CHILONGESA 05
MuMbimbiliya Mwatwama Mujimbu waKalunga
Yehova atuhana Mbimbiliya yize yapwa wana wakulipwila, kaha mwatwama mikanda 66. Pamo weji kulihulisanga ngwove: ‘Uno Mbimbiliya yahetele ngachilihi kuvatu? Kaha iya apwa mwenyayo?’ Hakusaka kukumbulula vihula kana, tushimutwile omwo Mbimbiliya yahetele kuvatu.
1. Mwomwo ika natwambila ngwetu Kalunga ikiye MwenyaMbimbiliya okunyi vayisonekele kuvatu?
Mbimbiliya vayisonekele kuvatu 40, hamyaka kafwe 1,600, kufuma mu 1513 B.C.E., nakuheta kafwe mu 98 C.E. Vayisonekele kuvatu vakulisezaseza. Vamwe vapwile tufunga, veka vaka-kuta ishi, navamyangana. Chipwe ngocho, vasonekele vyuma vyakulifwana. Mwomwo ika? Mwomwo Kalunga ikiye mwenyaMbimbiliya. (Tanga Wavaka-Tesolonyika 1, 2:13.) Kavasonekele vyamumitwe yavoko, oloze “vahanjikile vyakuli Kalunga, omu vavatwaminyinyine nashipilitu yajila.” a (WaPetulu 2, 1:21) Kalunga avahwiminyinyine, chipwe ngwetu avatwaminyinyine nashipilitu yenyi yajila, mangana vasoneke vyuma asakile.—WaChimoteu 2, 3:16.
2. Uno Mbimbiliya yili nakukafwa veya?
Mujimbu wamwaza wamuMbimbiliya unahase kukafwa “vaka-mafuchi osena, navaka-miyachi yosena, navaka-malimi osena, navatu veka naveka vosena.” (Tanga Kusoloka 14:6.) Kalunga nalingisa Mbimbiliya vayalumune mumalimi amavulu chikuma, kuhambakana mikanda yeka yosena. Shikaho, mutu nahase kutanga Mbimbiliya mukala lilimi chipwe kala kwosena okwo ali.
3. Uno Yehova nakinginga ngachilihi Mbimbiliya?
Mijimbu yamuMbimbiliya vayisonekele havinoma vize vyeji kupolanga. Vayisonekele hamalambu nahamateve. Oloze vatu vaze vazangile mijimbu kana, vayinungulwililenga hamalambu nahamateve amahya. Numba tuhu vatu vangolo vasakile kufumisako Mbimbiliya, oloze kwapwile veka vaze vahakile kuyoya chavo muponde mangana vayikinge. Kakweshi mutu chipwe kala chuma, chize chahonesa Yehova kuhanjika nayetuko. Mbimbiliya ngwayo: “Mazu aKalunga ketu nawelilanga haya myaka yosena.”—Isaya 40:8.
LINANGULE VYAKUJIMINYINA
Linangule vyavivulu hajila Yehova ahwiminyinyinemo vatu vasoneke Mbimbiliya, nomwo nayikinginga, navyuma nalingi mangana vatu vapwenga nayo.
4. Mbimbiliya yavuluka Mwenyayo
Talenu VINDIYO. Kufumaho, tangenu WaChimoteu 2, 3:16, nakushimutwila havihula vinakavangizaho.
-
Nge Mbimbiliya vayisonekele kuli vatu, kaha mwomwo ika vayivulukila ngwavo Mazu aKalunga?
-
Kutala washinganyeka ngwove chakutamo mutu kufwelela ngwenyi, Kalunga nahase kuzachisa vatu vasoneke vishinganyeka vyenyi tahi?
