SOMO 05
Biblia kʉ Mungu dzá lo
Yova bbʉ Biblia ko dho. Fø bblo pli kʉ ná kado nǎ rere buku kʉ 66. Njaro ni ka ni dhuri ni tso: ‘Biblia ká si ngbaga ro?’ Nde ri ká kʉ ie dzá lo? Ndiro ko ba fø logoti d’e, akotilo addu ma Mungu njingʉe nari djo nja ko ba Biblia d’e.
1. Njati rie ndrŭ ndingʉe Biblia ri ró, ká addu dzá lo dho le ri nzi Mungu dzá lo?
Biblia ndi ná kpa ngʉe 40 ngatsi, ri kpa ndingʉe cho 1 600 kana, føri ngʉe cho 1513 Y.G.N. djó ro kpø cho 98 djo Y.G.G. Ngbà mai Biblia ndi nari ngʉe njonjo kʉ ná kpa ro, ri nǎ krʉ kʉ ná lo tso ra nju ddi. Ri nǎ lo tso ká nju addudho? Dhonalo Biblia si Mungu dhó ro. (Azø 1 Watesalonike 2:13.) Biblia ndi ná kpa nzá ndingʉe ndima dhó ngaddidha ri. Fø nga rɨngana, “kpa tingʉe Mungu dhó ro si ná lo, roho takatifu ngʉ kpa cho nari dho.” a (2 Petro 1:21) Mungu ddangʉe chutso ndrŭ dho ndidhó roho takatifu chulu ndiro ndrŭ ndi ndidhó ngaddidha d’e.—2 Timoteo 3:16.
2. Biblia nǎ ro ká ie ka ndi ba faida?
Biblia nǎ kʉ ná hwè lo-i ka ndi bbʉ faida “krʉ ndrŭ tsɨ ma, krʉ ndrŭ bbu ma, krʉ dha ti ná ndrŭ” ma na dho. (Azø Ufunuo 14:6.) Mungu liri Biblia e bí kʉ ná luga nǎ nja buku krʉ djolu. Chøchø krʉ kʉ ná ndrŭ ka ndima zø Biblia zø rie ngbá dha ma ndima ti inga ngbaga ma ndima di ri ró.
3. Yova ká b’ongʉe Biblia ronga ngbaribbai?
Biblia le ngʉ adi ndi sa ka ndi sani ná ritsi djo, loroji na zǎ ró kødha djo ma, mɨ (papyrus) djo ma. Ro, ji nanga jingʉeni Biblia dho ná kpa ndingʉe ri dhi kopi nanga ki vi ndima thó na. Nì mai kpakpa o ná nja kpa ngʉ rine ndima si Biblia si ro, nja ndrŭ ngʉe tayari ndima li ndima dhó shinga hatari na ndiro Biblia ronga b’oni b’o d’e. Yova nzá bbangʉe ddikpa le ma inga ddikpa ritsi ma cho ndi tso ro ndi loti ko na nari ró ri. Biblia ripo ɨ: “Kodhi Mungu dzá lo di theinga dho.”—Isa. 40:8.
ANE LONANGA BBO
Aneri ni chu ngbaribbai ma Mungu ddangʉe chutso ndiro ndrŭ ndi Biblia nari, ngbaribbai ma ke b’ongʉe ri ronga nari ndirigoti ngbaribbai ma ke liri krʉ kʉ ná ndrŭ ba ri nari.
4. Biblia d’ra ndi ká si ie dhó ro ma nari
Aninja VIDEO. Azø 2 Timoteo 3:16, ndirigoti anitilo i ngadhudha djo.
-
Njati rie ndrŭ ndingʉe Biblia ri ró, ká addu dzá lo dho le ri nzi Mungu dzá lo?
-
Ndrŭ ndingʉe Mungu dhó ngaddidha ná føri ká ni ka ni u u?
