ƐZUKOALƐDEƐ 05
Nyamenle Edwɛkɛ A Wɔ Baebolo Ne Anu A
Gyihova ɛva Baebolo ne ɛmaa yɛ. Ɔle ahyɛlɛdeɛ kɛnlɛma mɔɔ mbuluku ngyikyi 66 a wɔ nu a. Noko bie a ɛbabiza kɛ: ‘Kɛ ɔyɛle mɔɔ yɛ sa hanle Baebolo ne ɛ? Nwane a le ye kɛlɛvolɛ a?’ Amaa yɛabua kpuya ɛhye mɔ la, maa yɛzuzu kɛzi yɛ sa hanle edwɛkɛ mɔɔ wɔ Baebolo ne anu la anwo.
1. Saa menli a hɛlɛle Baebolo ne a, ɛnee kɛmɔti a yɛka kɛ ɔle Nyamenle edwɛkɛ ɛ?
Menli kɛyɛ 40 a vale ɛvolɛ kɛyɛ 1,600 hɛlɛle Baebolo ne a, ɔvi 1513 K.Y.M. kɔdwu 98 Y.M. Menli ngakyile a hɛlɛle a. Noko, edwɛkɛ mɔɔ wɔ Baebolo ne anu la amuala ɛngo ɛntia bɛ nwo. Kɛzi ɛhye yɛle boɛ ɛ? Ɔboalekɛ Baebolo ne vi Nyamenle ɛkɛ. (Kenga 1 Tɛsalonaekama 2:13.) Menli mɔɔ hɛlɛle la angɛlɛ bɛ nzuzulɛ. Emomu, “sunsum nwuanzanwuanza ne a hanle menli maanle bɛhanle mɔɔ vi Nyamenle ɛkɛ ne la a.” a (2 Pita 1:21) Nyamenle vale ye sunsum nwuanzanwuanza ne hanle menli anzɛɛ boale bɛ maanle bɛhɛlɛle ye edwɛkɛ ne.—2 Timote 3:16.
2. Nwane mɔ a bahola anyia Baebolo ne azo nvasoɛ a?
“Maanle nee mbusua nee aneɛ nee menli kɔsɔɔti” bahola anyia edwɛkɛ mɔɔ wɔ Baebolo ne anu la azo nvasoɛ. (Kenga Yekile 14:6.) Nyamenle ɛmaa menli dɔɔnwo asa ɛha Baebolo ne bie wɔ aneɛ mɔɔ bɛka la anu ɛdɛla buluku gyɛne biala. Asɛɛ awie biala lɛ Baebolo ne bie. Ɛhye le zɔ ɔnva nwo ɛleka mɔɔ bɛde anzɛɛ aneɛ mɔɔ bɛka la.
3. Kɛzi Gyihova ɛbɔ Baebolo ne anwo bane ɛ?
Bɛhɛlɛle Baebolo ne wɔ ninyɛne mɔɔ ɛngyɛ na yɛazɛkye, mɔɔ bie a le nane nwoma la azo. Noko menli mɔɔ ɛnee kulo Baebolo ne la nleanle mɔɔ wɔ ɛkɛ ne la azo vale bɛ sa hɛlɛle bie pɛpɛɛpɛ. Menli mɔɔ lɛ tumi la bɔle mɔdenle kɛ bɛsɛkye Baebolo ne, noko awie mɔ vale bɛ ngoane dole esiane nu amaa bɛabɔ nwolɛ bane. Gyihova ammaa awie anzɛɛ debie gyɛne biala anzi ye adenle kɛ ɔ nee yɛ badendɛ. Baebolo ne ka kɛ: “Yɛ Nyamenle ne edwɛkɛ ne wɔ ɛkɛ dahuu.”—Ayezaya 40:8.
SUKOA DƆƆNWO
Sukoa kɛzi Nyamenle vale ye sunsum ne hanle menli maanle bɛhɛlɛle Baebolo ne, kɛzi ɔbɔle nwolɛ bane yɛɛ kɛzi ɔmaanle menli asa hanle bie la anwo ninyɛne dɔɔnwo.
4. Baebolo ne maa yɛnwu ye Kɛlɛvolɛ ne
Ye VIDIO ne. Akee kenga 2 Timote 3:16, na bɛzuzu kpuya ɛhye mɔ anwo.
-
Saa menli a hɛlɛle Baebolo ne a, ɛnee duzu ati a bɛfɛlɛ ye Nyamenle Edwɛkɛ a?
-
Ɛnea a ndelebɛbo wɔ nu kɛ Nyamenle bahola amaa menli ahɛlɛ ye edwɛkɛ ɔ?
