LEKCIJA 05
I Biblija tani poraka taro Devel amenge
O Jehova dengja amen jekh but šužo poklon — i Biblija. Ki late isi 66 potikne lila. Ama, šaj pučea tut: „Kastar tani i Biblija? Koj pišingja la?“ Te šaj te dobina o odgovorija ko akala pučiba, te dikha sar e Devleskiri poraka, koja soj pišimi ki Biblija, reslja dži amende.
1. Ako o manuša pišingje i Biblija, soske vakeraja kaj oj avela taro Devel?
I Biblija pišingje la okolu 40 različna manuša ko periodi taro okolu 1.600 berša — taro 1513 berš a.a.e. dži ko okolu 98 berš a.e. Iako lakere pisatelija sine but različna, sepak oj tani skladno taro početok dži ko krajo. Sar šaj te ovel adava? Adaleske so i Biblija tani poraka taro Devel. (Čitin 1. Solunjanite 2:13.) O pisatelija na pišingje ple misle, nego „vakerena sine o lafija so avena taro Devel agjaar sar so vodinela len sine o sveti duh“ a (2. Petrovo 1:21). O Devel koristingja plo sveti duh te šaj te pottikninel adale manušen te pišinen leskere misle (2. Timotej 3:16).
2. Dali i Biblija tani dostapno sa e manušenge?
O šukar haberi tari Biblija šaj te pomožinel „sekole nacijake, plemeske, čhibjake hem narodoske“. (Čitin Otkrovenie 14:6.) O Devel mukhlja i Biblija te ovel dostapno ko poviše čhibja taro bilo kova javer lil ki istorija. Skoro sekova manuš šaj te čitinel i Biblija, bizi razlika kote živinela ili ki savi čhib kerela lafi.
3. Sar o Jehova zaštitingja i Biblija?
I Biblija sine pišimi ko materijalija kola so na trajnena but vreme, sar soj i životinsko koža ili o papirus. Ama, o manuša so mangle i Biblija vnimatelno prepišingje la hem kergje točna kopie latar. Iako nesave mokjna manuša mangle te uništinen i Biblija, sepak nesave javera sine spremna te den plo životo te šaj te zaštitinen la. O Jehova na dozvolingja nikoj hem ništo te čhinavel leskiri poraka te resel dži amende. I Biblija vakerela: „O lafi amare Devleskoro ačhovela zasekogaš“ (Isaija 40:8).
DOZNAJN POVIŠE
Dikh sar o Devel koristingja plo sveti duh te pottikninel nesave manušen te pišinen i Biblija, sar zaštitingja la hem sar kergja oj te ovel dostapno sa e manušenge.
4. I Biblija vakerela amenge kastar avela
Dikh o VIDEOKLIPI. Palo adava čitin 2. Timotej 3:16, hem keren lafi bašo akala pučiba:
-
Ako o manuša pišingje i Biblija, soske vakeraja lake kaj tani e Devleskoro Lafi?
-
So mislinea, dali tano logično te verujna kaj o Devel prenesingja ple misle e manušenge so pišingje i Biblija?
O sekretari pišinela o pismo, ama i poraka avela taro manuš so vakergja leske so te pišinel. Slično agjaar, i Biblija sine pišimi taro manuša, ama lakiri poraka avela taro Devel
5. I Biblija preživingja o napadija taro protivnikija
Ako i Biblija tani taro Devel, tegani amen bi očekujnaja ov te zaštitinel la. Ki istorija, but mokjna manuša mangle te uništinen i Biblija. O religiozna vodačija na mukhena sine o obično narodo te čitinel la. Iako doživingje baro protivibe, but manuša sine spremna te den pumaro životo te šaj te zaštitinen i Biblija. Ako mangea te džane nešto poviše bašo jekh taro akala manuša dikh o VIDEOKLIPI, a palo adava keren lafi bašo akava pučibe:
-
Dali adava so džanea kaj nesave manuša kergje bare žrtve te šaj te zaštitinen i Biblija pottikninela tut te čitine la?
Čitin Psalm 119:97, a palo adava keren lafi bašo akava pučibe:
-
So pottikningja bute manušen te rizikujnen plo životo te šaj te prevedinen i Biblija hem te den la javerenge te čitinen la?
6. Jekh lil sa e manušenge
Nijekh javer lil ki istorija nane doborom but prevedimo hem dostapno sar i Biblija. Čitin Dela 10:34, 35, a palo adava keren lafi bašo akala pučiba:
-
Soske o Devel mangela leskoro Lafi te ovel doborom but prevedimo hem dostapno sa e manušenge?
-
So mukhela tuke najbaro vpečatok baši Biblija?
Skoro
100%
taro sa o manuša ko sveto
isi len pristap dži ki Biblija ki čhib so haljovena la
Dostapno tani ko poviše taro
3.000
čhibja
sar celo Biblija ili samo nesave delija latar
5 milijarde
Proceninela pe kaj dži akana ko sveto tane pečatime primerokija tari Biblija
but poviše taro bilo kova javer lil
NESAVE ŠAJ VAKERENA: „I Biblija tani samo jekh purano lil so pišingje le o manuša“.
-
So mislinea tu bašo akava?
-
Kola dokazija sikavena kaj i Biblija tani e Devleskoro Lafi?
SO SIKLILEM
I Biblija tani e Devleskoro Lafi hem ov dengja te ovel dostapno sa e manušenge.
Sar ka odgovorine?
-
So značinela adava kaj o Devel koristingja plo sveti duh te pottikninel nesave manušen te pišinen i Biblija?
-
So mukhela tuke najbaro vpečatok baši Biblija taro adava so dikhlem ki akaja lekcija?
-
Sar osetinea tut adaleske so džanea kaj o Devel kergja but bukja te šaj te kerel tuja lafi preku i Biblija?
ISTRAŽIN
Čitin sar reslja i Biblija dži amende — taro purane rakopisija dži ko sovremena prevodija.
„Kako Biblijata opstanala do den-denes“ (Razbudete se! taro noemvri 2007)
Doznajn sar i Biblija preživingja iako sine trin bukja so šaj sine te keren te na postojnel.
„Biblijata — kako bila začuvana?“ (Stražarska kula br. 4, 2016)
Dikh save opasnostija sine e manušen so prevedingje i Biblija.
I Biblija sine prepišimi hem prevedimi but puti. Sar šaj te ove sigurno kaj lakiri poraka na sine menimi?
a Sar so ka dikha ki lekcija 07, o sveti duh tano e Devleskiri aktivno sila.
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
