LƐSIN 05

Di Baybul Na Gɔd in Mɛsej to Wi

PLE

Jiova dɔn gi wi di Baybul we na wɔndaful gift we gɛt 66 smɔl smɔl buk dɛn. Bɔt yu go de wɔnda: ‘Usay di Baybul kɔmɔt? Udat rayt am?’ Fɔ ansa dɛn kwɛstyɔn dɛn ya, lɛ wi tɔk bɔt aw wi ebul fɔ gɛt Gɔd in mɛsej insay di Baybul.

1. If na mɔtalman rayt di Baybul, wetin mek wi se na frɔm Gɔd i kɔmɔt?

Na 40 difrɛn man dɛn bin rayt di buk dɛn we de insay di Baybul. Dɛn bin tek lɛk 1,600 ia fɔ rayt di Baybul. Dɛn bin stat frɔm di ia 1513 bifo Krays to 98 afta Krays. Na difrɛn difrɛn pipul dɛn bin rayt di Baybul. Sɔm na bin shɛpad dɛn, fishaman dɛn ɛn kiŋ dɛn. Bɔt stil di wan ol Baybul gɛt wanwɔd. Wetin mek dat pɔsibul? Na bikɔs di mɛsej we de insay de kɔmɔt frɔm Gɔd. (Rid 1 Tɛsalonians 2:13.) Di wan dɛn we rayt di Baybul nɔ rayt wetin dɛn tink. Bɔt na “di oli spirit a gayd sɔm man dɛn so dat dɛn go tɔk wetin Gɔd tɛl dɛn.” (2 Pita 1:21) Gɔd bin yuz in oli spirit fɔ dayrɛkt dɛn man dɛn de fɔ rayt in mɛsej.—2 Timoti 3:16.

2. Udat dɛn de bɛnifit frɔm di Baybul?

“Ɔl di neshɔn dɛn, pipul dɛn, trayb dɛn, ɛn pipul dɛn we de tɔk difrɛn difrɛn langwej dɛn” de bɛnifit frɔm di gud nyuz we de insay di Baybul. (Rid Rɛvɛleshɔn 14:6.) Gɔd mek shɔ se di Baybul de insay bɔku bɔku langwej dɛn pas ɛni ɔda buk. Bɔku bɔku pipul dɛn tide ebul fɔ rid di Baybul no mata usay dɛn de ɔ us langwej dɛn de tɔk.

3. Aw Jiova dɔn protɛkt di Baybul?

Dɛn bin rayt di Baybul pan tin dɛn we nɔ de las fɔ lɔng, lɛk lɛda. Bɔt na man dɛn we bin lɛk di Baybul bin tek dɛn tɛm fɔ kɔpi am bak. Pan ɔl we pawaful pipul dɛn dɔn tray fɔ dɔnawe wit di Baybul, ɔda wan dɛn bin rɛdi fɔ risk dɛn layf fɔ protɛkt di Baybul. Jiova nɔ bin alaw ɛnibɔdi ɔ ɛnitin fɔ stɔp am fɔ mek i nɔ tɔk to wi. Di Baybul se: “PAPA GƆD in wɔd go tinap [de] sote go.”—Ayzaya 40:8.

LAN MƆ

Lan mɔ bɔt aw Gɔd bin dayrɛkt sɔm man dɛn fɔ rayt di Baybul, aw i dɔn protɛkt am, ɛn aw i dɔn mek di Baybul de ɔlsay na di wɔl.

4. Di Baybul sho di Wan we rayt am

Ple di VIDIO. Dɔn una rid 2 Timoti 3:16, ɛn tɔk bɔt di kwɛstyɔn dɛn we de dɔŋ.

VIDIO: Udat in Wɔd De Insay di Baybul?—Shɔt Pat (2:48)

If na mɔtalman dɛn bin rayt di Baybul, wetin mek dɛn kɔl am Gɔd in Wɔd?
Yu tink se i mek sɛns fɔ biliv se na Gɔd go dɔn dayrɛkt mɔtalman dɛn fɔ rayt in wɔd?

Sɛktri kin rayt lɛta, bɔt na wetin in bɔsman tɛl am i de rayt. Semweso, na mɔtalman dɛn rayt di Baybul, bɔt di mɛsej kɔmɔt frɔm Gɔd

5. Dɛn nɔ ebul fɔ dɔnawe wit di Baybul

If di Baybul na frɔm Gɔd, wi de ɛkspɛkt se Gɔd go protɛkt am. Istri dɔn sho se pawaful man dɛn bin tray fɔ donawe wit di Baybul. Bigman dɛn pan Gɔd biznɛs dɔn tray fɔ stɔp pipul dɛn fɔ rid di Baybul. Bɔt bɔku pipul dɛn bin risk dɛn layf fɔ protɛkt di Baybul, pan ɔl we dɛn bin de agens dɛn ɛn trɛtin fɔ kil dɛn. Fɔ lan bɔt wan pan dɛn man dɛn ya, ple di VIDIO dɔn una tɔk bɔt di kwɛstyɔn dɛn we de dɔŋ.