Awie bahola amaa bɛahɛlɛ ye kɛlata bɛamaa ye, noko kɛlata ne anu edwɛkɛ ne le ahenle mɔɔ maanle bɛhɛlɛle la ɛdeɛ. Zɔhane ala a menli a hɛlɛle Baebolo ne a, noko nuhua edwɛkɛ ne vi Nyamenle ɛkɛ a
5. Bɛangola bɛanzɛkye Baebolo ne
Saa Baebolo ne vi Nyamenle ɛkɛ a, ɛnee yɛ nye la kɛ ɔbabɔ nwolɛ bane. Ɔvi mekɛ tendenle, menli mɔɔ lɛ tumi la ɛbɔ mɔdenle kɛ bɛsɛkye Baebolo ne. Asɔne mgbanyima ɛbɔ mɔdenle kɛ bɛfa bɛavea. Noko menli dɔɔnwo ɛva bɛ ngoane ɛdo esiane nu ɛbɔ Baebolo ne anwo bane ɔnva nwo kɛ bɛdwazo bɛtia bɛ na bɛnwunlonwunla bɛ kɛ bɛku bɛ la. Amaa wɔanwu bɛ nuhua ko la, ye VIDIO ne, na akee bɛzuzu kpuya ɛhye mɔ anwo.
-
Kɛkala mɔɔ wɔnwu mɔdenle kpalɛ mɔɔ menli bɔle amaa bɛabɔ Baebolo ne anwo bane la, ɛ nye die nwo kɛ ɛbagenga ɔ? Nzɔne ati ɔ?
Kenga Edwɛne 119:97, na akee bɛzuzu kpuya ɛhye anwo:
-
Duzu a ɛha menli dɔɔnwo ɛmaa bɛva bɛ ngoane bɛdo esiane nu bɛhile Baebolo ne abo na bɛmaa menli asa ɛha bie a?
6. Buluku mɔɔ menli dɔɔnwo lɛ bie
Baebolo ne a le buluku mɔɔ bɛhile ɔ bo bɛhɔ aneɛ dɔɔnwo anu na bɛmaa menli asa ɛha bie ɛdɛla buluku biala a. Kenga Gyima ne 10:34, 35, na akee bɛzuzu kpuya ɛhye mɔ anwo:
-
Duzu ati a Nyamenle kulo kɛ bɛkile ye Edwɛkɛ ne abo bɛkɔ aneɛ dɔɔnwo anu na bɛmaa menli asa ka bie ɛ?
-
Duzu a maa ɛ nye die Baebolo ne anwo a?
Asɛɛ
awie biala
mɔɔ wɔ ewiade ye anu la
lɛ Baebolo wɔ aneɛ mɔɔ ɔte la anu
Ɔwɔ aneɛ mɔɔ bo
3,000
la anu,
ɔ muala anzɛɛ ye foa bie
5,000,000,000
Dodo mɔɔ bɛyɛ
bɛdɛla buluku gyɛne biala
BIE MƆ KA KƐ: “Baebolo ne le tete buluku mɔɔ menli a hɛlɛle a.”
-
Kɛzi ɛnwu ye ɛ?
-
Daselɛ boni a kile kɛ Baebolo ne le Nyamenle Edwɛkɛ a?
EDWƐKƐ TITILI
Baebolo ne le Nyamenle Edwɛkɛ, ɔti yenlea kɛ menli dɔɔnwo asa baha bie.
Ndinu
-
Saa yɛka kɛ Nyamenle vale ye sunsum ne hanle menli maanle bɛhɛlɛle Baebolo ne a ɔkile nzɔne?
-
Duzu a ɛ nye die nwo wɔ Baebolo ne mɔɔ bɛangola bɛazɛkye ye, bɛhile ɔ bo bɛhɔ aneɛ dɔɔnwo anu na bɛmaa menli asa ɛha bie la anwo a?
-
Kɛkala mɔɔ wɔnwu mɔdenle mɔɔ Nyamenle ɛbɔ kɛ ɔ nee wɔ badendɛ la, kɛzi ɔmaa ɛte nganeɛ ɛ?
KPONDƐ DƆƆNWO
Kenga Baebolo ne anwo tetedwɛkɛ ne—ɔvi mɔlebɛbo bɛsanloangɛlɛlera badwu ngilebɛbo mɔɔ wɔ ɛkɛ ɛnɛ la azo.
“Kɛ Ɔyɛle Mɔɔ Yɛnyianle Baebolo Ne La” (Awake!, November 2007)
Sukoa kɛzi ninyɛne nsa mɔɔ anrɛɛ bɛdua zo bɛazɛkye Baebolo ne anyɛ boɛ la.
Eza nea kɛzi menli vale bɛ ngoane dole esiane nu amaa bɛahile Baebolo ne abo la.
Bɛnlea Baebolo ne azo bɛhɛlɛ bie yɛɛ bɛhile ɔ bo fane dɔɔnwo. Duzu a maa ɛdie ɛdi kɛ bɛtɛkakyile nuhua edwɛkɛ ne a?
“Asoo Bɛhakyi Baebolo Ne Anu Edwɛkɛ Ne?” (Edwɛkɛ mɔɔ wɔ jw.org azo)
a Kɛ mɔɔ bɛhilehile nu wɔ Ɛzukoalɛdeɛ 7 ne anu la, sunsum nwuanzanwuanza ne le tumi mɔɔ Nyamenle fa yɛ gyima a.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
