MPANTTA 05
Ibiiblya ikhanle ilivuru irina moolumo a Nluku
Yehova honivaha itthuvo yootepa ureera—Ibiiblya. Iyo itthuvweeyo ihaanana ilivuru 66 cooyevaca. Atthunaka nyuuva nnawiikohaka co: ‘Ibiiblya iphattuwacile cani? Moolumo amphwanyannya mbiiblyani apani?’ Wiira naakhule ala makohwaala, nttwee noopele mwaha mananna Ibiiblya iwilyaaya iniphwanyaka.
1. Ukhala wiira Ibiiblya yantikhiye naapinaatamu, nlattuni wanlamuliyeehu ukupaleela wiira iyo Nuulumo na Nluku?
Ibiiblya yantikhiye naatthu 40 nhina wo myaakha cookhalaka 1.600, ukhuma mwaakha wo 1513 hinaaya uwa Kristu mpaka mwaakha 98 nawile Kristu. Iriyari yo atthu yantikhile, ahaavo yaari makampuci, mayoomencera ni mamwene—atthu o makhalelo oovirikana. Waahookhalaru commo, miphantte cotheene co mbiiblyani khacinvaanyihana. Wakhitiryeele cani wiirannya iyo itthwiiyo? Iyo itthwiiyo yiirannyeele kontha Nluku phiri mwaneene Ibiiblya. (Nsome 1 Atesalonika 2:13.) Ayo atthwaayo khayantikhile citthu coopuwelaaya. Ayo “yuulumile citthu ca Nluku, toko caakurumiciyaaya ni nnepa wowaarya.” (2 Peturu 1:21) a (Nwehe niwehero.) Avarelaka nteko nnepaawe wowaarya, Nluku ahaahimyera ni ahaakurumica ayo atthwaayo wantikha moopuwelelwaawe.—2 Timotiyu 3:16.
2. Nluku aarumile wantikhiya Ibiiblya wiira avarele nteko apani?
Nluku aarumile wantikhiya Ibiiblya wiira avarele nteko atthu “olapo cotheene, o maloko otheene, oluuka cotheene, ni apoovu otheene.” (Nsome Apokalipise 14:6.) Phimaana, Nluku heeriha Ibiiblya utaphuleliya niiluuka cinci uvikana ilivuru cotheene cirivo. Atthu amphwanyannya ntuninyani motheene, encyaayo pooti wiiwa ihapari comaana co mbiiblyani, hataa yakhalaka nipuroni ni hataa yuulumaka iluukani.
3. Manannani Yehova cikhikicenryaawe Ibiiblya wiira ihimalamalihiye?
Ibiiblya khimala ulupatthiya, masi khiivo hataa itthu inhihile Yehova unihimyera moolumwaawe. Wootakihera, wiira yantikhiye Ibiiblya caavareliye nteko ikaruma coohipica umalamala. Vano iyo iwile cani iphiyaka mpaka mahukweehwaala? Atthu yaacivela Ibiiblya, yaanoonela yantikhaka mapuro makhwaawe ni yaaneekurumica wiira ahivirikanihe. Ciicammo uhookhalaru wiira yahaavo atthu ookhalana ukhulupale yaamananihile umalamaliha Ibiiblya, ahaavo atthu yaaleva ukumyaaya wiira iyo ihimalamalihiye. Ilivuru ya Isaiya 40:8 ineera: “Nuulumo na Nlukwiihu khaninhala uvira.”
MUNCERERE WIITTHUCA WINYU
Ncuwele mananna Nluku caarumaawe atthu wantikha Ibiiblya, mananna cikhikicenryaawe wiira ihimalamalihiye ni itthu ipankilyaawe wiira apinaatamu otheene asome moolumwaawe.
4. Ibiiblya inanhimyaca tipani khanle mwaneene
Moone IVIDIYU. Mwamalihaka woona, nsome 2 Timotiyu 3:16, ni moopele mwaha ala makohwaala:
-
Ukhala wiira Ibiiblya yantikhiye naatthu, inwa cani yiihaniyaka Nuulumo na Nluku?
-
Moonelweenyu, nihaana nikupaleelaka wiira Nluku haahimyera apinaatamu moopuwelelwaawe?
Mwaneene impereesa pooti unruma nantekwaawe wantikha iwarakha. Masi mwaneene iyo iwarakheeyo nokhala mwaneene impereesa, kahi nanteko antikhile. Inanna imocaaru, apinaatamu phantikhile Ibiiblya, masi itthu inhimyaaya Ibiiblyeeyo inkhuma wa Nluku.
