LUFUNJISHO 05
Lesa Witupa Baibolo
Yehoba witupa Baibolo. Ke bupe bwawama bingi. Mu Baibolo muji mabuku 66. Mwakonsha kwiipuzha’mba: ‘Nanchi Baibolo waishileko byepi? Ñanyi mwina uno buku? Pa kuba’mba tukumbule ano mepuzho, patanshi twayai twisambe pa Baibolo byo aishile kwi atweba.
1. Inge bantu bo banembele Baibolo, pano mambo ka o twambila’mba Lesa ye mwina uno buku?
Baibolo bamunembele ku bantu 40 bapusana pusana. Buku mutanshi po bamunembejile papichile myaka kukila pa 3,500 kabiji buku wapeleleko papichile myaka nobe 1900. Bantu banembele Baibolo baingilanga mingilo yapusana pusana. Bamo bajinga bakafunga, bakwabo bakwatanga masabi kabiji bakwabo nabo bajinga bamfumu. Nangwa kya kuba banembele Baibolo baingilanga mingilo yapusana pusana, pano bino byo banembele kechi byapusenamo ne. Mambo ka o kyaikela bino? Mambo Lesa ye mwine mwina Baibolo. (Tangai 1 Tesalonika 2:13.) Abano bantu kechi banembele milanguluko yabo ne. Pakuba “baambilenga byafumine kwi Lesa byo bebatangijile ku mupashi wazhila.” a (2 Petelo 1:21) Lesa waingijishe mupashi wanji wazhila kutangijila nangwa’mba kukwasha bano bantu kunemba milanguluko yanji.—2 Timoti 3:16.
2. Bañanyi bafwainwa kumwenamo mu byaamba Baibolo?
“Bisaka bya bantu byonse ne mikoka yonse [ne] njimi yonse ne mitundu yonse ya bantu” bafwainwa kumwenamo mu mambo awama aji mu Baibolo. (Tangai Lumwekesho 14:6.) Lesa mwine ye wafuukwilepo’mba Baibolo bamutuntulule mu milaka yavula kukila mabuku a bantu. Lelo jino, muntu yense uji na Baibolo. Baibolo uji mu mapunzha onse ne mu milaka yonse yamba bantu.
3. Yehoba wazhikijila byepi Baibolo?
Kimye kitanshi Baibolo bamunembele pa bintu bibula kubanda konaika nabiji myai ya banyama. Kabiji bantu batemenwe Baibolo, bakopolwele ne kwiikopolola jibiji na maboko. Nangwa kya kuba bandamakyalo bamo ne bantangi ba bupopweshi bakebele’mba bazhiye Baibolo, bantu bakwabo bepaine ne kufwilapo pa kuba’mba bamuzhikijile. Yehoba kechi waswishapo muntu nangwa kintu kyonse kumulengela kubula kwisambanga ne atweba ne. Mambo Baibolo waamba’mba: “Byambo byamba Lesa wetu bikala myaka ne myaka.”—Isaya 40:8..
FUNJILAIPO BIKWABO
Funjilaipo byavula pa kuba’mba muyuke Lesa byo aingijishe mupashi wanji wazhila kutangijila banabalume kunemba Baibolo ne byo azhikijila Baibolo ne byo auba pa kuba’mba bantu bonse bekale na Baibolo.
4. Baibolo witubuula mwine mwinaye
Tambai VIDYO. Apa bino mutange 2 Timoti 3:16, ne kwisamba ano mepuzho.
-
Inge bantu bo banembele Baibolo, pano mambo ka o twambila’mba Mambo a Lesa?
-
Nanchi anweba mwashiinwa’mba Lesa waingijishe bantu kunemba milanguluko yanji nyi?
Munembeshi wakonsha kunemba nkalata, pano bino mwina byambo ke yenka ubena kumubuula’mba anembe. Kyo kimotu, bantu bo banembele Baibolo pakuba byambo byo banembelenga byafuminenga kwi Lesa
5. Bantu bakebeshe bingi kuzhiya Baibolo
Inge Baibolo buku wa Lesa, ko kuba’mba mwine Lesa wafwainwa kumuzhikijila. Kufumatu ne kala, bantu baesekesha kuba’mba bazhiye Baibolo. Bantangi ba bupopweshi baesekesha kukanya bantu kwikala na Baibolo. Pano bino, bakankalwa mambo bantu bavula bepana ne kufwatu kuba’mba bazhikijile Baibolo. Inge mukeba kuyuka byaubile mwanamulume umo, tambai VIDYO, ne kwisamba ano mepuzho.
-
Byo mwayuka byapichilemo bantu bamo pa kubatu’mba bazhikijile Baibolo, nanchi musakutemwa kutanganga Baibolo moba onse nyi?
Tangai Salamo 119:97, ne kwisamba buno bwipuzho:
-
Ñanyi bintu byalengejile bantu bavula kubika bumi bwabo mu kizumba kuba’mba batuntulule Baibolo ne kumupana ku bantu?
6. Baibolo buku wa bantu bonse
Baibolo ye buku ye batuntulula mu milaka yavula bingi kukila mabuku onsetu a bantu. Tangai Byubilo 10:34, 35, ne kwisamba ano mepuzho:
-
Mambo ka Lesa o abena kukebela’mba Baibolo bamutuntulule mu milaka yavula ne kumupana ku bantu bavula?
-
Ñanyi bintu byo mwatemwa pa Baibolo?
Pepi
Bantu Bavula
mwaya ntanda
baji na Baibolo mu mulaka wabo
Uno Baibolo
uji mu milaka yavula kukila pa
3,000
yense nangwa lubaji lumo
Mabaibolo onse pamo apulintwa,
5,000,000,000
akila mabuku a bantu
BANTU BAMO BAMBA’MBA: “Baibolo buku wa kala kene ye banembele ku bantu.”
-
Nga anweba mulangulukapo’mba ka?
-
Ñanyi bishinka bimwesha’mba Baibolo kine Mambo a Lesa?
ÑANYI BINTU BYO MWAFUNDA?
Baibolo Mambo a Lesa kabiji Lesa wanengezha uno buku kuba’mba bantu bonse bekale nanji.
Mepuzho a kupitulukamo
-
Nanchi tulumbulula ka inge twaamba’mba Lesa waingijishe mupashi wanji wazhila kutangijila bantu kunemba Baibolo?
-
Ñanyi kintu kyo mwatemwapo pa Baibolo byo atwajijila kwikalako, byo bamutuntulula mu milaka yapusana pusana ne kusampanya?
-
Pano mubena kumvwa byepi ku muchima byo mwayuka’mba Lesa wimupa Baibolo pa kuba’mba mwisambenga nanji?
KEBAI BISHINKA BIKWABO
Tangai bishinka byaamba pa Baibolo pa kuba’mba muyuke byo kyajinga pa kumutuntulula kufika ne lelo jino.
“Byalengela Kuba’mba Twikale na Baibolo” (Labainga! wa mu November 2007)
Monai bintu bisatu byaubile bantu bakebelenga kuzhiya Baibolo.
Monai bantu byo babikile bumi bwabo mu kizumba pa kutuntulula Baibolo.
Baibolo bamukopolola ne kumutuntulula bimye byavula bingi. Mwakonsha kushiinwa byepi amba bantu kechi bapimpula byambo biji mu Baibolo ne?
“Nanchi Bantu Bapimpula Baibolo Nangwa Kupimpula Byambo Bijimo Nyi?” (Kibaaba kiji pa jw.org)
a Byonkatu byo bakalumbulula mu lufunjisho 07, mupashi wazhila ke ngovu ya Lesa ingila.
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
