KAMBʼAL 05
A Bʼibʼle u Mensaaje Dʼios Tiʼitoʼon
Yan a kichʼpan sijʼool u tzʼaj toʼon a Jehovah—leʼek a Bʼibʼle. 66 pʼeel taj meen juʼum a yan ichili. Uchak walak a tuklik: ‹Tubʼaj talel a Bʼibʼle? Mak a tukul a yan ichili?› Tiʼi kaʼ ti nuukte a kʼaatchiʼ adʼaʼa, koʼox ti tzikbʼalte bʼiki ti yanaji tiʼitoʼon a mensaaje a yan ich Bʼibʼle.
1. Bʼiki ti etel Dʼios talaʼan a Bʼibʼle, wa winik u tzʼiibʼtaj?
Yan wal 40 tuul ti winik u tzʼiibʼtaj a Bʼibʼle. 1,600 jaabʼ u xanil u chʼaʼa ti laj tzʼiibʼbʼaʼani. A primero parte jabʼix wal 3,500 jaabʼ tzʼiibʼbʼaʼanäk y u yadʼaʼil a juʼumu jabʼix wal 1900 jaabʼ tzʼiibʼbʼaʼanäk. Jujunpaay mak u tzʼiibʼtaj, pero laj jumbʼel kʼuʼ u yadʼajooʼo. Bʼiki ti bʼoobʼeʼ? Umen etel Dʼios talaʼan a Bʼibʼle. (Xoko a 1 Tesalonicenses 2:13.) Leʼek mak a uchooʼ u tzʼiibʼi maʼ u tukul u tzʼiibʼtajooʼi. «U yadajooʼ u tʼan a Dioso, leʼec ti tzʼabi tiʼijooʼ cʼuʼ a cu yadooʼ u men u [santo esperito] Dioso». a (2 Pedro 1:21) U nuʼkul abʼeʼe, a Dʼioso u usaarta u santo esperito kaʼ u jisooʼ a mak u tzʼiibʼtooʼ kʼuʼ a yan ichil a Bʼibʼle.—2 Timoteo 3:16
2. Tulakal mak wa jedʼeʼek u yilik u kiʼil kʼuʼ a yan ich Bʼibʼle?
«Tulacal boon aj nucuch caj yocʼolcab, tulacal a jujumpaay u wich u tʼan, tulacal a boon aj meencaja,» jedʼeʼekooʼ u yilik u kiʼil a kichʼpan mensaaje a yan ich Bʼibʼle. (Xoko a Revelacion 14:6.) A Dʼioso u bʼetaj kaʼ yanak ich jujumpaay tʼan a Bʼibʼle tuwich ulaakʼooʼ a juʼum a yana. Chimaʼ tulakal mak yanooʼ u Bʼibʼle, leʼek a jaj kʼuʼooʼ u wich u tʼan waxan leʼek a jaj tubʼaj talaʼanooʼ.
3. Bʼiki ti maʼ u chaʼa Jehovah u jobʼol a Bʼibʼle?
Uchiji, tuwich u kʼewelil u pach bʼaʼalcheʼ y tuwich a juʼum a bʼetbʼel etel u päkʼaalil a papayrus tzʼiibʼbʼaʼani a Bʼibʼle. Pero a bʼaʼalooʼ abʼeʼe jomol u jobʼol tiʼi. Yanooʼ a winiki, walakooʼ u kaʼ mansikooʼ tuwich a tumulbʼentoj umen maʼ u kʼatiintajooʼ kaʼ jobʼok a Bʼibʼle. Chichooʼ u yool u tzʼiibʼte kaʼax jedʼeʼekooʼ u kimsabʼäl wa kaʼ mächbʼäkooʼ ti tanooʼ u tzʼiibʼ. Yanooʼlik adʼooʼ u kʼatiintajooʼ u jobʼes jumpul a Bʼibʼle. Pero a Dʼioso maʼ u chaʼa tiʼi maʼax mak y tiʼi maʼax kʼuʼi kaʼ u wetʼeʼ kaʼ kʼochok u tʼan tiʼitoʼon. A Bʼibʼle u yadʼaj: «Leʼek u tʼan ti Dʼioso maʼ yan kʼin u jobʼol.»—Isaias 40:8.
MAS KAMBʼALTETO
Mas weelte u pektzil bʼiki kaʼ u tzʼaj Dʼios ichil u tukul winik kaʼ u tzʼiibʼtooʼ a Bʼibʼle, bʼiki ti maʼ u chaʼa u jobʼsabʼäl a Bʼibʼle y bʼiki ti yan tiʼi tulakal mak.
4. U yadʼaj Bʼibʼle mak a etel talel kʼuʼ a tzʼiibʼaʼan ichil
Chaʼanteʼex a VIDʼEO. Kaʼtun xokeʼex a 2 Timoteo 3:16, y tzikbʼalteʼex a kʼaatchiʼ adʼaʼa.
-
Kʼuʼkaʼa u tʼan Dʼios ti walak u adʼabʼäl kʼuʼ a yan ich Bʼibʼle wa winik u tzʼiibʼtaj?
-
Jedʼeʼek wa a tzʼokʼsik ti leʼek a Dʼioso, jedʼeʼek u paatal u manes u tukul tiʼijooʼ winik kaʼ u tzʼiibʼtooʼ?
