Yehova me pesa beto dikabu mosi ya kitoko mingi: ni Biblia. Na kati ya yawu ke na babuku ya fioti 66. Kasi nge lenda yufula: ‘Wapi kisika Biblia katukaka? Na bantu to na Nzambi?’ Samu na kuzwa bamvutu na byuvu yayi, beto zonzila wapi mutindu Nzambi salá samu na kupesa beto mambu ya yandi yina ke na kati ya Biblia.

1. Ni bantu soniká Biblia, kasi samu na yinki beto ke na zonzá ti ya katuká na Nzambi?

Bantu 40 soniká Biblia. Ya baká bamvula 1600 samu na kusonika yawu, katuka 1513 T.N.B. tii 98 N.B. Ba yina soniká Biblia vandá ve na luzingu mosi. Ba ya nkaka vandá sala bilanga. Ba ya nkaka vandá bumba bibulu. Ba ya nkaka vandá bamfumu. Kasi bitini nyonso ya Biblia ke zonzá mambu faso mosi. Samu na yinki? Samu ti Biblia katuká na Nzambi. (Tanga 1 Batesalonika 2:13.) Ba yina soniká Biblia soniká ve makanisi ya bawu mosi. Kasi ba “zonzaka mambu yina me katuka na Nzambi mutindu mpeve ya santu vanda twadisa bawu.” a (2 Piere 1:21, nwt-MK) Nzambi sadilá mpeve ya yandi ya santu samu na kutwadisa bantu na kusonika makanisi ya yandi.—2 Timote 3:16.

2. Nani lenda kuzwa Biblia?

Nzambi zonzá ti “bantu ya bayinsi nyonso, [. . .] bandinga nyonso, mpe makanda nyonso” ke kuzwa nsangu ya mbote yina ke na kati ya Biblia. (Tanga Luzabusu 14:6.) Bubu yayi, Biblia ke na bandinga mingi kulutila babuku nyonso ya nkaka. Muntu nyonso lenda tanga Biblia ata kisika yina yandi kele to ndinga yina yandi ke zonzaka.

3. Yinki zolá kumina Biblia mpe wa’ faso Yehova bumbaka yawu?

Ba soniká Biblia na zulu ya mikanda ya ntama yina vandá ve ngolo, mutindu bampusu ya bibulu to ya bayinti. Kasi bantu yina vandá zola Biblia, soniká yawu na mikanda mingi ya nkaka samu na kubumba yawu. Katuka na ntama, bamfumu ya nene sosá kuzimbisa Biblia mpe bamfumu ya mabuundu ya nkaka zolá ve ti bantu tanga Biblia. Kasi bantu ya nkaka salá nyonso samu na kubumba yawu, ata na mantwala ya lufwa. Yehova biká ve ata muntu to ata kima kanga yandi nzila na kusolola na beto. Biblia ke zonzá: ‘Mambu ya Nzambi ya beto ke zingaka ntangu nyonso.’—Izaya 40:8.

 SOSA KUZABA MBOTE-MBOTE

5. Ba zolá zimbisa Biblia, kasi ya vuukaka

 6. Buku samu na bantu nyonso

Na yinza nyonso mpe na babuku nyonso, Biblia ke buku yina ba me lutila kukabula, mpe yina ba me bangula na bandinga mingi. Tanga Bisalu 10:34, 35, mpe na manima beto zonzila byuvu yayi:

• Samu na yinki Nzambi zola ti bantu nyonso kuzwa Biblia ata ndinga ya bawu to kisika yina ba kele?

• Yinki me simba ntima ya nge na yina me tadila Biblia?

 NA BUNKUFI

Biblia katuká na Nzambi, mpe yandi salá nyonso samu bantu kuzwa yawu.

Mambu ya kusimba

• Yinki zola zonza: Nzambi twadisaka bantu samu ba sonika Biblia?

• Na nyonso yina nge me longoka na kileso yayi, yinki me simba ntima ya nge na yina me tadila Biblia?

• Nzambi salá nyonso samu nge zaba makanisi ya yandi yina ke na kati ya Biblia. Yinki ya ke na salá nge na kuzaba yawu?