WEMŪꞌE HAP 05
Tupana Ehay tūt Tupana kaipyi
Tupana Ehay aikotā̃ Ieuwa mij̃um ahepiat hap ewy. Miꞌi Tupana Ehay pe toig̃ 66 popera ahyt. Moꞌopuo erewanentup aj̃umpe pyi asom Tupana Ehay tūt. Uwe wanentup hap koꞌi asom Tupana Ehay pe. Korā̃ watikuap hamo aikotā̃ me putꞌokꞌe Tupana Ehay ahete hap.
1. Ihaig̃niaꞌīn neꞌi ti ran iwan Tupana Ehay. Kat pote asom Tupana Ehay awatoꞌe.
Tupana Ehay wan haria 40 ok takaria ihaig̃niaꞌīn. Taꞌatuhoꞌowynug̃ Tupana Ehay wan hap Iesui ūt hap eꞌyj̃an mete ano 1513 pe hawyi taꞌatumomã kahu iwan hap Iesui ūt hawyi ano 98 pe. Toꞌokape temorania pote taꞌatuwan kahu 1600 anu pe. Iraniaꞌīn Tupana Ehay wan haria hũria apykok haria wepira kat haria iꞌewȳte morekuaria. Iꞌatupotpap hap teꞌeruweupi kahato maꞌato wentup ewy yn taꞌatuwan Tupana Ehay. Maꞌato aikotā̃ meig̃ miꞌi hap taꞌatunug̃. Miꞌi hap taꞌatunug̃ Tupana puo pyi. (Etimowempāp o 1 Tesaronika 2:13.) Ȳt taꞌatuwanꞌi taꞌatuwanentup hap koꞌi maꞌato taꞌatuhenoi Tupana paꞌãu puo pyi. a (2 Peteru 1:21) Tupana paꞌãu puo pyi ihaig̃niaꞌīn tiwan Tupana wanentup hap koꞌi. — 2 Timoteu 3:16.
2. Uweꞌīn asom Tupana Ehay hoꞌopowȳro kuap.
Tupana Ehay hoꞌopowȳro kuap wuatꞌi ywania wuatꞌi pusu kuap haria wuatꞌi mītꞌīn. (Etimowempāp o Iesui Aru E Hap 14:6.) Miꞌi pote Tupana tikyꞌesat torānia pusu puo tehay toig̃ hap. Miꞌi hap etiat aikowatꞌi popera Tupana Ehay ewy. Aj̃umpiat neꞌi mīt iꞌewȳte kat e neꞌi ipusu maꞌato torānia imowempāp kuap Tupana Ehay piat sehay wakuat koꞌi.
3. Aikotā̃ me asom Ieuwa tikawiano tehay putꞌokꞌe ahete hamo.
Tupana Ehay putꞌokꞌe ahete hap eꞌyj̃an mete niatpo kahato hap Tupana Ehay ete putꞌokꞌe. Kotā̃ e hap. Nimo Tupana Ehay taꞌatuwan mikoi yp kawiat papiro e hap ete sio miat pe kawiat ete. Miꞌi pote iꞌatumiwan tuweityk merep. Miꞌitā̃ pykai maꞌato aikotā̃ me asom Tupana Ehay putꞌokꞌe ahete. Nimo kahato Tupana Ehay kyꞌe haria tiwan Tupana Ehay hupi teꞌi hupi teꞌi. Miꞌi hap ȳt taꞌatunug̃ꞌi pote korā̃ katꞌi poꞌog̃ Tupana Ehay. Morekuaria hawyi religião pȳwo piatꞌi akag̃ koꞌi taꞌatumomã terān Tupana Ehay wȳwo ȳt taꞌatukyꞌesatꞌi haype. Maꞌato iraniaꞌīn Tupana Ehay erewyi hamo ipoityꞌi pe taꞌatuweig̃neꞌen hap taꞌatunug̃. Isaia 40:8 miotā̃ e — Uito Tupana uhehay wuatꞌi eꞌāt pe toig̃neꞌen e.
EREWANENTUP O ETIKUAP POꞌOG̃ HAMO
Etikuap hamo aikotā̃ me ihaig̃niaꞌīn tiwan Tupana wanentup hap koꞌi hap hawyi aikotā̃ me toikawiano tehay hap iꞌewȳte kat tutunug̃ torānia piat imowempāp tehay hamo hap.
4. Tupana Ehay piat uwe wanentup hap koꞌi Tupana Ehay henoi
Ewetehaꞌat pyno VÍDEO kape. Miꞌi hawyi eweimowempāp o 2 Timoteu 3:16. Miꞌi hawyi apoꞌe hap koꞌi ete eiwoꞌoꞌehay.
-
Ihaig̃niaꞌīn neꞌi ti ran iwan Tupana Ehay maꞌato kat pote asom Tupana Ehay awatoꞌe.
-
Aikotā̃ erewanentup hawe ihay kuap asom Tupana tehay wan haria wȳwo towanentup hap koꞌi wan hamo.