Jedʼeʼek ti juntuul secretaario u tzʼiibʼtaj a junpʼeel mensaaje, pero chen adʼabʼi tiʼi kʼuʼ a kaʼ u tzʼiibʼte. Bʼoobʼeʼilik a Bʼibʼle, winik u tzʼiibʼtaj, pero etel Dʼios talel a mensaaje
5. Maʼ jobʼsabʼi a Bʼibʼle
Ti weel ti maʼ bʼel u kaʼa jobʼsabʼäl a Bʼibʼle wa etel Dʼios talaʼan. Yanooʼ a winik a nukuch u wichil etel aj chʼaʼbʼejooʼ tiʼi religion, u yaaltajooʼ u jobʼes y u mukuʼ a Bʼibʼle. Pero, yanooʼ a kristiyaano u känäntajooʼ a Bʼibʼle, kaʼax sabʼeentzil wa kaʼ mächbʼäkooʼ y ti jedʼeʼek u kimsabʼälooʼ. Tiʼi kaʼ a ileʼex u pektzil juntuul mak u bʼetaj abʼeʼe, chaʼanteʼex a VIDʼEO, kaʼtun tzikbʼalteʼex a kʼaatchiʼ adʼaʼa.
-
Leʼek aleebʼ ti tan a weeltik ti yaabʼ u tzʼajooʼ u kuxtal ti maʼ u jobʼsabʼäl a Bʼibʼle, a kʼati wa mas xoko a Bʼibʼle? Kʼuʼkaʼa?
Xokeʼex a Salmo 119:97, kaʼtun tzikbʼalteʼex a kʼaatchiʼ adʼaʼa:
-
Kʼuʼ u jisajooʼ a mak tiʼi kaʼ u tzʼaʼooʼ u kuxtal tiʼi kaʼ yanak a Bʼibʼle tiʼi tulakal mak?
6. Juntziil juʼum tiʼi tulakal mak
Tuyaam tulakal a juʼum a jokʼok peteebʼ yokʼolkabʼa, Bʼibʼle a mas yaabʼ tziil a jokʼoko. Xokeʼex a Hechos 10:34, 35, kaʼtun tzikbʼalteʼex a kʼaatchiʼooʼ adʼaʼa:
-
Kʼuʼkaʼa u kʼati Dʼios kaʼ jokʼok u tʼan ich jujunpaay tʼan y kaʼ yanak tulakal tubʼajak?
-
Kʼuʼ a kiʼ tawich tupektzil a Bʼibʼle?
Chema
100%
yokʼolkabʼ
yan a Bʼibʼle ichil a tʼan a jedʼeʼekooʼ u chʼaʼtojtik mak
Yan ich
3,000
tʼan
tujuntziilil waxan chen parte
5,000,000,000
tziil a jokʼok,
mas yaabʼ tuwich ulaakʼ juʼum
YAN MAK WALAK U YADʼIK: «A Bible chen juntziil ta uchbʼen juʼum a tzʼiibʼi umen winik.»
-
Kʼuʼ a tukul incheche?
-
Kʼuʼ tan u yeʼik ti leʼek a Bʼibʼle u tʼan Dʼios?
KʼUʼ A KÄNAJA
A Bʼibʼle u tʼan Dʼios, u tzʼaj kaʼ yanak ich jujunpaay tʼan y kaʼ yanak tiʼi tulakal mak.
Tzikbʼalbʼäl kʼuʼ ti känaja
-
Kʼuʼ u nuʼkul ti Dʼios u tzʼaj tiʼijooʼ winik kaʼ u tzʼiibʼtooʼ kʼuʼ a yan ich Bʼibʼle?
-
Kʼuʼ a kiʼ tawich etel bʼiki ti maʼ jobʼsabʼi a Bʼibʼle, ti mansabʼi ichil ulaakʼ tʼan y ti yan tiʼi tulakal mak?
-
Bʼiki a wool aleebʼ ti kaʼ a känaj, ti leʼek a Dʼioso u käxta bʼiki kaʼ uchuk u tzikbʼal tawetel?
MAS ILAJTOJ
Xoko u pektzil a Bʼibʼle—bʼiki ti yan uchi y bʼiki ti kʼochi ichil ti tiempo.
Kambʼalte u pektzil oxpʼeel bʼiki ti yaaltabʼi jobʼesabʼäl a Bʼibʼle.
«Maʼ Bʼini Jobʼsabʼäl—A Bʼibʼle» (The Watchtower No. 4 2016)
Weelte bʼoon a bʼaʼal a sabʼeentzil u jentaantajooʼ a mak u mansajooʼ a Bʼibʼle ichil ulaakʼ tʼan.
A Bʼibʼle yaabʼ sut tzʼiibʼik y mansabʼäk ichil ulaakʼ tʼan. Bʼiki ti jedʼeʼek a weeltik ti maʼ bʼini jelbʼel kʼuʼ a tzʼiibʼaʼan ichili?
«Yan wa kʼuʼ a Jelbʼi Waxan Bʼini Jokʼsabʼäl Ichil a Bʼibʼle?» (Web article)
a Jabʼix a bʼel ti kaʼa ti känäʼ ichil a Kambʼal 07, u mukʼ Dʼios, a santo esperito.
