SIRONGWA 05
Bibeli kuna kara mbudi zaKarunga
Jehova kwa tu pa uhwi wounene, Bibeli, amo kwa kara mo nobuke 66. Nampo ove kulipura asi: ‘Ngapi za wiza po Bibeli? Yilye ga retesa po Bibeli?’ Mokugwana malimbururo, tu zogereni omu ya genda tu gwane Bibeli.
1. Nsene asi Bibeli kwa zi tjenge vantu, ngapi omu ga zi retesa po Karunga?
Bibeli kwa zi tjenge vagara wokusika po 40 wokonontundiliro dokulisiga-siga, monomvhura dokupitakana po-1 600. Kutundilira momvhura 1513 komeho a wize Jesus dogoro momvhura 98 konyima zokuwiza Jesus pevhu. Nye Bibeli kapi za lilimba. Ngapi omu ya gendere? Morwa Bibeli kwa zi retesa po Karunga. (Resa 1 Vatesaronika 2:13.) Ava va zi tjenge kapi va tjenge magano gavene nye ‘gokutunda kwaKarunga kupitira mompepo zokupongoka.’ a (2 Peturusa 1:21) Karunga kwa geve mpepo zokupongoka kovagara vena va tjange magano gendi.—2 Timoteusa 3:16.
2. Yilye na gwanena mo uwa moBibeli?
‘Vantu womarudi nagenye nomaraka nagenye nonomuhoko nadinye’ kuvhura kugwanena mo uwa moBibeli. (Resa Ehororo 14:6.) Karunga kwa divilisa asi Bibeli zi kare momaraka gomanzi kupitakana nobuke dapeke. Hambara nkenye ogu kuvhura kugwana Bibeli, yi kare asi eraka musinke a uyunga ndi kupi ga tunga.
3. Ngapi omu Jehova ga popera Bibeli?
Bibeli kwa zi tjenge poyininke eyi ayi zonauka usimbu ngwendi sipapa ntani yipepa ava tumbura asi papyrus. Nye vantu ava va here Bibeli kwa zi tjangwilire yikando yoyinzi. Nampili ngomu vapangeli novampitisili vamwe va hetekerere ko kuzizonagura po, nye vamwe kwa tulire eparu lyawo mosiponga mokuzipopera. Jehova kapi ga pulisilire nkenye eyi ndi nkenye ogu a mu hagekese mokuuyunga kumwe nose. Bibeli kutanta asi: “Nonkango daKarunga gwetu ngadi kara dogoro narunye.”—Jesaya 40:8.
LIRONGA KO YOYINZI
Lironga ko yoyinzi omu Karunga ga gendesere vagara va tjange Bibeli nomu ga zi poperere ntani nomu za genda va zi gwane vantu wovanzi.
4. Bibeli za horora ogu ga zi retesa po
Likida VIDIYO. Makura resa 2 Timoteusa 3:16, ntani zogereni mapuro gana kukwama ko.
-
Nsene asi vantu va tjenge Bibeli, morwasinke ava zi tumbwire asi Nonkango daKarunga?
-
Omu ono kugazara, Karunga sili kuvhura a gave magano gendi kovantu va ga tjange ndi?
Muntu kuvhura a tjange mbudi nye ogu ana zi mu tantere gwapeke. Mokulifana, vantu yiwo va tjenge Bibeli nye mbudi kwa tundire kwaKarunga
5. Bibeli kapi va vhura kuzizonagura po
Nsene Bibeli kwa tunda kwaKarunga, age nga zi popera. Vapangeli novampitisili womaukareliKarunga kwa hetekera ko kuzonagura po Bibeli ndi kuzihoreka. Nampili ngomu va ligwanekerere nomarwaneso ntani nokuvadipaga, sinzi sovantu kwa tulire eparu lyawo mosiponga mokupopera Bibeli. Mokulironga kuhamena gumwe govagara owo, likida VIDIYO, makura zogereni mapuro gana kukwama ko.
-
Mokumona asi vantu kwa tulire eparu lyawo mosiponga va popere Bibeli, ngoso kapi ayi ku tumangeda o hare kuresa Bibeli ndi?
Resa Episarome 119:97, makura zogereni epuro eli:
-
Yisinke ya tumangedere vantu wovanzi va ture eparu lyawo mosiponga mokutoroka Bibeli ntani nokuzigavera kovantu?
6. Buke zovantu navenye
Bibeli kuna kara buke va toroka po unene nokuzihanesa uzuni mudima. Resa Yirugana 10:34, 35, makura zogereni mapuro aga:
-
Morwasinke Karunga ana harere asi Nonkango dendi va di toroke ntani nokudihanesa?
-
Yisinke wa harera Bibeli?
Konyara
100%
dovantu mouzuni
kwa kara noBibeli meraka eli ava kwata egano
Bibeli nazinye ndi ruha rwazo
3 000
kuzigwana momaraka
gokupitakana
5 000 000 000
sivaro esi va zi nduruka
kupitakana nobuke dapeke
VAMWE KUTANTA ASI: “Bibeli buke zanare ezi va tjanga vantu.”
-
Ove ngapi o zi tara?
-
Yisinke ayi likida asi Bibeli Nonkango daKarunga?
YINKE ONO LIRONGO?
Bibeli Nonkango daKarunga, ntani ga divilisire asi va zi gwane vantu navenye.
Erugururomo
-
Ngapi omu Karunga ga ruganesere vantu va tjange Bibeli?
-
Yisinke ayi ku tetukisa omu Bibeli va zi popera, nomu va zi toroka nomu va zi hanesa?
-
Ngapi omu ono kulizuvha kweyi Karunga ga tulisa po ewapaiko lyokuuyunga kumwe nove?
MAUZERA GAMWE
Resa omu Bibeli va zi torokere kutundilira momaraka gokuhova aga va zi tjenge.
“Omu twa gwene Bibeli” (Awake!, Mangundu 2007)
Tara omu Bibeli va zi poperere koyininke yitatu.
“Bibeli—Omu va heteka kuzizonagura po” (Ruhungu No. 4 2016)
Tara omu vamwe va tulire eparu lyawo mosiponga mokutoroka Bibeli.
Bibeli kwa zi tjangurura nokuzitoroka yikando yoyinzi. Ngapi omu twa yi diva asi mbudi zomoBibeli kapi za li tjindja?
“Bibeli va zi tjindja ndi?” (Sirongwa sokojw.org)
a Mpepo zokupongoka kuna kara nonkondo daKarunga, ngomu nava ka yi zogera mosirongwa 07.
Kuvhura o hafere hena
MAPURO
Yisinke elirongo lyoBibeli?
Kuvhura o lironge Bibeli noNombangi daJehova mawoko-woko ntani kuvhura o ruganese Bibeli za nyamoge. Kuvhura o zigide ko epata lyoge ndi vakaume woge va ya kare pelirongo lyoge lyoBibeli.
