05 EL SUOBEL
A Biblia Tekingel a Dios el Mei er Kid
A Jehovah mla meskid a kmal ungil sengk el ngii a cheldellel a 66 el babier el okedongall el Biblia. Engdi ke locha mo melatk: ‘Ngmla er ker el mei a Biblia? Ngbabilengel techang?’ A bo donger aika el ker e a kot, e me dosaod er a rolel e a tekingel a Dios el ngar er a Biblia a mlei er kid.
1. A lsekum a rechad a milluches er a Biblia, e ngmekera e babilengel a Dios?
A Biblia a lulluches er ngii a re 40 el chad er a chelsel a 1,600 el rak, er a 1513 B.C.E. el mora bekord el 98 C.E. Tirka mle kakerous a blekerdelel a klengar er tir. Me nguaisei engdi a Biblia diak el kebosech a tekoi er a chelsel. Ngmekerang e uaisei? E le Biblia tekingel a Dios. (Monguiu er a 1 Thesalonika 2:13.) A remilluches a dimlak loluches a uldesuir. Tirka “el uluuchais a klumech el mlar a Dios el mei a meltuchel er a Chedaol Reng er a lolekoi.” a (2 Petrus 1:21) Te mlukreng er a chedaol reng er a Dios el mo meluches a uldesuel.—2 Timothy 3:16.
2. Ngtecha sebechel menguiu er a Biblia?
“Bek el bedengir a re chad, ma kebliil, ma omelekoi, ma beluu” a sebechir el ngmai a klungiolir er a ungil chais er a Biblia. (Monguiu er a Ocholt 14:6.) A Dios ulterekeklii el kmo a Biblia a mo er ngii el ngar er a betok el omelekoi, el ngaruchei er a ngii di el babier el mla motobed. Ngkmeed el rokui el chad a sebechir el menguiu er a Biblia. Ngsebechir menguiu er ngii er a ngii di el basio el ngar ngii di el omelekoi.
3. Ngmilekera Jehovah e mekerreuii a Biblia?
A Biblia lulluches er ngii el lousbech a babier el diak el sebechel medechel el meketeket. Me nguaisei, engdi rechad el kmal betik a rengrir er a Tekingel a Dios a mle kerekikl el di meluches a copy er ngii el olab a di chimorir. E alta rechad el lullab a meklou el klisiich a mle sorir lokngemedii a Biblia, me nguaisei engdi te mla er ngii a rechad el kongei el mo mad el omekerreu er ngii. A Jehovah diak bo el becherei a ngii di el ngerang me leterebengii a rolel e ngmengedecheduch er kid. A Biblia kmo: “Tekingel a Dios er kid a kmal diak bo le metom!”—Isaia 40:8.
BOM DMOLECH EL MERRITER
Mluut el dochel a klemedengei er kau er a rolel e a rechad a mlukreng er a Dios el mo meluches er a Biblia, rolel e a Dios a milekerreuii a Biblia, me a rolel e ngmla rullii me ngsebeched el menguiu er a Tekingel.
4. A Biblia ouchais el kmo ngbabilengel techang
Momes er a VIDEO. E monguiu er a 2 Timothy 3:16 e mosaod aika el ker.
-
A lsekum a Biblia a mlara rechad, e ngera uchul me ngokedongall el Tekingel a Dios?
-
Omomdasu e ngsebechel tekoi el Dios uluuchais a uldesuel el mora rechad el lilechesii a Biblia?
A secretary sebechel meluches er a babier, me nguaisei a tekoi er a chelsel a tekingel ngike el oldurech er ngii el meluches. Me ngdi osisiu, a rechad a milluches er a Biblia, engdi tekoi er a chelsel a mlara Dios
5. A Biblia uleltekau a betok el omelasem el melemall er ngii
A lsekum a Biblia babilengel a Dios e kede medengei el kmo ngmo mekerreuii. Chelsel a reksi e te betok el chad el ullab a klisiich a millasem el melemall er a Biblia. A remengeteklel a klechelid a millasem el omart er ngii. Me nguaisei el alta ngmle sebechir loriid a klengar er tir e mlo chobangel a odechelakl, engdi te betok a kilengei el mo mad el omekerreu er a Biblia. A lsoam el suubii el kirel a ta er tir e momes er a VIDEO e mosaod aika el ker.
-
Ngmo soam el menguiu er a Biblia sel modengei el kmo, ngkmal betok a lurruul el omekerreu er ngii? E ngerang?
Monguiu er a Psalm 119:97 e mosaod er tia el ker:
-
Ngera rirelleterir a rebetok el mo melasem el oliuid e merous er a Biblia, alta ngmle sebechel mo uchul e te oriid a klengar er tir?
6. Babier el kirir a rokui el chad
A Biblia a mla moiuid el mo kot el betok el omelekoi e merous el babier er a reksi. Monguiu er a Rellir 10:34, 35 e mosaod aika el ker:
-
Ngera uchul me a Dios a soal a lemoiuid e lemerous a Tekingel el mora rokui el chad?
-
Ngera kmal soam er a Biblia?
Ngkmeed er a
100%
er a ildisir a rechad er a beluulechad
a sebechir el menguiu er a Biblia el ngar er a omelekingir
Ngar ngii el ngar er a betok er a
3,000
el omelekoi
el cherrungel el Biblia me a lechub e ngdi tedebechel
5,000,000,000
Bekord el ildisel el mla motobed,
el ngaruchei er a ngii di el babier
A REBEBIL A KMO: “A Biblia chuodel el babier el lulluches er ngii a rechad.”
-
Ngngera uldesuem?
-
Ngera ochotii el kmo a Biblia a Tekingel a Dios?
SUMMARY
A Biblia a Tekingel a Dios, e ngii a mla oterekeklii el kmo a rokui el chad a sebechir el menguiu er ngii.
Review
-
Ngera belkul sel dedu el kmo, a rechad a mlukreng er a Dios el mo meluches er a Biblia?
-
Ngera uldesuem el kirel a Biblia el mlukerreu er a omelasem el melemall er ngii, me a dirrek el oidel, me a omerusel?
-
Sel modengei el kmo a Dios a mirruul aika el rokui me bo lsebechel mengedecheduch er kau, e ngmo uangerang a uldesuem?
A LSEBECHEM E MOMES
Monguiu er a reksi er a Biblia, er a lekot el melluches el mei me a oidel er chelecha el taem.
Monguiu el kirel aike el edei el meklou el uchul e ngmle sebechel a Biblia el nguemed.
“A Biblia—A Chisel a Ulekerreuil me a Omengetmeklel” (A Ongkerongel July 2016)
Momes aike el kengaol el tekoi lurruul a rechad el mo oliuid er a Biblia.
A Biblia bla le copy e oliuid er ngii el betok el taem. Ngmekera sebechel mo ulterekokl a rengum el kmo, a tekingel a Dios a dirkak el mengodech?
“Has the Bible Been Changed or Tampered With?” (Suobel el ngar er a Internet)
a Ngua bo losaod er ngii a 07 el suobel, a chedaol reng er a Dios a oureor el klisichel.
