DILONGESHA 05
Bible udi ne mêyi adi Nzambi utumanyisha
Yehowa mmutupeshe dipa dimpe dia dikema dia Bible. Bible mmuenza ne mikanda 66. Kadi udi mufuane kudiebeja ne: Bible mmufume penyi? Muenaye nnganyi? Bua kuandamuna nkonko eyi, tumonabi mudi mêyi a Nzambi adi mu Bible mafike kutudi.
1. Bikalabi ne: bantu ke bavua bafunde Bible, bua tshinyi tudi tuamba ne: mmukanda wa Nzambi?
Bantu batue ku 40 ke bavua bafunde Bible. Bakamufunda mu bidimu bitue ku 1 600, kutuadijila ku 1513 K.Y. too ne ku 98 P.Y. Bantu bavua bafunde Bible bavua bantu bashilangane. Nansha nanku, bionso bidibu bafunde mu Bible bidi biumvuangana. Mushindu kayi? Mbienzeke nanku bualu Nzambi ke Muena Bible. (Balayi 1 Tesalonike 2:13.) Bantu bavua bafunde Bible kabakafundamu ngenyi yabu to. Kadi “bakakula malu a kudi Nzambi bu muvuabu benzeja kudi nyuma muimpe.” a (2 Petelo 1:21) Nzambi wakasaka bantu ku bukole bua nyuma wende muimpe bua kufundabu ngenyi yende.—2 Timote 3:16.
2. Mbanganyi badi mua kuikala ne Bible?
Bantu ba mu “tshisamba tshionso, tshisa tshionso, muakulu wonso ne bantu bonso” badi mua kupeta lumu luimpe ludi mu Bible. (Balayi Buakabuluibua 14:6.) Nzambi mmuenze bua Bible ikale mu miakulu ya bungi bupite budi mikanda mikuabu yonso. Nunku bantu pabuipi ne bonso badi mua kubala Bible. Bidi nanku nansha bobu basombele muaba kayi anyi bakula muakulu kayi.
3. Yehowa mmukube Bible mushindu kayi?
Bakafunda malu a mu Bible pa bintu bidi binyanguka lukasa, bu mudi biseba bia nyama anyi biata bia bisonsa bia nyandu. Kadi bantu bavua banange Bible bakamutentula bimpe bimpe misangu ne misangu. Nansha muvua bantu bavua ne bukokeshi bajinga kujimija Bible, bantu bakuabu bobu bakitaba bua kuteka mioyo yabu mu njiwu bua kumukuba. Yehowa ki mmulekele muntu anyi tshintu tshimupangisha bua kutumanyisha mêyi ende to. Bible udi wamba ne: “Dîyi dia Nzambi wetu didi dishala kashidi.”—Yeshaya 40:8.
BUELA MU BUONDOKE
Longa malu makuabu a muvua Nzambi musake bantu bua kufunda Bible, muvuaye mumukube, ne muvuaye muenze bua bantu bamupete.
4. Bible udi uleja Muenaye
Tangilayi FILME. Pashishe balayi 2 Timote 3:16, nuandamune nkonko eyi:
-
Bikalabi ne: bantu ke bavua bafunde Bible, bua tshinyi tudi tuamba ne: nDîyi dia Nzambi?
-
Buebe wewe, mbia meji bua kuitaba ne: Nzambi uvua mua kupesha bantu ngenyi yende bua kuyifundabu anyi?
Muntu udi mua kulomba mukuabu bua kumufundila mukanda. Malu ikalamu ki nga udi muwufunde to, kadi nga udi muafundishe. Bia muomumue, bantu ke bakafunda Bible, kadi mukenji udimu mmufumine kudi Nzambi
5. Bible wakapanduka ku buluishi
Nzambi mmukube Bible bualu mmukanda wende. Ku kale bantu bavua ne bukokeshi bakajinga kujimija Bible. Bamfumu ba bitendelelu bakateta pabu bua kumusokoka bantu. Nansha muvuaku buluishi ne njiwu ya lufu, bantu ba bungi bakateka mioyo yabu mu njiwu bua kukuba Bible. Bua kumanya umue wa ku bantu abu, tangilayi FILME, pashishe nuandamune nkonko eyi:
-
Mpindieu uudi mumanye malu akenzeka bua kukuba Bible, kabienaku bikusaka bua kumubala anyi? Bua tshinyi?
Balayi Misambu 119:97, pashishe nuandamune lukonko elu:
-
Ntshinyi tshivua tshisake bantu ba bungi bua kuteka mioyo yabu mu njiwu bua kukudimuna Bible ne kumuabanyina bantu?
6. Mukanda mufundila bantu bonso
Bible ke mukanda udibu batamba kukudimuna ne kuabanyina bantu bikole. Balayi Bienzedi 10:34, 35, pashishe nuandamune nkonko eyi:
-
Bua tshinyi Nzambi mmusue bua bikale bakudimuna Dîyi diende bikole ne badiabanyina bantu mushindu eu?
-
Mbualu kayi bua Bible budi bukusankisha?
Bantu
pabuipi ne bonso
pa buloba bujima
badi ne Bible mu muakulu udibu bumvua
Ukadiku
mujima anyi tshitupa
mu miakulu mipite pa
3 000
Bungi butshinka bua Bible ikadibu bapatule:
miliyare 5
mbupite bua mukanda kayi wonso
BAMUE BATU BAMBA NE: “Bible yeye mmukanda wa tshiena kale mufunda kudi bantu.”
-
Kadi wewe udi wamba tshinyi?
-
Mmalu kayi adi ajadika ne: Bible nDîyi dia Nzambi?
TSHIA KUKUATA
Bible nDîyi dia Nzambi. Nzambi mmuenze bua bantu bonso bamupete.
Diambulula
-
Patudi tuamba ne: Nzambi wakasaka bantu bua kufundabu Bible, bidi bisua kumvuija tshinyi?
-
Ntshinyi tshidi tshikukemesha bua dipanduka dia Bible, dimukudimuna, ne dimuabanyina bantu?
-
Mpindieu uudi mumanye mudi Nzambi mudienzeje bua kukumanyisha malu ende, bidi bikusaka bua kuenza tshinyi?
BIA KUTANGILA KABIDI
Bala malu a muakafundabu Bible kale ne mudibu bamukudimuna matuku etu aa.
Mona muvua Bible mupanduke ku njiwu minene isatu ya kumujimija.
“Muvua Bible mupanduke” (Tshibumba tshia Nsentedi No. 4 2016)
Mona njiwu mikuabu yakitaba bantu bua kukudimuna Bible.
Mbatentule Bible ne bamukudimune misangu ne misangu. Ntshinyi tshidi mua kukujadikila ne: mukenji udimu mmushale anu mujalame?
“Mbashintulule mêyi a mu Bible peshi baakonyangaje anyi?” (Tshiena-bualu tshia mu jw.org)
a Anu muabiumvuijabu mu Dilongesha dia 07, nyuma muimpe mbukole buenzeji bua Nzambi.
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