5. Ibiiblya khimala ulupatthiya, masi iyo ihoopwa
Wakhala wiira khweeliini Ibiiblya ilivuru ya Nluku, uyo ahaana akhikiceraka iyo ilivurwiiyo. Ni iyo khimala ulupatthiya. Ikhumelo yo khalayi, atthu ookhalana ukhulupale yahomananiha umalamaliha Nuulumo na Nluku. Ahooleli o mmattiinini khayaatthuniha atthu usoma Ibiiblya. Masi hataa iyo ilupatthiyaka, atthu enci yaholeva ukumyaaya wiira iyo ilivurwiiyo ihimalamalihiye. Nttwee nincuwele nlopwana mmoca aapankile iyo itthwiiyo. Moone IVIDIYU, ni mwamalihaka woona, moopele mwaha ala makohwaala:
-
Ucuwela winyu citthu cotheene cipankiye wiira Ibiiblya ihimalamalihiye, unaawiirihani upheela venci cinene usoma Ibiiblya? Kontha isiyani?
Nsome Isaalimu 119:97, ni mwamalihaka usoma, moopele mwaha nna nikohonna:
-
Nlattuni atthu enci waakupalenlyaaya uleva ukumyaaya wiira ataphulele ni akawe Ibiiblya?
6. Ilivuru yantikheliye atthu otheene
Ibiiblya ikhanle ilivuru itepile utaphuleliya ni ukawiya ntuninyani motheene. Nsome Miteko 10:34, 35, ni mwamalihaka usoma, moopele mwaha ala makohwaala:
-
Kontha isiyani Nluku nopheelaawe wiira Nuulumo nawe nitaphuleliye ni nikawiye niiluuka cinci?
-
Nhina ula mpanttoola, isiyani yuulumiye yo Ibiiblya itepile wuucivelani?
Atthu
enci
o ntuninyani motheene
pooti wansomaaya Ibiiblya niiluuka ineeweehaaya saana
Ibiiblya inaaphwanyannya niiluuka cimpwaha
3 mil
yotheene awula
miphantte caya
5 mil milhões
Nna nummeru no Ibiiblya cimpirimiriye.
Iyo ihempirimiriya cinene uvikana ilivuru cikhwaawe
ATTHU AKIINA ANEERA: “Ibiiblya ikhanle ilivuru yokhalayi ni irina moolumo aapinaatamu.”
-
Nyuuva nnoonela cani iyo itthwiiyo?
-
Citthuni cinthoonyera wiira Ibiiblya Nuulumo na Nluku?
UTHIKILELA
Ibiiblya Nuulumo na Nluku ni uyo heeriha wiira Ibiiblya ikhitiriye usomiya naatthu otheene.
Wuupuwela
-
Ibiiblya ineera wiira Nluku ahaaruma apinaatamu wantikha Ibiiblya. Iyo itthwiiyo maanaaya isiyani?
-
Isiyani intepa wuutikhinihani nhina mananna cintaphuleliyaaya ni cinkawiyaaya Ibiiblya? Nyuuva nnoonela cani Ibiiblya uhikhitiriya waya umalamalihiya, hataa ukhalaka wiira khimala ulupatthiya?
-
Nyuuva nneecoona cani ucuwela winyu wiira Nluku khamala wiikurumica wiira oohimyereni moolumwaawe?
MWAPHEELAKA UCUWELA CITTHU CIKIINA
Nsome ihantisi inooluma Ibiiblya—ikhumelo cowantikhiya cowaarya cokhalayi mpaka Ibiiblya co mahukweehwaala.
“Manannani Ibiiblya ciwilyaaya iphiyaka mpaka mahukweehwaala” (Despertai!, yo Novembro yo 2007)
Moone inanna tthaaru caapheelaaya umalamalihiya Ibiiblya.
“Ihantisi yootikhiniha inttonkaca mananna coopweelyaaya Ibiiblya” (Ukhalenla, N.º 4 yo 2016)
Moone marikariko yaanannyaaya atthu wiira ataphulele Ibiiblya.
Ibiiblya ihooneliya ni ihotaphuleliya ikwaha cinci. Isiyani inlamuliya uwiirihani ukupali wiira itthu inhimyaaya khayaakakhanihaciye?
“Itthu inhimyaaya Ibiiblya ihaakakhanihaciya?” (Mwaha umphwanyannya nsayitini jw.org)
a Niwehero: Nhina mpantta 07 ninaahala wiitthuca wiira nnepa wowaarya, ikhanle ikuru Nluku invarelaawe nteko wiira apanke ile impheelaawe.
