MUTU 05
Baibo Ili na Uthenga Wocokela kwa Mulungu
Yehova watipasa mphaso yapadela. Mphaso iyi ni Baibo. M’Baibo muli mabuku 66 atontho-atontho. Koma mwina mungakonshe kuti: ‘Kansi Baibo yecokela kuni? Ni ŵani eilemba?’ Kuti tiyankhe makonsho aŵa, tiyeni tikambilane mwamene uthenga wa Mulungu uli m’Baibo wewelela kuli seo.
1. Pofwana kuti ŵanthu ndiye elemba Baibo, ndaŵa yanji tunena kuti yecokela kwa Mulungu?
Baibo yelembewa na ŵanthu 40. Kulemba Baibo kwetola vyaka pafupifupi 1,600, kucokela mu 1513 B.C.E. mpaka ca mu 98 C.E. Ŵanthu amene elemba Baibo enze na zinkhalidwe zosiyanasiyana. Mwacisanzo, ayakine enze olemela koma soti ophunzila ngako, pamene ayakine enze osauka koma soti ŵanthu wamba. Koma onse elemba zinthu zogwilizana. Kansi izi zekwanishika tyani? Zekwanishika cifukwa Baibo ni Mau a Mulungu. (Ŵelengani 1 Atesalonika 2:13.) Ŵanthu amene elemba Baibo aliyolembe maganizo ŵao. Koma “ekamba mau ocokela kwa Mulungu mosogolelewa na mzimu utuŵa.” a (2 Petulo 1:21) Mulungu eseŵenzesha mzimu wake kuyavya ŵanthu kuti alembe maganizo ŵake.—2 Timoteyo 3:16.
2. Ni ŵanthu otyani opindula na Baibo?
“Ŵanthu a m’calo ciliconse, fuko iliyonse, cilaŵilo ciliconse na mtundu ulionse” angapindule na uthenga wabwino upezeka m’Baibo. (Ŵelengani Chivumbulutso 14:6.) Mulungu esimikizhyila kuti Baibo ipezeke m’vilaŵilo vinyinji ngako kupambana buku iyakine iliyonse. Pafupifupi munthu aliyense ali nayo Baibo, mosasamala kanthu kuti onkhala kuni kapena okamba cilaŵilo canji.
3. Kansi Yehova waiteteza tyani Baibo?
Baibo yelembewa pa vinthu vamene vunkhalisha lini, monga vikumba na mapepa yamene yenzopangiwa kucokela ku vomela va papyrus. Koma ŵanthu okonda Baibo eikopolola na manja nopanga makope ayakine. Olamulila ayakine na asogoleli a vipembezo eyesa kuiononga Baibo. Koma ŵanthu ayakine eika moyo wao pangozi kuti aiteteze. Yehova aliyolole aliyense olo ciliconse kuti cimuleshe kukambilana na ŵanthu. Baibo yukamba kuti: “Mau a Mulungu wasu ankhalepo mpaka kale-kale.”—Yesaya 40:8.
PHUNZILANI ZINYINJI
Phunzilani mwamene Mulungu euzhyila ŵanthu kulemba Baibo, mwawaitetezela na zawacita kuti ŵanthu onse ankhale nayo.
4. Baibo yutiyavya kuziŵa eilemba
Onelelani VIDYO. Pavuli pake, ŵelengani 2 Timoteyo 3:16, nokambilana makonsho okonkhapo:
-
Pofwana kuti ŵanthu ndiye elemba Baibo, ndaŵa yanji yuitiwa kuti Mau a Mulungu?
-
Kansi muganiza kuti zingakwanishike kuti Mulungu auzhye ŵanthu kulemba maganizo ŵake?
Sekilitale angalembe kalata, koma uthenga uli m’kalata wacokela kuli munthu wamuuzhya. Molingana na izi, elemba Baibo ni ŵanthu, koma uthenga ulimo wecokela kwa Mulungu
5. Ŵanthu anyinji ankhala oyesayesa kuiononga Baibo, koma yapulumuka
Ngati Baibo yecokela cendi kwa Mulungu, ndiye kuti ofunika kuiteteza. M’mbili yonse ya ŵanthu, olamulila ankhala oyesayesa kuiononga Baibo. Asogoleli a vipembezo ayesa kuibisa. Koma ŵanthu anyinji aika moyo wao pangozi kuti aiteteze. Kuti muziŵe m’mozi mwa aŵa ŵanthu, onelelani VIDYO, ndipo pavuli pake kambilanani makonsho aŵa:
-
Pofwana kuti lomba mwaziŵa kuti ŵanthu ayakine eika moyo wao pangozi kuti ateteze Baibo, kansi izi zukucitishani kunkhala na mtima wofuna kuiŵelenga? Ndaŵa yanji?
Ŵelengani Salimo 119:97, nokambilana konsho iyi:
-
N’cinji celimbikisha ŵanthu anyinji kuika moyo wao pangozi kuti amasulile Baibo noifalisa?
6. Baibo ni buku ya ŵanthu onse
M’mbili yonse ya ŵanthu, Baibo ni buku yamene yamasuliliwa m’vilaŵilo vinyinji nofalisiwa pacalo conse. Ŵelengani Machitidwe 10:34, 35, nokambilana makonsho aŵa:
-
Ndaŵa yanji Mulungu ofuna kuti Mau ŵake amasuliliwe nofalisiwa m’vilaŵilo vinyinji?
-
N’cinji cukucitishani cidwi ponena za Baibo?
Pafupifupi
100%
ya ŵanthu pacalo conse
ali nayo Baibo m’cilaŵilo cakukwanisha kumvwa
Baibo yonse kapena mbali yake
ili m’vilaŵilo
vopitilila
3,000
5,000,000,000
Mabaibo amene afalisiwa akwana pafupifupi ciŵelengelo cili palulu.
Ici ni ciŵelengelo cikulu ngako kupambana buku iliyonse yafalisiwapo
ŴANTHU AYAKINE OKAMBA KUTI: “Baibo ni buku yakalekale yamene yelembewa tyala na ŵanthu.”
-
Nanga mweo muganiza tyani?
-
Ni umboni wotyani uonesha kuti Baibo ni Mau Mulungu?
MFUNDO ZACIDULE
Baibo ni Mau a Mulungu, ndipo wasimikizhyila kuti ŵanthu onse ali nayo.
Kuwelezhya mfundo zikulu-zikulu
-
Kansi mau akuti Mulungu euzhyila ŵanthu kulemba Baibo otanthauzanji?
-
N’cinji cukucitishani cidwi mukaganizila zacitika kuti Baibo ipulumuke, imasuliliwe nofalisiwa?
-
Kansi mukumvwa tyani mukaganizila zawacita Mulungu kuti akokambilana namwe?
FUFUZANI
Ŵelengani kuti muziŵe zecitika kuti Baibo imasuliliwe kucoka m’mipukutu yoyambilila.
Phunzilani mwayapulumukila Baibo ku vinthu vitatu vamene sembe veiononga.
Onani mwamene ŵanthu ayakine eikila moyo wao pangozi kuti amasulile Baibo.
Baibo yakopololewa nomasuliliwa nthawi zinyinji. Kansi mungasimikizhye tyani kuti uthenga wake uliyocinje?
“Kansi Baibo Yecinjiwa Olo Kusokonezewa?” (Nkhani yupezeka tyala pa webusaiti)
