LÉZIʼI 05
Biible ée nkʉ wuié Ssé naa né pégé
Jéova la naa Biible mbwo pégé, aa taʼ maamaa kado wuié a gwiée pouô méŋwaʼné 66. Taʼ, ngouo o zèté ngié: «Biible laa péʼé foo nzôô? Aa chouŋé wôô?» Légwiée mbʉèe na môôn méno, a zèté lé gôôn no na nti yié nkʉ Ssé wuié ée tsaa Biible la gʉo ta nkouou mbwo pégé.
1. Pʉa mésong zo la ŋwéʼé Biible, nti kô mé ping ngôôn ngié aa Chouŋo Ssé?
Pʉa ta nkouʼou mmo 40 la lôg méngouʼ mmo 1 600 nŋwéʼé Biible. Mvôg mvfo gning la zhiété na ngouʼ 1513 ta mé zhié Yéeso. Laasé léen nké nzsoté na ngouʼ 98 ta mba mé zhiée Yéeso. Po la té taʼa mmo wô, pétso laa mégang nkab, pétso wo méfʉôg taʼ po la gwiée po taʼa ntchwo. Akô gʉo a wo pouʼou? Nti noué Biible aa Chouŋé Ssé (Toŋo 1 Tésalonika 2:13). Pèe pʉa la té ŋwéʼé po ménkouaŋa môb wô. Ta ntchʉʼ pouʼou, «pô wa gôôn no yié Ssé né nkouoŋo ngié po gôôn, azuigé ndʉalʉa zoo tsoté wôb ta po gôôn» a (2 Piè 1:21). Ssé la yousé zuigé ndʉalʉa yé ndôg ntsoté pʉa mésong lé ŋwéʼé ménkouaŋa mé (2 Timoté 3:16).
2. Ngouo pawôô jʉo pi na Biible?
«Ngouo pʉa mboo wèe ngouong wô, mboo yèe ngwuiè nda wôô, mboo pachouŋo mboo yèe chouŋé wôô, mboo yèe nti nti gning mésong wôô» jʉo pi na nkʉ mboŋo wuié ée tsèe Biible (Toŋo Ngia jʉʼ 14:6). Ssé la gʉo paʼ Biible gé wo ssé na méchouŋé ta ngiôôn ntôg mboo yèe ŋwaʼné wôô tsèe njʉo. Aa lièʼôôn, ngouo pʉa ta ngiôôn toŋo Biible, mboo paʼ po lôôn ntsuié po nzôô wôô, ka chouŋé po yèe chouŋé wôô.
3. Ée mèe méngégé mié é la too na Biible? Jéova ping nkabté Biible lékô?
Mé la ŋwéʼé Biible po na choum sié ngouo é lé laté paʼ méngoub ménôôn mboo papyrus. Taʼ, pʉa pié é la kouoŋo Biible la lôg mbwo nŋwéʼé kouaʼ mmo yié a laa tsolo, mbing nging sélé nŋwéʼé. Tso méfouô mbaa tso métanda tchʉoosé la faʼa lé piaga Biible taʼ, tso pʉa la koung koung nzuing lé naa two yôb lé lôg mbôônté yé. Jéova la té zuing ngié tsoo gning, ka tso mmo wôô tôʼô yé lé chouŋé né pégé. Biible gôôn ngié: «Achouŋé Ssé wégé gé laʼ tsuié wo pé wo» (Ésaya 40:8).
YING NKUIʼI NZIʼI
Kuiʼi nziʼi nti yié Ssé la lôgô zuigé ndʉalʉa yé ngʉo pʉa ŋwéʼé Biible, nti yié a la lôg nkabté, mboo nti yié a la lôg ngʉo ngié pʉa mésong kouʼou lé gwiée.
4. Biible gôôn no na gning wuié Biible foo mbwo yé
Tsôʼô VIDÉO. Léen nké ntoŋo 2 Timoté 3:16, mbing chouŋé na ménzèté:
-
A lôôn ngouo yié pʉa mésong zo la ŋwéʼé Biible, mba mélaʼa kô mé gôôn ngié aa Chouŋé Ssé?
-
O kouaang jou ngié ngouo mé kouaʼ nzuing ngié Ssé la kouʼou lé gʉo ngié pʉa mésong ŋwéʼé ménkouaŋa mé?
Ngouo gning gôôn mbwo gning ndièʼè ngié a ŋwéʼé ŋwaʼné, taʼ wèe nkʉ foo po mbwo gning wuié a tsuii ta mé ŋwéʼé. Ndésém pouʼou, pʉa mésong la ŋwéʼé Biible, taʼ nkʉ wuié ée tsolo foo po mbwo Ssé.