Mukulwane wamilimo nahase kulweza muka-kusoneka asoneke mukanda. Shikaho vyuma mwasoneka ou muka-kusoneka navifuma kuli mukulwane wamilimo. Chochimwe nawa, vyuma vasonekele vatu muMbimbiliya vyafumine kuli Kalunga
5. Mbimbiliya yinayovokanga kuli vaka-kole
Mbimbiliya yapwa mukanda waKalunga, ngocho nayikinginga yihete nakulelo. Putu vene kushikulu, vatu vangolo vanakilikitanga mangana vafumiseko Mbimbiliya. Vatwamina vamumauka akwitava nawa, vanakanyisanga vatu javo kuyitanga. Oloze vatu vavavulu vanakinginga Mbimbiliya, chamokomoko nakuvafumbukila nakuvevwisa woma ngwavo navavajiha. Hakusaka kwijiva mutu umwe alingile ngocho, talenu VINDIYO, nakushimutwila havihula vino:
-
Uno kutachikiza ngwove vatu vanahakenga kuyoya chavo muponde vakinge Mbimbiliya, chinakukafwe ufwile kuyitanganga tahi? Kaha mwomwo ika?
Tangenu Samu 119:97, nakushimutwila hachihula chino:
-
Chuma muka chinalingisanga vatu vavavulu vahake kuyoya chavo muponde valumune Mbimbiliya nakuyipangila kuvatu?
6. Mukanda wavatu vosena
Mbimbiliya ukiko kaha mukanda valumuna mumalimi amavulu chikuma, nakuupangila kuvatu vavavulu. Tangenu Vilinga 10:34, 35, nakushimutwila havihula vino:
-
Mwomwo ika Kalunga asakila ngwenyi Mazu enyi vawalumune mumalimi amavulu nakuwapangila kuvatu vavavulu?
-
Vyuma muka unalinangula haMbimbiliya muchilongesa chino vize vinakwivwisa kuwaha?
Vatu
vavavulu
muno mukaye
vali naMbimbiliya mulilimi lize vatachikiza
Mbimbiliya yamuundu chipwe yachihanda,
yili mumalimi
akuzomboka
3,000
Jimbiliyoni jitanu
Echi chikiko kuvula chajiMbimbiliya josena valovola
kuhambakana mikanda yeka yosena
VATU VAMWE NGWAVO: “Mbimbiliya yapwa mukanda wakushikulu, uze waseka lyehi.”
-
Nyi ove washinganyeka muka?
-
Unjiho muka wasolola nge Mbimbiliya yapwa Mazu aKalunga?
CHISHINA UNALINANGULA
Kalunga nalinginga vyuma vyavivulu mangana vatu vosena vapwenga naMbimbiliya mwomwo yapwa Mazu enyi.
Kuhituluka
-
Uno kwamba ngwetu Kalunga ahwiminyinyine vatu vasoneke Mbimbiliya chalumbununa ika?
-
Vyuma muka unalinangula haMbimbiliya muchilongesa chino, vize vinakwivwisa kuwaha?
-
Uli nakwivwa ngachilihi hakutachikiza ngwove Kalunga ahakako jila yakuhanjikilamo nayove?
WANA VYAVIVULU
Linangule omwo Mbimbiliya vanayinungululanga kufuma kumikanda yakuvunga nakuheta kuli yamakumbi ano.
“Omu Mbimbiliya Yahetele Kuli Etu” (Tonenu!, November 2007)
Linangule omwo Mbimbiliya yayovokele kuvyuma vitatu.
Wana omwo vatu vahakile kuyoya chavo muponde, mangana valumune Mbimbiliya.
Mijimbu yamuMbimbiliya vanayinungululanga, nakuyalumuna mumalimi eka mapapa kakavulu. Jino naufwelela ngachilihi ngwove mijimbu kana yichili yakwoloka?
“Kutala muMbimbiliya Valumunamo Vimwe Tahi?” (Chihande chili ha jw.org/lue)
a Shipilitu yajila yapwa ngolo jaKalunga. Chihande kana navachilumbununa muChilongesa 07.
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