Karaiwa tipoꞌoro temīt tehay wan popera piat hamo hawyi toiwan raꞌyn maꞌato popera piat wanentup hap koꞌi hekaraiwa wat. Miꞌi hap ewy ti Tupana Ehay wan haria taꞌatuwan Tupana wanentup hap koꞌi
5. Tupana Ehay taꞌatumomã terān maꞌato ȳt iꞌatupo putꞌokꞌeꞌi imomã hap ete
Tupana Ehay tūt Tupana sese kaipyi tupono toikawiano kuap tehay. Nimo ti morekuaria timomã terān Tupana Ehay wȳwo. Religião ȳt pȳwo piaria akag̃ koꞌi ȳt tikyꞌesatꞌi mītꞌīn piat imowempāp Tupana Ehay hap. Ȳt taꞌatukyꞌesatꞌi pykai maꞌato iraniaꞌīn Tupana Ehay erewyi hamo ipoityꞌi pe taꞌatuweig̃neꞌen hap taꞌatunug̃. Maꞌato wentup ok etiat yn watikuap hamo. Ewetehaꞌat pyno VÍDEO kape. Miꞌi hawyi apoꞌe hap koꞌi ete eiwoꞌoꞌehay.
-
Tupana Ehay kawiano hamo iraniaꞌīn tunug̃ ipoityꞌi pe kahato taꞌatuweig̃neꞌen hap. Korā̃ miꞌi hap etikuap taꞌyn hawyi etimowempāp terān poꞌog̃ asom Tupana Ehay. Kat pote etimowempāp terān poꞌog̃.
Eweimowempāp o Saumu 119:97. Miꞌi hawyi eiwoꞌoꞌehay o apoꞌe hap etiat.
-
Mesūwat puo pyi kat pote asom ipoityꞌi pe tukupteꞌen kahato pykai maꞌato taꞌatuꞌaputsit Tupana Ehay iꞌewȳte taꞌatumoꞌẽ Tupana Ehay wuatꞌi puo.
6. Tupana Ehay torānia mītꞌīn piat nuat
Iraniaꞌīn popera koꞌi kai poꞌog̃ taꞌatuꞌaputsit Tupana Ehay iꞌewȳte taꞌatumoꞌẽ Tupana Ehay wuatꞌi puo. Eweimowempāp o Iesui Potmūꞌeria 10:34, 35. Miꞌi hawyi apoꞌe hap koꞌi ete eiwoꞌoꞌehay.
-
Mesūwat puo pyi kat pote asom Tupana tikyꞌesat tehay wuatꞌi pusu puo hap iꞌewȳte wuatꞌi puo hap.
-
Mesūwat wemūꞌe hap puo pyi kat hag̃ etipuenti waku poꞌog̃ Tupana Ehay etiat.
Porapꞌi
Torānia
mesūwat yi oktān
imowempāp kuap taꞌatupusu puo Tupana Ehay
Tupana Ehay toig̃
3 miu
pusu puo
yne hawyi ipatꞌok
5 bilhões
Tupana Ehay koꞌi taꞌatuꞌimprimiru raꞌyn
poꞌog̃ iraniaꞌīn popera koꞌi kai
IRANIAꞌĪN TEꞌEROꞌE Tupana Ehay ti nimuat raꞌyn. Mītꞌīn neꞌi inug̃ Tupana Ehay iꞌatuꞌe.
-
Aikotā̃ etipuenti miotā̃ iꞌatuꞌe hap etiat.
-
Mesūwat aiwemūꞌe hap puo pyi kat pote asom Tupana Ehay tūt Tupana kaipyi awatoꞌe kuap.
WATUWEMŪꞌE RAꞌYN
Tupana Ehay tūt Tupana kaipyi iꞌewȳte Tupana tikyꞌesat tehay torānia piat nuat hap.
Hotꞌokꞌe te asom
-
Kat puo pyi eig̃ ihaig̃niaꞌīn tiwan Tupana wanentup hap koꞌi.
-
Mesūwat wemūꞌe hap puo pyi etikuap kahato Tupana Ehay etiat. Ehenoi pyno kat koꞌi etiat etipuenti waku kahato hap.
-
Korā̃ etikuap taꞌyn kat koꞌi Ieuwa tunug̃ putꞌokꞌe tehay ahete hamo hap. Miꞌi hap etiat etikuap hawyi aikotā̃ erepyhuꞌat.
ETIKUAP TERĀN POꞌOG̃ POTE
Etimowempāp o aikotā̃ me Tupana Ehay putꞌokꞌe ahete hap iꞌewȳte nimuat Tupana Ehay porerokosap hap etiat hawyi korā̃ wuat hap etiat wy.
Aikotā̃ meig̃ Tupana Ehay putꞌokꞌe ahete hap. (Despertai!, novembro de 2007)
Erehaꞌat pyno kat koꞌi pupi Tupana tehay kawiano hap etiat.
Erehaꞌat pyno aikotā̃ me iraniaꞌīn Tupana Ehay aputsit hamo ipoityꞌi pe taꞌatuweig̃neꞌen hap taꞌatunug̃ hap etiat.
Aikotā̃ meig̃ etipȳwo kuap Tupana Ehay piat sehay koꞌi ȳt tuweꞌywykꞌi mītꞌīn tiwan hupiteꞌi hupiteꞌi Tupana Ehay iꞌewȳte iraniaꞌīn pusu kape taꞌatuꞌaputsit kahato pykai.
Tupana Ehay piat sehay koꞌi asom taꞌatuꞌywyk. (Site jw.org piat)
a Miwan hit. Wemūꞌe hap 07 tote watikuap hamo Tupana esaika hawiat pe neꞌi Tupana paꞌãu e. Miꞌi wȳwo tutunug̃ yne kuap tomikyꞌesat koꞌi.