5. Pʉa la faʼa lé piaga Biible po té kouʼ
Mé zsé ngié Biible lôôn nkouaʼa foo mbwo Ssé, mba a gé kabté yé ta tso mmo lé piag. Ta fo méngouʼ méngouʼ, patantʉ la tra lé piaga Biible. Méntanda tchʉôôsé ying ntra yôb lé lʉoon ta mé lé zsé mmo yié aa tsolo wô. Taʼ, pʉa ta ngiôôn la zuiŋé lé naa two yôb lé lôg mbôônté Biible, mboo paʼ mé la lʉôʼô wôb mbing faʼa lé zuié wôb. O lôôn né faʼa lé zsé no na tsoo taʼ gning na pôb, o tsôʼô VIDÉO, mbing chouŋé na nzèté.
-
O vôôg ta nzsé ngié pʉa ta ngiôôn la zuiŋé lé naa two yôb lé lôg mbôônté Biible, a tsoté wou lé kouoŋo lé tong? Nti kô?
Toŋo Zôbô ntsé 119:97, mbing ngôôn no na yôôn nzaté:
-
Akô la tsoté pʉa ta ngiôôn lé zuiŋé lé naa two yôb lé kiagté Biible mbing ngʉo ngié pʉa ta ngiôôn gwiée?
6. Ŋwaʼné yié a lié pʉa métsém
Ta fo méngouʼ méngouʼ, Biible aa ŋwaʼné yié mé laa kiagté mbing ngʉo pʉa gwiée, ntôg métso méŋwaʼné tsèe ngouong ntsém. Toŋo Mégang ntoum 10:34, 35, mbing ngôôn no na môôn ménzèté:
-
Mélaʼa kô Ssé né nkouoŋo ngié mé kiagté Chouŋé yé, mbing ngʉo ngié pʉa ta ngiôôn tsaa ngouong gwiée?
-
Akô poŋo wou na Biible?
Pʉa ta nkouʼ mboo
100%
tsèe ngouong ntsém
kouʼou lé gwiée Biible na chouŋé laʼ yié po jouʼ.
Mé gwiée Biible ntsém
ka po taʼ gouoong wô
na méchouŋé ta ntôg
3 000.
5 000 000 000:
É naʼa ngouo nzuing Mébiible mié mé la kuilé,
mé ké la kuilé tso ŋwaʼné nzuiŋo wô.
TSO PɄA GÔÔN NGIÉ: «Biible wo po tso nzuiŋé ŋwaʼné yié pʉa mésong la ŋwéʼé.»
-
O kouaang jou ngié kô?
-
Akô kouaʼ gniè ngié Biible aa Chouŋé Ssé?
TA O ZIʼII KÔ?
Biible aa Chouŋo Ssé. A la ping ngʉo ngié pʉa métsém tsaa ngouong kouʼou lé gwiée.
Ta o né nkimté?
-
Mé gôôn ngié Ssé la lôgô zuigé ndʉalʉa yé ngʉo pʉa ŋwéʼé Biible, ndôgô pouʼou ngôôn ngié kô?
-
O jouʼouou nti yié mé la pôônté Biible ta a té pié, nkiagté yé, mbing ngʉo pʉa ta ngiôôn gwiée, akô kouaʼ nkibé wou moo?
-
O vôôg ta nzsé nzuiŋé Ssé la tra lé chouŋé né pégé, a gʉo o jouʼ lékô?
KUIʼI FAʼ
Toŋo pité wuié a laʼté nti yié mé la lôg mbwo nŋwéʼé Biible fʉʼʉ mvfo ta nkouou paʼ mé né nkiagté fʉʼôôn.
« Comment la Bible nous est parvenue » (Réveillez-vous !, novembre 2007)
Gia méchʉo ménta mié mé la faʼa lé pou mbiaga Biible, taʼ a té pié.
« La Bible : histoire dʼune rescapée » (La Tour de Garde no 4 2016)
Gia nti yié pʉa la lôg ngia ngôʼ pouʼou ta nkiagté Biible.
Mé la ŋwéʼé Biible mbing nkiagté méngʉa ta ngiôôn. Ngouo kô gʉo o zuing ngié nkʉ Ssé wuié ée tsolo la té koubé wô?
« La Bible a-t-elle été modifiée ou falsifiée ? » (article jw.org)
