ISAMBILILO 05
Muli Baibo Mwaya Mazwi Yakwe Leza
Yeova watupeela Baibo, uwila usuma sana umwaya mabuku 66. Nomba limwi mungayuzya mweineco ukuti: ‘Uzye Baibo yafuma kwi? A weni wailemvile?’ Pakuti twasuke mauzyo yaa, lekini tulande pali vino cali pakuti tukwate amazwi yakwe Leza aaya muli Baibo.
1. Antu aalemvile Baibo, nomba u mulandu ci uno tukalandila ukuti yafuma kuli Leza?
Baibo yalemvilwe na antu 40 umu ciputulwa ca myaka 1,600, ukufuma umu 1513 B.C.E. ukwizafika umu 98 C.E. Nanti cakuti aalemvile yali apusanepusane, ivyeo ivyayamo vikauvwana. I cani calenga? A pa mulandu wakuti Leza ali mwineco wakwe Baibo. (Belengini 1 Tesalonika 2:13.) Aalembanga Baibo yatalembanga vino yelenganyanga. Lelo “umupasi wa muzilo u walenzile antu yalande amazwi afumile kuli Leza.” a (2 Petulo 1:21) Leza waomvizye umupasi wakwe uwa muzilo ukulenga antu yalembe amelenganyo yakwe.—2 Timoti 3:16.
2. Aaweni angaipakizya ivyeo ivyaya muli Baibo?
Leza walanzile ukuti antu amu “nko zyonsi ni mitundu ni ndimi” yalaipakizya amazwi aaya muli Baibo. (Belengini Kusokolola 14:6.) Ndakai Baibo yaya umu ndimi izingi ukuluta ibuku ilili lyonsi. Aliwensi angabelenga nu kuvwa mazwi aya muli Baibo. Fwandi asi mulandu na kuno antu yakaikala nanti ululimi luno yakavwanga yakabelenga Baibo.
3. Uzye Yeova wacingilila uli Baibo?
Baibo yalemvilwe pa vintu ivisilengela sana. Nomba antu aatemilwe Baibo, yaikopololanga nu kuilemba ukuminwe. Nanti cakuti ya kateeka yamwi ni ntunguluzi zya mapepo yezizye ukonona Baibo, antu yamwi ikanga na maumi yao umu uzanzo pakuti sile yacingilile Baibo. Yeova atazumilizya aliwensi nanti icili consi ukumulesya ukulalanda naswe. Baibo ikalanda ukuti: “Amazwi yakwe Leza witu yakaikalilila amanda pe.”—Ezaya 40:8.
LONDELEZYINI NA VYUZE
Sambililini na vyuze pali vino Leza walenzile ukuti antu yalembe Baibo, vino waicingilila na vino walenzile ukuti antu yaikwate.
4. Baibo kwene ikatunena pa mwineco wakwe Baibo
Tambini VIDYO. Lyene Belengini 2 Timoti 3:16, alino mulanzyanye mauzyo atiyalondelelapo.
-
Ndi cakuti antu aalemvile Baibo, u mulandu ci uno ikaamilwa ukuti Izwi lyakwe Leza?
-
Uzye mwazumila ukuti Leza u walenzile ya kalemba yakwe Baibo ukulemba amelanganyo yakwe?
Umukalamba wa ncito anganena umuomvi ukuti amulembeleko kalata, nomba kalata iyo asi ya muomvi i ya mukalamba wa ncito. Vikwene avino na antu yalemvile Baibo, nomba amazwi aya mwenemo yafumile kuli Leza
5. Baibo yacingililwa pakuti itononwa
Ndi cakuti Baibo yafuma kuli Leza, alasininkizya ukuti yacingililwa. Ukufuma sile na mpiti antu akwata maka yakaezya ukuti yonone Baibo. Ya simapepo yatalondanga ukuti antu yabelenga Baibo. Nomba antu aingi ika maumi yao umu uzanzo pakuti sile yacingilile Baibo, asi mulandu nu kuyakaanya nanti kuyacuzya. Pakuti musambilile pa muntu umwi uwacingilile Baibo, tambini VIDYO, alino mulanzyanye mauzyo atiyalondelelapo.
-
Uzye ukumanya ukuti kwali ivingi ivyacitike pakuti sile Baibo icingililwe, kwamulenga mwalondesya ukulaibelenga? U mulandu ci?
Belengini Masamu 119:97, alino mulanzyanye iuzyo lii:
-
I cani calenzile antu aingi ukwika maumi yao umu uzanzo pakuti sile yasenule nu kusalanganya Baibo?
6. Ibuku lya yantu yonsi
Baibo ali buku ilyasenulwa nu kusalangana sana ukuluta ibuku ilili lyonsi. Belengini Milimo 10:34, 35, alino mulanzyanye mauzyo yaa:
-
U mulandu ci uno Leza akalondela ukuti Izwi lyakwe lisenulwe umu ndimi zingi nu kusalangana sana?
-
I vyani vino mwatemwa pali Baibo?
Mupipi
na antu yonsi
umu nsi
yakwata Baibo umu lulimi luno yanguvwa
Yayako umu ndimi
ukucila
pali 3,000
umu ciputulwa nanti yonsi
5 bilyoni
Ali mpendwa iikatunganyiziwa iya Mabaibo apangwa
ukucila ibuku ilili lyonsi
YAMWI YAKALANDA UKUTI: “Baibo i buku sile ilya mpiti ilyalemvilwe na antu.”
-
Uzye mukwelenganyapo uli?
-
Uusininkizyo ci ukalangilila ukuti Baibo Iizwi lyakwe Leza?
VINO TWASAMBILILA
Baibo Iizwi lyakwe Leza nupya wasininkizya ukuti liyeko pakuti antu yonsi yabelenga.
I vyani vino mwasambilila?
-
Uzye cikapiliula cani nga twalanda ukuti Leza walenzile antu ukulemba Baibo?
-
I vyani vyativimukomelezya pali vino Baibo yacingililwa, vino yasenulwa na vino yasalanganyiziwa?
-
Uzye ukumanya ukuti Leza waombisye pakuti aalanzyanya namwe kukamulenga ukuvwa uli?
LONDELEZYINI
Belengini lyasi pali vino Baibo yafumile umu vyalembwa vya mpiti nu kusenulwa umu ndimi izyayako ndakai.
“Vino Baibo Yacingililwa Ukufika na Ndakai” (Zyukini!, Novemba 2007)
Sambililini vino Baibo yapuswike uku vintu vitatu ivyali nu kulenga ilowe.
“Icalenga Ukuti Baibo Italowa” (Lupungu Lwa Mulinzi Na. 4 2016)
Lolini vino antu yauze isile maumi yao umu uzanzo pakuti yasenule Baibo.
Baibo yakopololwa nu kusenulwa imiku iingi. Mungasininkizya uli ukuti amazwi yakwe Leza yatasenuka?
a Wakwe vino Isambililo 7 lilalondolola, umupasi wa muzilo a maka yano Leza akaomvya.
Limwi Mungatemwa Ukulolako na Vii
MAUZYO YANO ANTU YAKAUZYA SANA
Uzye Isambililo Lya Baibo Ali Cani?
Zanini masuko ku mauzyo pali vino tukasambilizya antu Baibo ukwaula ukuyalipilisya.
