Jehovha wakatipa Bhaibheri. Ici i cipo cakanaka maningi, irona rino mabhuku anokwana kuita 66 akabatanijwa pa ndau imweyo. Asi mungavhunjisa kudari: ‘Bhaibheri rakavha kwapi? Ndiyani mune waro?’ Kuti tidavire muvhunjo iji, ngativone kuti soko ra Mwari Bhaibheri rakagumisa kudini kwatiri.

1. Kudari Bhaibheri rakatahwa ngo vandhu, kuitisa kudini irona i soko ra Mwari?

Bhaibheri rakatahwa ngo vanarume vanokwana 40 mukati mo makore anopindirija kuita 1.600, kuvhira 1513 Kristu Acito Aviya mbhera 98 Kristu Aviya. Vatari vondhovo vakavha mu ndau jakasiyana-siyana. Pikija zvakadaro, zvese zviri mu Bhaibheri zvinozwirana. Kuitisa kudini? Ngokuti Mwari ndiyena Mune wo Bhaibheri. (Verenganyi 1 Vatesaronika 2:13.) Vatari vo Bhaibheri avazivi kutara zvainga mu murangariro mavo. Kusiyapo izvo, ivona “vaibhuya zvaivha ka Mwari vecitungamirihwa ngo mujimu mucena.” a (2 Pedhru 1:21) Mwari wakashandisa mujimu mucena wake kuti afemere no kundundira vandhu kuti vatare murangariro yake.—2 Timoti 3:16.

2. Ndiyani angabesereka ngo Bhaibheri?

“Majinja ese, vo mavhumbo ese, vo ndimi jese no vandhu vese” vangabesereka ngo masoko akanaka anowanika mu Bhaibheri. (Verenganyi Apokaripsi 14:6.) Mwari wakaita kuti Bhaibheri riwanike mu ndimi jakawanda, kupinda bhuku riri rese. Vandhu vazinji vari kukwanisa kuzwa masoko a Mwari. Izvi ngo zvokadi, azvinenyi kuti ngo kwapi kwaanogara mundhuwo kana ndimi yaanobhuya.

3. Jehovha wakaitisa kudini kuti angwarire Bhaibheri?

Bhaibheri rakasongana no zvineso, asi apana cakakwanisa kuphinga Jehovha kuti abudise soko rake. Inga muezaniso, Bhaibheri rakatahwa ngo mathurusi acikagari mukuvo wakareba. Waro, rakaitisa kudini kuti rigume mbhera mu nguva yedu? Vandhu vaidisisa Bhaibheri vakarikhopa, perapo ngo kungwarira kwese vakaritara ngo nyara. Vatongi vamweni no vatungamiriri vo zviara vakaeja kuparaja Bhaibheri. Asi vandhu vamweni vaidira upenyu hwavo pa ngozi kuti varingwarire. Jehovha aazivi kutendera kuti mundhu ariwese kana kuti ciricese cimukamise kubhuya na itusu. Bhaibheri rinoti: “Izwi ra Mwari wedu rinogara mbhera narini.”—Isaia 40:8.

 NASANYI KUPSAKISISA

5. Bhaibheri rakaramba riripo pikija no kuejwa kuparajwa

 6. Bhuku ro vandhu vese

Bhaibheri i bhuku riri kusandujwa maningi pasi pese no kukovaniswa kupinda bhuku riri rese. Verenganyi Mabasa o Vapostori 10:34, 35, perapo bhuisananyi ngo muvhunjo jinotevera:

• Ngenyi Mwari anoda kuti Soko rake risandujwe no kukovaniswa mu ndimi jakawanda?

• Ngozvapi zvamunodakarira maningi ngo pamusoro po Bhaibheri?

 ZVOTAJIJA

Bhaibheri i Soko ra Mwari, ngo kudaro iyena wakaita kuti riwanike ngo mushovo wese wo vandhu.

Kuhwirijira

• Bhaibheri parinonanga kuti Mwari wakafemera vandhu kuti vatare Bhaibheri, zvinoda kunangenyi?

• Ngozvapi zvinomushamaisa maningi ngo kusandujwa no kukovaniswa ko Bhaibheri? Munorangarira kudini ngo kuwanika ko Bhaibheri pikija rakasongana no zvineso?

• Munozwa kudini ngo kuziva kuti Mwari wakaita zviri zvese kuti akwanise kubhuya na imwimwi?