WANGƆ 05
Ngbangɔ du nzɔ̃ pa mɛ alo ka tɛ Nzapa
Yehova hɛ̃ e nzɔ̃ ye nvɛ̃ni, ye ni du Ngbangɔ mɛ ni na anzina buku 66. Mɔ lengbi ti hũndangɔ tɛrɛ mɔ na ndo ya: ‘Ngbangɔ londó wa? Zo mɛ nvɛ̃ Ngbangɔ na?’ Ti nɛngɔ ya e hɛ̃ gbinya na ndo hũnda olo ko, zia e ba se mɛndó tɛnɛ tɛ Nzapa aga tã e.
1. Se du ya azi la su Ngbangɔ, wa nda mɛ ndo tɛnɛ ya Nzapa la du nvɛ̃ni nɛ?
Akɔli 40 ndó la su Ngbangɔ na ya abulu 1 600, bandangɔ na bulu ti 1513 U.N.E. ngbĩĩ na bulu bere ti 98 N.E. Azi niko ndó na dungɔ lɛ ngɛ̃́ ndɛ̃ ndɛ̃ ndɛ̃. Abɛse ngaso ko, atɛnɛ zu mɛ ala su kaya Ngbangɔ ni na mangbi. Na lo nɛ? Na lo mɛ ya Nzapa la nvɛ̃ Ngbangɔ. (Di 1 Tɛsalionikɛ 2:13.) Ta awa sungɔ Ngbangɔ asundó dangɔ bɛ tɛ la nvɛ̃ni ma. Kanda “adu ndo [nyingɔ vurú] la azi kɔdɛ tɛ la, la ala pa tɛnɛ mɛ ala ma ka nyɔ Nzapa.” a (2 Petro 1:21) Nzapa sandó nyingɔ vurú tɛ lo ndo la ti nɛngɔ ya ala su dangɔ bɛ tɛ lo.—2 Timɔte 3:16.
2. Asu Ngbangɔ na lo tɛ ana?
“Azi ti lɛ sese zu, ti ale zu, nga na ti yanga kɔdɔrɔ zu” alengbi ti luangɔ nzɔ̃ kpale ti nzɔ̃ pa mɛ kaya Ngbangɔ. (Di Suma 14:6.) Nzapa lindó zu ya asu Ngbangɔ na ayanga gba, ɔngɔ abuku mɛndɛ̃ zu. Azi gba lengbi ti dingɔ Ngbangɔ abɛse du ya ala ndo du kawa, bere ala ndo tɛnɛ yanga ni nɛ.
3. Yehova batandó Ngbangɔ ngasia?
Asundó Ngbangɔ na aye mɛ ta ndo ninga gba ma, mabere pɔrɔ tɛrɛ sa ná papyrus. Kanda azi mɛndó ndo ye Ngbangɔ, ala sundó akopi ni na ti la, wa ala ndo bata ngandó ni nzɔ̃ni. Abɛse du ya agbia mɛ na ngunu gba agindó lingɔ zu ya ta Ngbangɔ du da ma, kanda azi mɛndɛ̃ kpãndó dungɔ lɛ ngɛ̃́ tɛ la na ya kwá ti nɛngɔ ya ala bata ni. Ta Yehova zindó lége ya azi bere ye kɔi gbanzi ni na tɛnɛngɔ tɛnɛ na e ma. Ngbangɔ tɛnɛ ya: “Tɛnɛ tɛ Nzapa tɛ e na ngbãngɔ bwai na bwai.”—Yisaya 40:8.
GI HĨNGANGƆ LO MƐNDƐ̃
Gi hĩngangɔ se mɛndó Nzapa hɛ̃ azi nyingɔ vurú tɛ lo ya aza la ti nɛngɔ ya ala su Ngbangɔ, se mɛndó lo bata na ni, nga na se mɛndó lo li ya ala lua ni.
4. Ngbangɔ nvɛ̃ni la fa e na nvɛ̃ lo
Ba VIDEO. Di 2 Timɔte 3:16, wa na pɛni hɛ̃ gbinya ti ahũnda olo mɛ.
-
Se du ya azi la su Ngbangɔ, wa nda mɛ ndo tɛnɛ ya Nzapa la du nvɛ̃ni nɛ?
-
Mɔ da bɛ mɔ ya, adu nzɔ̃ni e ye ya Nzapa kambisandó dangɔ bɛ tɛ lo hɛ̃ azi mɛndó su Ngbangɔ?
