CIIYO 05
Baibo Ilicite Makani Lesa Ngaakatupa
Baibo ncipo cibotu abuumbi Yehova ncaakatupa, muli mabuku aniini niini ali 66. Ano mpashi inga mweepusha ayi: ‘Ino Baibo yakaswa kuli? Ino ngani wakailemba?’ Kwaamba ayi tucane shikumbulo kumiipusho iyi, amuleke tubandike mbocakalinga kwaamba ayi tube a maswi akwe Lesa ngotucana mu Baibo.
1. Na bantu mbobakalemba Baibo, ino nceebonshi ncetwaambila ayi Lesa ngo Mulembi wa Baibo?
Bakalemba Baibo bakalinga kushika mpashi kuma 40, alimwi pakeenda myaaka 1,600 kwaamba ayi bamanishe kulemba. Bakatalika mumwaaka 1513 Yesu kaatana kusa pacishi capanshi, alimwi bakesa mukumanisha mumwaaka wa 98 Yesu kaali waboolela kale kwiculu. Alimwi bakalemba bakakomenena mubukaalo bupusenepusene. Kucakubonenaako, bamwi bakalinga babile alimwi bakeeya abuumbi, bamwi bakalinga bakandu batana kwiiya bunene. Nacibi boobo, makani oonse ngotucana mu Baibo alaamba shicatene. Ino ici cakakonsheka buyani? Cakakonsheka mukwiinga Lesa ngo Mulembi wa Baibo. (Amubelenge 1 Bene Tesalonika 2:13.) Bakalemba Baibo tabakalinga kulemba miyeeyo yabo. Sombi bakalemba “nshobakatanjililwa amushimu usalashi.” a (2 Pita 1:21) Lesa wakabatanjilila kwiinda mukusebensesha mushimu wakwe kwaamba ayi balembe miyeeyo yakwe.—2 Timoti 3:16.
2. Ino mbaani beenga bafubilaamo mukwiiya Baibo?
Makani abotu amu Baibo inga acafwa bantu ‘bamushishi shoonse, mishobo yoonse, milaka yoonse alimwi abantu boonse’. (Amubelenge Ciyubululo 14:6.) Lesa wakashinisha kwaamba ayi Baibo yabaako mumishobo iinji abuumbi kwiinda libuku lili lyoonse lyakale kale. Bantu baanji abuumbi inga bacikonsha kubelenga na kukutika makani ali mu Baibo, kuli koonse nkobakala alimwi mumushobo ngobaamba.
3. Ino Yehova wakaishitilisha buyani Baibo?
Baibo yakalinga yalembwa pashintu shinyonyooka, mbuli cipaya alimwi ashakulembawo sha matete. Nacibi boobo, basankwa bamwi bakalinga kusuni Baibo bakatolelela kwikopolola cakubikila maano abuumbi. Nabi kwaamba ayi kwakalinga bamwi bakalinga kusuni kwinyonyoola, bamwi bakalinga kulyaabite kufwitawo kwaamba ayi bashitilishe Baibo. Yehova wakashinisha kwaamba ayi taakuwo muntu nabi cintu cili coonse cakalinga kweelete kupa kwaamba ayi aalilwe kubandika andiswe. Baibo ilaamba ayi: “Maswi akwe Lesa wesu alaakunoolikobo kwa lyoonse alyoonse.”—Isaya 40:8.
AMWIIYILEWO ASHIMWI
Amwiiye shiinji akubona Lesa mbwakasebensesha mushimu kutanjilila basankwa bakalemba Baibo, mboyakalamwa kabotu, alimwi ambocakakonsheka kwaamba ayi bantu babaayo.
4. Baibo ilatulwiita mwiine wakailemba
Amweebele VIDYO. Lyalo amubelenge 2 Timoti 3:16, akubandika miipusho itokonkelaawo.
-
Na bantu mbobakalemba Baibo, ino nceebonshi ileetwa ayi Maswi akwe Lesa?
-
Mutobona buyani, sa cilibo kabotu kushoma ayi Lesa wakasebensesha bantu kulemba Maswi akwe?
