XNAQʼTZBʼIL 05
Toj Biblia tkuʼx tqanil in tzaj tqʼoʼn Dios qe
O tzaj tqʼoʼn Jehová jun tbʼanel oyaj qe: aʼyeju 66 uʼj ateʼkux toj Tyol Dios. Pero jakulo kubʼ t-xjelina jlu: «¿Jatumel tzaj Biblia? ¿Alqe ximbʼetz tkuʼx toj?». Tuʼn kyxi tzaqʼwet xjel lu, qo xnaqʼtzan tiʼj tzeʼn o tzul Tyol Dios qukʼil.
1. Qa kubʼ tzʼibʼin Tyol Dios kyuʼn xjal, ¿tiquʼntzun in xi qqʼamaʼn qa t-ximbʼetz Dios tkuʼx toj?
E onin junlo 40 xjal tuʼn tkubʼ tzʼibʼin Tyol Dios, aʼyeju ten junxichaq kyanqʼibʼil ex kyaqʼun. Xi tiʼn junlo 1,600 abʼqʼi tuʼn tkubʼ tzʼibʼit Tyol Dios. Tzaj tzyet tuʼn tkubʼ tzʼibʼit toj abʼqʼi 1513 tjaqʼxi ambʼil qʼiʼn quʼn jaʼlo ex kubʼaj toj abʼqʼi 98 tiʼj ambʼil qʼiʼn quʼn jaʼlo. Maske ikju, mintiʼ in chʼexpaj tqanil tkuʼx toj. ¿Tiquʼn? Tuʼnju t-ximbʼetz Dios tkuʼx toj (uʼjinktza 1 Tesalonicenses 2:13). Mintiʼ kux kyqʼoʼn xjal kyximbʼetz toj, sino kubʼ kytzʼibʼin «aju tzaj tmaʼn Dios kye, porke ẍaqluʼn qe tuʼn Xewbʼaj Xjan» (2 Pedro 1:21). a Tuʼn tonbʼil xewbʼaj xjan kubʼ kytzʼibʼin xjal t-ximbʼetz Dios (2 Timoteo 3:16).
2. ¿Jakupe tzʼonin Tyol Dios kyiʼj kykyaqil xjal?
Jaku tzʼonin tbʼanel tqanil in tzaj tqʼoʼn Tyol Dios kyiʼj «kykyaqil kyiyjil xjal», kyyol ex kytnam (uʼjinktza Apocalipsis 14:6). O tzʼonin Dios tuʼn tten Tyol toj nimku yol. Ax ikx, atzun uʼj lu mas in kubʼ traducirit. Chʼixme kykyaqil xjal jaku tzʼok kybʼiʼn tqanil tkuʼx toj Biblia noq jaxku tumel in che anqʼin ex alkyexku kyyol.
3. ¿Tiʼ o bʼant tuʼn Jehová tuʼn kukx tten Tyol?
Kubʼ tzʼibʼin Tyol Dios kywitz tiʼchaq jun rat in che kubʼ laqj. Jun techel, e ajbʼen qe rollo bʼinchan maj tuʼn ttzʼumil txkup moqa tiʼj t-xaq jun tzeʼ papiro tbʼi. Ateʼ xjal ok kyqʼoʼn toklen Tyol Dios ex bʼaj kybʼinchaʼn nim copia tiʼj tukʼil kyqʼabʼ. Ok tilil kyuʼn xjal at kyoklen tuʼn tkubʼ kynajsaʼn Tyol Dios, atzun junjuntl e kolin tiʼj maske jakutoq che kubʼ bʼyoʼn. Mintiʼ o txi tqʼoʼn Jehová ambʼil te jun xjal tuʼn tel tiʼn ambʼil te tuʼn ttzaj tqʼoʼn Tyol qe. In tzaj tqʼamaʼn Tyol Dios jlu: «Atzunte tyol Qman Dios kukx ktel te jumajx» (Isaías 40:8).
QO JYON MAS TQANIL
Bʼaʼn tuʼn tel qnikʼ tiʼj alkye tten ajbʼen xewbʼaj xjan tuʼn Dios tuʼn tonin kyiʼj xjal tuʼn tkubʼ kytzʼibʼin Tyol. Ax ikx tiʼ o bʼant tuʼn tuʼn miʼn tnaj ex tuʼn tpon kyukʼil kykyaqil xjal.
4. In tzaj tqʼamaʼn Biblia alqe ximbʼetz tkuʼx toj
Kyqʼonke kywitze tiʼj VIDEO. Yajxitl kyuʼjinktze 2 Timoteo 3:16 ex che yoline kyiʼj xjel lu:
-
Qa aʼye xjal e kubʼ tzʼibʼinte Biblia, ¿tiquʼn in xi qqʼamaʼn qa Tyol Dios?
-
¿Jakupe tzʼok qeʼ qkʼuʼj tiʼj qa xi tqʼamaʼn Dios t-ximbʼetz kye xjal?
In tzʼibʼin jun secretario tiʼj jun carta, pero te tpatrón t-ximbʼetz in kux ttzʼibʼin toj tuʼnju a in xi dictarinte. Ax jlu bʼaj tukʼil Tyol Dios, aʼye xjal e kubʼ tzʼibʼinte, pero t-ximbʼetz Dios tkuʼx toj.
