ya ke bebaka sambu na kusonika Biblia. Mu mbandu, bampusu ya bambisi. Kansi bantu yina vandaka kuzola Biblia, salaka mbote-mbote bakopi na yo. Ata bantu yina vandaka ti kiyeka sosaka kuvidisa Biblia, bantu ya nkaka ndimaka kutula luzingu na bo na kigonsa sambu na kutanina yo. Yehowa me bikaka ve nde konso muntu to konso kima yina kukanga yandi nzila ya kuzabisa beto nsangu na yandi. Biblia ke tubaka nde: ‘Ndinga ya Nzambi na beto ke zingaka mvula na mvula.’—Yezaya 40:8.
LONGUKA MAMBU MINGI
Beto tala mutindu Nzambi pesaka bantu mpeve santu sambu na kusonika Biblia, mutindu yandi taninaka yo mpi mutindu yandi me salaka nde yo kumina bantu.
4. Biblia ke monisaka nani kele Munkwa na yo
Beno tala VIDEO. Na nima beno tanga 2 Timoteo 3:16 mpi beno pesa mvutu na bangiufula ya ke landa.
-
Kana bantu sonikaka Biblia, ebuna sambu na nki beto ke bingaka yo Ndinga ya Nzambi?
-
Nge ke ndima nde Nzambi muntu songaka bantu yina sonikaka Biblia bangindu na yandi?
Muntu mosi lenda songa muntu ya nkaka mambu yina yandi fwete sonika na mukanda. Mutindu mosi mpi bantu sonikaka Biblia kansi nsangu na yo katukaka na Nzambi
5. Bantu me kukaka ve kuvidisa Biblia
Yo me fwana nde Nzambi kutanina Biblia sambu yo me katukaka na yandi. Banda ntama, bantu ya kele ti kiyeka ke sosaka kuvidisa Biblia. Bamfumu ya mabundu mpi vandaka kuzola ve nde bantu kutanga yo. Bantu mingi me tulaka luzingu na bo na kigonsa sambu na kutanina Biblia ata bantu teleminaka bo mpi sosaka kufwa bo. Sambu na kuzaba muntu mosi na kati na bo, beno tala VIDEO mpi na nima beno pesa mvutu na bangiufula ya ke landa.
-
Keti kuzaba nde bantu salaka bikesa mingi sambu na kutanina Biblia ke pusa nge na kuzola kutanga yo? Sambu na nki?
Beno tanga Nkunga 119:97 mpi na nima beno pesa mvutu na ngiufula yai:
-
Inki ke pusaka bantu mingi na kutula luzingu na bo na kigonsa sambu na kubalula mpi kukabula Biblia?
6. Mukanda sambu na bantu yonso
Biblia kele mukanda yina bo me balulaka mpi me kabulaka mingi kuluta mikanda yonso ya nkaka. Beno tanga Bisalu 10:34, 35 mpi na nima beno pesa mvutu na bangiufula yai:
-
Sambu na nki Nzambi ke zolaka nde bantu kubalula mpi kukabula Ndinga na yandi mingi mutindu yai?
-
Inki ke yitukisa nge na Biblia?
Bantu mingi mpenza to pene-pene ya
100%
na ntoto ya mvimba
ke tangaka Biblia na bandinga yina bo ke bakisaka
Yo kele na
bandinga kuluta
3 000
ya mvimba to ya kitini
Bakopi ya Biblia ya bo me salaka kele kiteso ya
5 000 000 000
mingi kuluta mikanda yonso ya nkaka
BANTU YA NKAKA KE TUBAKA NDE: “Biblia kele mukanda ya ntama yina bantu sonikaka.”
-
Inki nge ke yindula?
-
Inki ke monisa nde Biblia kele Ndinga ya Nzambi?
NA BUNKUFI
Biblia kele Ndinga ya Nzambi mpi yandi me salaka yonso sambu yo kumina bantu yonso.
Inki Nge Me Simba?
-
Kutuba nde Nzambi pesaka bantu mpeve santu sambu bo sonika Biblia ke tendula nki?
-
Inki ke yitukisa nge mutindu bantu me nungaka ve na kuvidisa Biblia, mutindu bo ke balulaka yo mpi ke kabulaka yo?
-
Inki mpila nge ke kudiwa mutindu nge me zaba nde Nzambi me salaka bikesa sambu na kusonga nge nsangu ya Biblia?
TALA MPI
Tanga istware ya ke tubila Biblia, banda na bamaniskri ya kisina tii na Babiblia ya bilumbu na beto.
“Mutindu Biblia Me Kuminaka Beto” (Disolo ya kele na Telama!)
Tala mutindu Biblia kele tii bubu yai ata mambu tatu ya nene tulaka yo na kigonsa.
Tala mutindu bantu tulaka luzingu na bo na kigonsa sambu na kubalula Biblia.
Bo me salaka bakopi ya Biblia mpi me balulaka yo mbala mingi. Inki ke ndimisa nge nde bo me taninaka mbote-mbote nsangu ya Biblia?
“Keti Bantu Me Sobaka Biblia to Me Yikaka Mambu ya Luvunu na Kati?” (Disolo ya kele na jw.org)
a Mutindu dilongi 07 ta tendula yo, mpeve santu kele ngolo yina Nzambi ke sadilaka bisalu.
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