Munene wancito inga walwiita musebenshi wakwe kwaamba ayi amulembeleko nkalata. Aboobo makani musebenshi ngeshi alembe teshi akwe, sombi nga munene wancito. Ubu bweenka mbocakalinga akubaabo bakalemba Baibo. Makani ngobakalemba teshi aabo, sombi akaswa kuli Lesa
5. Bantu bakaalilwa kulobya Baibo
Mukwiinga Baibo yakaswa kuli Lesa, nkokwaamba ayi taakuwo weenga wapa kwaamba ayi ilobe. Kwa myaaka iinji, bantu bacite nkusu shakweendelesha bakeeleshako kwaamba ayi banyonyoole Baibo. Bamatanjilili babupailishi abalo bakeelesha kwiisisa. Nacibi boobo, kwakalinga bantu baanji bakalinga kulyaabite kufwitawo kwaamba ayi bashitilishe Baibo. Kwaamba ayi mwiiye pamuntu womwi pabaabo, amweebele VIDYO, akubandika miipusho itokonkelaawo.
-
Sa kushiba kwaamba ayi bantu bamwi bakalyaaba kwaamba ayi bashitilishe Baibo, kwamupa kusuna kwiibelenga? Ino nceebonshi?
Amubelenge Kulumbaisha 119:97, akubandika mwiipusho uyu:
-
Ino nciinshi cakapa kwaamba ayi bantu baanji babike buumi bwabo mumapensho kwaamba ayi basansulule alimwi akwaabilako bamwi Baibo?
6. Libuku lyeenga lyacafwa muntu uli woonse
Kuswabo kale kale, taakuwo libuku limwi lili lyoonse lyakasansululwa akwaabilwa bunene mbuli Baibo. Amubelenge Milimo 10:34, 35, akubandika miipusho iyi:
-
Ino nceebonshi Lesa alisuni ayi Maswi akwe asansululwe mumishobo iinji alimwi akwaabila bantu baanji?
-
Ino nciinshi ncomusuni abuumbi pamakani ngomweeya pa Baibo?
Bantu baanji
abuumbi
nsengwe yoonse
inga babelenga na kukutika makani amu Baibo akasansululwa mumushobo winemishaabo
Nkoili mumishobo iindilila
3,000
Baibo yoonse na lubasu
Ma Baibo akapulintwa aliiko mpashi alishikite
5,000,000,000
taakuwo libuku lyakapulintwawo
mbuli Baibo
BANTU BAMWI BALAAMBA AYI: “Baibo ndibuku lyakale kale lyakalembwa abantu.”
-
Ino mwebo mulayeeya buyani?
-
Ino nshiinshi shitondesha kwaamba ayi Baibo nga Maswi akwe Lesa?
CITEENTE CINENE
Baibo nga Maswi akwe Lesa, alimwi wakashinisha kwaamba ayi muntu uli woonse inga wacikonsha kubaayo.
Kwiindulukaamo
-
Ino cilasansulula nshi na twaamba ayi Lesa wakasebensesha mushimu wakwe kwaamba ayi bantu balembe Baibo?
-
Ino nciinshi cimusangalasha abuumbi pamakani a Baibo mboyakashitilishikwa, kusansululwa alimwi akwaabilwa?
-
Ino mutolinyumfwa buyani pali Lesa pesule lyakwiiya shoonse nshaakacita kwaamba ayi anoobandika andimwe?
AMULANGWETEEWO ASHIMWI
Amubelenge makani akale kale atokwaamba shakacitika pa Baibo kuswa muma Baibo akale kale kushikila amboyasansululwa munshiku shino.
Amubone mbocakalinga kwaamba ayi Baibo itoolelele kubaako nabi kwaamba ayi kwakalinga shintu shotatwe shinene shakalinga kweelete kupa kwaamba ayi ilobe.
“Makani Aamba Baibo Mboyakashitilishikwa” (Njashi Yamulindilishi No. 4 2016)
Amwiiye mapensho bantu ngobakeendaamo kwaamba ayi basansulule Baibo.
Baibo yakakopololwa alimwi akusansululwa mankanda aanji. Ino inga twashoma buyani ayi Maswi akwe Lesa taakwe kwaalulwa?
You May Also Like
MIIPUSHO LIINJI BANTU NJOBEPUSHA
Ino Nshiinshi Nsheenga Mweeya Ndyemutokwiiya Baibo a Bakamboni Bakwe Yehova?
Ndyemutokwiiya Baibo a Bakamboni Bakwe Yehova kwakubula kulipila, inga mwasebensesha Baibo ili yoonse. Mulyangulukite kwiitako bamumukwashi wanu na beshicibusa banu bali boonse mbweenga mwasuna kucanikaawo paciiyo.