Zo kɔi lengbi ti yɔngɔ ka ti zo mɛndɛ̃ ya, lo su hɛ̃ ni mbɛti. Kwɛ kɔi Nzapa yɔ ngandó kati azi ya ala su Ngbangɔ, kanda tɛnɛ mɛ kaya ni adu tɛ lo
5. Abɛse azi lindó zu ya ani gbɛ̃ Ngbangɔ ko, ni bo da
Se du ya Nzapa la nvɛ̃ Ngbangɔ biani ko, lo lengbi ti batangɔ ni. Na ya angoi gba mɛ aɔ, azi mɛ na ngunu alindó zu ya ta Ngbangɔ du da ma. Abɛ agbia ti sambela ali ngandó zu ya ta azi adi Ngbangɔ ma. Azi gba kpãndó dungɔ lɛ ngɛ̃́ tɛ la na ya kwá ti batangɔ Ngbangɔ, abɛse ndo gindó kpɔngɔ ala. Ti nɛngɔ ya mɔ hĩnga kpale tɛ kɔi tɛ azi ni ko, ba VIDEO, wa na pɛni hɛ̃ gbinya ti ahũnda olo mɛ.
-
Hĩngangɔ ya azi mɛndɛ̃ kpandó dungɔ lɛ ngɛ̃́ tɛ la na ya kwá na lo ti batangɔ Ngbangɔ, adi hɛ̃ mɔ gwɛ̃́ kpengbani ya mɔ di ni? Na lo nɛ?
Di Nzembo 119:97, wa na pɛni hɛ̃ gbinya ti hũnda olo mɛ:
-
Ye mɛndó to azi gba ya ala kpã dungɔ lɛ ngɛ̃́ tɛ la na ya kwá ti nɛngɔ ya, ala gbinyangbi wa ala kangbinga Ngbangɔ nɛ?
6. Buku kɔi, na lo tɛ azi zu
Ngbangɔ du buku mɛ agbinyangbi ni na ayanga gba, akangbi nga ni na ndo lɛ gigi zu. Di Awa Pangɔ Kwa 10:34, 35, wa na pɛni hɛ̃ gbinya ti ahũnda olo mɛ:
-
Nda mɛ Yehova na gwɛ̃ ya agbinyangbi tɛnɛ tɛ ni na ayanga ndɛ̃ ndɛ̃ ndɛ̃, wa akangbi nga ni na lɛ gigi zu nɛ?
-
Ye mɛ ndo hɛ̃ mɔ dengɔ bɛ na ndo Ngbangɔ nɛ?
Bere
100%
tɛ azi mɛ ge lɛ gigi
na Ngbangɔ na yanga mɛ ala hĩnga ni nzɔ̃ni
Ni na ayanga ɔngɔ
3 000
na mobimba
bere ndambo
5 000 000 000
Ti Ngbangɔ mɛ akangbi,
ni la du buku mɛ akangbi ni gba ɔngɔ abuku mɛndɛ̃ zu
AZI MƐNDƐ̃ NDO TƐNƐ YA: “Ngbangɔ du buku ti gã mɛ azi la su ni.”
-
Mɔ da bɛ mɔ ya nɛ?
-
Aye mɛ ndo fa ya Ngbangɔ du tɛnɛ tɛ Nzapa nɛ?
NA NDUNU NI
Ngbangɔ du Tɛnɛ tɛ Nzapa, lo li ya zo zu di ni.
Bozongeli
-
Tɛnɛngɔ ya Nzapa sandó nyingɔ vurú tɛ lo ndo azi mɛndó asu Ngbangɔ, alengbi na nɛ?
-
Ye mɛ akamwisa mɔ na bangɔ se mɛndó abata, agbinyangbi nga na se mɛ akangbi na Ngbangɔ nɛ?
-
Hĩngangɔ ya Nzapa li zu ti tɛnɛngɔ tɛnɛ na mɔ, ato mɔ ya mɔ li nɛ?
AYE MƐNDƐ̃ MƐ MƆ LI
Di apandɛ ti ya Ngbangɔ,—ba se mɛndó ni banda na ni tee ndɛ.
“Ndenge oyo Biblia ebatelamá tii na mikolo na biso” (Lamuka!, ti 04/2008)
Ba se mɛ Ngbangɔ nwɔ̃ akpengba kpale taa.
“Biblia—Ndenge oyo ebatelamaki” (Linɔ́ngi ya Mosɛnzɛli No. 4 2016)
Ba se mɛndó azi kpã dungɔ lɛ ngɛ̃́ tɛ la na ya kwá ti nɛngɔ ya ala gbinyangbi Ngbangɔ.
Azi lindó akopi wa ala gbinyangbi ngandó Ngbangɔ fãni sĩĩ ni. Nda mɛ elengbi ti yengɔ na bɛ e kɔi ya ta tɛnɛ mɛ kaya ni agbinyangbi ma nɛ?
“Tɛnɛ mɛ kaya Ngbangɔ agbinyangbi, bere agbɛ̃ndó ni?” (Tɛnɛ mɛ kaya intɛrnɛt)
a Na ya wangɔ ti 07, e na hũngɔ ya nyingɔ vurú adu ngunu tɛ Nzapa mɛ lo ndo li na kwa.
