ISIFUNDO 05
UNkulunkulu Ukhuluma Lathi Esebenzisa IBhayibhili
IBhayibhili yisipho esihle kakhulu esisiphiwe nguJehova futhi lilamabhuku angu-66. Kodwa engxenye uyazibuza ukuthi: ‘IBhayibhili lavela ngaphi? Ngubani uMlobi walo?’ Esizaxoxa ngakho esifundweni lesi kuzakwenza ubone ukuthi iBhayibhili lavela ngaphi.
1. Kungani sisithi uMlobi weBhayibhili nguNkulunkulu lona labhalwa ngabantu?
IBhayibhili labhalwa ngabantu abangaba ngu-40 futhi kwathatha iminyaka engaba ngu-1 600 ukuthi libhalwe, kusukela ngo-1513 B.C.E. kusiya kubo-98 C.E. Lanxa labhalwa ngabantu abatshiyeneyo, konke okukulo kuyavumelana. Lokhu kwenzakala ngenxa yokuthi uNkulunkulu nguye uMlobi weBhayibhili. (Bala u-1 Thesalonika 2:13.) Abantu ababhala iBhayibhili abazange babhale imicabango yabo, kodwa “babekhuluma okuvela kuNkulunkulu, njengoba babeqhutshwa ngumoya ongcwele.” a (2 UPhetro 1:21) UNkulunkulu wasebenzisa umoya wakhe ongcwele ukuze atshele labo ababhala iBhayibhili lokho okwakumele bakubhale.—2 KuThimothi 3: 16.
2. IBhayibhili libhalelwe wonke umuntu yini?
UNkulunkulu wathi “zonke izizwe, lezizwana, lezindimi kanye labantu” kumele bazwe izindaba ezinhle eziseBhayibhilini. (Bala iSambulo 14:6.) Lamuhla iBhayibhili litholakala ngezindimi ezinengi ukwedlula loba yiliphi elinye ibhuku. Phose wonke umuntu uleBhayibhili kungelani lokuthi uhlala ngaphi kumbe ukhuluma luphi ulimi.
3. UJehova wenzeni ukuze iBhayibhili lingatshabalaliswa?
Ekuqaliseni, iBhayibhili lalibhalwe ezintweni ezingahlali isikhathi eside. Kodwa kulabantu ababelithanda iBhayibhili abasebenza nzima ukuze lingatshabalali. Ngokwesibonelo, abanye babelikopa ngezandla ukuze benze amakhophi amatsha. Abanye bafaka impilo zabo engozini ukuze balivikele ebantwini ababefuna ukulitshabalalisa. UJehova kazange avumele lutho ukuthi lumvimbe ukukhuluma lathi. IBhayibhili lithi: “Ilizwi likaNkulunkulu wethu lihlala kuze kube nini lanini.”—U-Isaya 40:8.
GEBHA UJULE
Engxenyeni le uzafunda ukuthi uNkulunkulu wasebenzisa abantu ukuthi babhale iBhayibhili lokuthi walivikela njani ukuze abantu abanengi balithole.
4. IBhayibhili liyasitshela ukuthi uMlobi walo ngubani
Bukelani IVIDIYO. Ngemva kwalokho balani u-2 Thimothi 3:16 beseliphendula imibuzo elandelayo.
-
Kungani sisithi uMlobi weBhayibhili nguNkulunkulu lona labhalwa ngabantu?
-
Kuqondile yini ukukholwa ukuthi uNkulunkulu nguye owatshela labo ababhala iBhayibhili lokho okwakumele bakubhale?
Umabhalani angacelwa ukuthi abhale incwadi kodwa uzabhala lokho ayabe ekutshelwa ngumqhatshi wakhe. Lalabo ababhala iBhayibhili babhala lokho ababekutshelwa nguNkulunkulu
5. IBhayibhili alizange litshabalaliswe
IBhayibhili alizange litshabalale ngoba libhuku elivela kuNkulunkulu. Kusukela kudala, abantu abalizondayo iBhayibhili bebezama ngamandla abo wonke ukulitshabalalisa. Ngokwesibonelo, abanye abakhokheli bamasonto babengafuni ukuthi abantu babe lalo. Kodwa abantu ababelithanda benza okusemandleni abo ukuze balivikele lanxa babephikiswa kumbe bebulawa. Ukuze uzwe ngomunye owafaka impilo yakhe engozini, bukelani IVIDIYO beselixoxa ngemibuzo elandelayo.
-
Ukubona indlela abanye abantu abalivikele ngayo iBhayibhili kwenza ufune ukulibala yini? Kungani usitsho njalo?
Bala iHubo 119:97 beselixoxa ngombuzo lo:
-
Kuyini okwenza abantu abanengi bafaka impilo zabo engozini ukuze bahumutshe iBhayibhili njalo balisakaze?
6. Ibhuku labantu bonke
Akulabhuku eselihunyutshwe laphinda lasakazwa njengeBhayibhili. Bala imiSebenzi 10:34, 35 beselixoxa ngemibuzo le:
-
Kungani uNkulunkulu efuna iLizwi lakhe lihunyutshwe ngezindimi ezinengi?
-
Kuyini okwenza ulithande iBhayibhili?
Phose
Wonke
umuntu emhlabeni
uleBhayibhili ngolimi aluzwisisayo
Litholakala ngezindimi ezedlula
3 000
ligcwele loba liyingxenye
Sekudindwe amaBhayibhili angaba ngu:
5 bhiliyoni
Akula elinye ibhuku elidindwe kanengi kangaka
ABANYE BATHI: “IBhayibhili seliphelelwe yisikhathi.”
-
Wena uthini?
-
Yibuphi ubufakazi obutshengisa ukuthi iBhayibhili liLizwi likaNkulunkulu?
ISIFINQO
IBhayibhili liLizwi likaNkulunkulu futhi nguye owalivikelayo ukuze abantu abanengi babe lalo.
Ufundeni?
-
Kungani sisithi uMlobi weBhayibhili nguNkulunkulu lona labhalwa ngabantu?
-
Wena uthini ngendlela iBhayibhili elivikelwe ngayo ukuze litholakale ebantwini abanengi langezindimi ezinengi?
-
Uzwa njani nxa ucabanga ngendlela uNkulunkulu avikele ngayo iBhayibhili ukuze akhulume lawe?
THOLA OKUNENGI
Bala isihloko lesi ubone ukuthi kwahamba njani ukuze iBhayibhili lilondolozwe kusukela emibhalweni yakuqala kuze kufike emaBhayibhilini asehunyutshiwe lamuhla.
Bala imagazini le uzwe ukuthi iBhayibhili lavikelwa njani ezintweni ezintathu ezazingalitshabalalisa.
“Ibhuku Elingasoze Litshabalale” (INqabayokulinda No. 4 2016)
Bukela ividiyo le ukuze ubone okwenziwa ngabanye abantu ukuze bahumutshe iBhayibhili.
Bala isihloko lesi uzwe ukuthi kuyini okwenza singathandabuzi ukuthi okuseBhayibhilini akuzange kutshintshe lanxa selahunyutshwa njalo lakotshwa kanengi.
“IBhayibhili Latshintsha Yini?” (Isihloko esikuwebhusayithi yethu)
a Esifundweni 7 sizaxoxa ngokuthi umoya ongcwele ungamandla kaNkulunkulu.
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