Sekretere ka ndi ndi barua, fø barua na nzá sekretere ka ndi ndi ndidhó ngaddidha ri, ro ke ka ndi ndi ripo ndi ndi ná ke dhó ngaddidha. Føri bbai, Biblia ndrŭ ndingʉe, ro ndrŭ ndingʉe Mungu dhó ro si ná lo
5. Biblia singʉe njonjo kʉ ná kpakpalo djolu
Njati rie bbʉbbʉ Biblia si Mungu dhó ro ri ró, ke ka ndi b’o ri ronga ngbà. Drrdrr nga djó ro, kpakpanga na ngʉe ná kpa ngʉ rine ndima si Biblia si. Dini nǎ bbobbokpa ma ngʉ ndrŭ ronga tso cho ddi ndiro nzɨ ndrŭ zø Biblia ró. Ro nì mai upinzani ma ngʉe ndirigoti ndrŭ ngʉ rine ndima ché nja kpa che ro, bí kʉ ná kpa lingʉe ndima dhó shinga hatari na ndiro Biblia ronga b’oni b’o d’e. Ndiro ni chulo ro fø kpa kana ddike djo d’e, aninja VIDEO, ndirigoti anitilo i ngadhudha djo.
-
Kpadjo ni chu ngbaribbai ma ndrŭ lingʉe ndima dhó shinga hatari na nari bʼlo ndiro Biblia ronga b’oni d’e. Nde føri dho ká ni nanga ka ndi jini nzá nja ni zø Biblia d’e? Ká addudho?
Azø Zaburi 119:97, ndirigoti anitilo i ngadhudha djo:
-
Addui ká chongʉe bí kʉ ná ndrŭ ronga ndima li ndima dhó shinga hatari na ndiro ndima tu Biblia nanga d’i luga nǎ ndirigoti ndima ndo ri ngø djolu gble d’e?
6. Krʉ ndrŭ dho le ndi ná buku
Biblia kʉ bbo nanga le tu ná buku ndirigoti bbo le ndo ná buku dz’ djolu gble. Azø Matendo 10:34, 35, ndirigoti anitilo i ngadhudha djo:
-
Ká addudho Mungu riji ndidzá longa tuni bbo, ndirigoti ri nga plini krʉ nga lu?
-
Biblia dho ká ni nanga jini addudho?
Chøchø
100%
kʉ ná ndrŭ ka ndima zø Biblia
nì ndima famu ná luga nǎ dz’ djolu gble
Ri bani
3 000
djolu da ná luga nǎ
rie lu ma inga ndi lai ró ma ró
5 000 000 000
Ri le chapisha chøchø
ngatsi, ri dada nja buku krʉ djolu
NJA NDRŬ ADI RIPO: “Biblia kʉ drrdrr ndrŭ ndingʉe ná buku.”
-
Nde ni ká adi riddi ngbǎ?
-
Addui ká ridho Biblia kʉ Mungu dzá lo?
LO DZÁ DɄNGA
Biblia kʉ Mungu dzá lo, ndirigoti ke jiri ndrŭ krʉ ba Biblia ba.
Lo djolu le ngʉ nari
-
Mungu ddangʉe chutso ndrŭ dho nja ndrŭ ndi Biblia d’e, føri na mana ká kʉ addu?
-
Biblia ronga b’oni nari ma, ri nanga tuni nari ma, ri le ndo nari ma na djo ká ngbá lo ke ni nanga?
-
Kpadjo ni churi nari kʉ Mungu nji kpakpanga ndiro ndi di loti ni na, nari dho ká ni ni mbu ngbaribbai?
NI KA NI CHU NÁ NJA LO
Azø Biblia dhó historia ndiro ni nja ngbaribbai ma ri dhi kopi ronga b’ongʉeni nari ndirigoti ngbaribbai ma ri nanga tuni fø nga djó ro kpø njʉnga djo nari d’e.
Aneri ni chu ngbaribbai ma Biblia ronga b’ongʉeni gbo kʉ ná kpakpalo ró nari.
Anja ngbaribbai ma ndrŭ lingʉe ndima dhó shinga hatari na ndiro ndima tu Biblia nanga d’i luga lu nari.
Biblia le ndingʉe ndirigoti ri nanga le tungʉe nja luga nǎ bí ina. Biblia nǎ lo thika ro nzá leni ri nari ká ni ka ni u ngbaribbai?
“Biblia Imebadilishwa ao Kugeuzwa?” (Jw.org djó kʉ ná lo)