5. Mintiʼ naj Tyol Dios maske ok tilil kyuʼn xjal tuʼn tkubʼ kynajsaʼn
Qa atz tzajni Biblia tukʼil Dios, il tiʼj tuʼn tkolin tiʼj. Atxix toj ambʼil ojtxe o tzʼok tilil kyuʼn aj kawil tuʼn tkubʼ kynajsaʼn Tyol Dios. Ax ikx ateʼ junjun nejenel kye okslabʼil ok tilil kyuʼn tuʼn miʼn tjaw kyuʼjin xjal. Ateʼ nim xjal e kolin tiʼj Xjan Uʼj maske jakutoq che kubʼ bʼyoʼn kyuʼn aj qʼoj kyiʼj. Tuʼn tok qojtzqiʼn jun kyxol qe xjal lu, kyqʼonke kywitze tiʼj VIDEO ex che yoline tiʼj xjel lu:
-
Aj tel tnikʼa tiʼj qa e kolin xjal tiʼj Tyol Dios, ¿taja tuʼn tuʼjina mas tiʼj? ¿Tiquʼn?
Kyuʼjinktze Salmo 119:97 ex che yoline tiʼj xjel lu:
-
¿Tiquʼn ok tilil kyuʼn xjal tuʼn tkubʼ traducirit Tyol Dios ex tuʼn t-xi sipet maske jakutoq che kubʼ bʼyoʼn?
6. Jun uʼj kye kykyaqil xjal
Oʼkx Tyol Dios o kubʼ traducirit toj nim yol ex o txi sipet twitz tkyaqil Txʼotxʼ. Kyuʼjinktze Hechos 10:34 ex 35, ex che yoline kyiʼj xjel lu:
-
¿Tiquʼn taj Dios tuʼn tkubʼ traducirit Biblia toj nimku yol ex tuʼn t-xi sipet twitz tkyaqil Txʼotxʼ?
-
¿Alkye mas tbʼanel in nela toj twitza tiʼj Tyol Dios?
Chʼixme
kykyaqil xjal
twitz tkyaqil Txʼotxʼ
jaku jaw kyuʼjin Tyol Dios toj kyex kyyol
At toj mas te
3 mil
yol,
tkyaqil moqa noq jun plaj
O tzʼetz imprimirit chʼixme
5 mil millón
Tyol Dios, mas twitz alkyexku juntl uʼj
AJU IN TZAJ KYQʼAMAʼN JUNJUN XJAL: «Ya mintiʼ tajbʼen Tyol Dios ex kyximbʼetz xjal tkuʼx toj».
-
¿Tiʼ teya t-ximbʼetz tiʼj?
-
¿Tiquʼn in xi qqʼamaʼn qa t-ximbʼetz Dios tkuʼx toj Biblia?
TOJ CHʼIN YOL
Ma tzʼel qnikʼ tiʼj qa t-ximbʼetz Dios tkuʼx toj Biblia ex o tzʼok tilil tuʼn tuʼn tpon kyukʼil kykyaqil xjal.
Aju ma qo yolin tiʼj
-
¿Tiquʼn in xi qqʼamaʼn qa e ajbʼen xjal tuʼn Dios tuʼn tkubʼ kytzʼibʼin Tyol?
-
¿Tiquʼn tbʼanel in nela toj twitza tuʼnju kukx at Tyol Dios qukʼil maske o tzʼok tilil kyuʼn aj qʼoj tuʼn tnaj? ¿Ex tiʼ t-xima tiʼj tuʼnju in netz toj nimku yol ex in xi sipet twitz tkyaqil Txʼotxʼ?
-
¿Tiʼ in kubʼ tnaʼna aj tel tnikʼa tiʼj qa o tzʼok tilil tuʼn Dios tuʼn miʼn tnaj Biblia?
OJTZQINKA CHʼINTL
Ojtzqinka txʼolbʼabʼil tiʼj Tyol Dios, aju tzaj tzyet tej kykubʼ tzʼibʼit tnejel uʼj ex in nul bʼaj kyiʼj traducción in che etz toj ambʼil jaʼlo.
«¿Tzeʼn o tzul Tyol Dios qukʼil?» (¡Weʼktza!, noviembre te 2007)
Ojtzqinka tzeʼn o klet Tyol Dios kyiʼj oxe aj qʼoj.
«O klet Tyol Dios twitz alkyexku nya bʼaʼn» (Aju Xqʼuqil, tajlal 4 te 2016)
Ojtzqinka alkyeqe nya bʼaʼn e ok weʼ junjun xjal twitz noq tuʼnju kubʼ kytraducirin Tyol Dios.
Tuʼnju at nim versión tiʼj Tyol Dios, ¿tzeʼn jaku tzʼok qeʼ qkʼuʼj tiʼj qa mintiʼ o kubʼ chʼexpuʼn tqanil tkuʼx toj?
«¿Ope bʼaj chʼexpuʼn tqanil toj Tyol Dios?» (Xnaqʼtzbʼil toj jw.org)
a Aju yol xewbʼaj xjan, atz in yolin tiʼj tipumal Dios ik tzeʼn tzul chikʼbʼaʼn toj xnaqʼtzbʼil 07.
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
